ಥೊಡ್ಯಾಚ್ಚ್ ದಿಸಾಂ ಆದಿಂ ದೊಗಾ ಆವಯೊ ಆಪ್ಲ್ಯಾ ೧೪ ಆನಿ ೧೫ ವರ್ಸಾಂ ಪ್ರಾಯೆಚ್ಯಾ ಪುತಾಂ ಸಾಂಗಾತಾ ಮ್ಹಜ್ಯಾ ಕ್ಲಿನಿಕಾಕ್ ಆಯಿಲ್ಲ್ಯೊ. ದೊಗಾಂಯ್ಚೆಂ ಪ್ರೊಬ್ಲೆಂ ಏಕ್‌ಚ್ಚ್. ಪೂತ್ ಸಗ್ಳೊ ದೀಸ್ ಮೊಬಾಯ್ಲ್ ಘೆವ್ನ್ ಬಸ್ತಾತ್. ಶಿಕಾಪ್ ವಾ ಆನಿ ಕಸಲೆಂಚ್ ಕರುಂಕ್ ತಾಂಕಾಂ ನಾಕಾ. ಜೆವ್ತಾನಾ, ನಿದ್ತಾನಾ ಆನಿ ವಾಶ್ ರುಮಾಕ್ ವೆತಾನಾ ಪರ್‍ಯಾಂತ್ ಮೊಬಾಯ್ಲ್ ನಾಸ್ತಾಂ ತೆ ಜಿಯೆಂವ್ಕ್ ಸಕಾನಾಂತ್. ತಸಲ್ಯಾ ಹಂತಾಕ್ ಯೇವ್ನ್ ಪಾವ್ಲ್ಯಾತ್. ಎಕ್ಲೊ ಚೆರ್ಕೊ ಹಿಂದ್ವಾಚೊ ಇಲ್ಲೊಸೊ ಮಧ್ಯಮ್ ವರ್ಗಾಚ್ಯಾ ಕುಟ್ಮಾಂತ್ಲೊ ತರ್ ಅನ್ಯೇಕ್ ಚೆರ್ಕೊ ಗ್ರೇಸ್ತ್ ಕ್ರಿಸ್ತಾಂವ್ ಕುಟ್ಮಾಂತ್ಲೊ ಆನಿ ತಾಂಚ್ಯಾ ಕುಟ್ಮಾಂತ್ ತಾಚಿಂ ಖಾಶಾ ಆಕಯ್ ಧರ್ಮ್‌ಭಯ್ಣ್ ತರ್ ತಾಚೊ ಏಕ್ ಬಾಪ್ಪು ಯಾಜಕ್. ಪುಣ್ ದೊಗೀ ಚೆರ್ಕೆ ಕೊಣೆಂ ಸಾಂಗ್‌ಲ್ಲೆಂ ಆಯ್ಕೊಂಕ್ ತಯಾರ್ ನಾಂತ್. ಮೊಬಾಯ್ಲ್ ದಿನಾಂತ್ ತರ್ ಘರ್ ಸೊಡ್ನ್ ವೆತಾಂ ವಾ ಜೀವ್ಘಾತ್ ಕರ್‍ನ್ ಘೆತಾಂ ಮ್ಹಳ್ಳ್ಯಾ ಹಂತಾಕ್ ಯೇವ್ನ್ ಪಾವ್ಲ್ಯಾತ್. ದೊಗಾಂಯ್ ಕಡೆನ್ ಉಲಯ್ತಾನಾ ಕಳೊನ್ ಆಯಿಲ್ಲೊ ಸಾಮಾನ್ಯ್ ಅಂಶ್- ಪ್ರೊಬ್ಲೆಂ ಭುರ್ಗ್ಯಾಂಚೆಂ ನ್ಹಯ್ ಪ್ರೊಬ್ಲೆಂ ವ್ಹಡಿಲಾಂಚೆಂ.

ಹ್ಯಾ ದಿಸಾಂನಿ ಆಮಿ ಚಡಾವತ್ ಜಣಾಂನಿ ಸಾಂಗ್‌ಲ್ಲೆಂ ಆಯ್ಕಾಲಾಂ – ‘ಭುರ್ಗಿಂ ಸಾಂಗ್‌ಲ್ಲೆ ಆಯ್ಕಾನಾಂತ್, ಭುರ್ಗಿಂ ಆಮ್ಚಿ ಪಾಡ್ ಜಾಲ್ಯಾಂತ್, ಶಿಕಾನಾಂತ್, ಮಾಗ್ಣೆಂ-ರಜಾರ್ ಕರಿನಾಂತ್’ ಅಶೆಂ ದೂರಾಂಚಿ ಪಟ್ಟಿ ಲಾಂಬೊನ್‌ಚ್ಚ್ ವೆತಾ. ಪುಣ್ ಹಿ ಭುರ್ಗಿಂ ಅಶಿಂ ಕಿತ್ಯಾಕ್ ಜಾತಾತ್? ಹಾಕಾ ಕಾರಣ್ ಕಿತೆಂ? ಆಮಿಂ ಇಲ್ಲೆಶೆಂ ಚಿಂತುನ್ ಪಳೆಲೆಂ ತರ್ ಆಮ್ಚಿಂ ಭುರ್ಗಿಂ ಪಾಡ್ ಜಾಂವ್ಕ್ ಆಮಿಂಚ್ ಕಾರಣ್ ಮ್ಹಳ್ಳೆಂ ಸಮ್ಜೊಂಕ್ ಚಡ್ ಕಶ್ಟ್‌ನಾಂತ್. ಪವಿತ್ರ್ ಪುಸ್ತಕಾಂತ್‌ಚ್ಚ್ ಅಶೆಂ ಬರೊವ್ನ್ ಘಾಲಾಂ ‘ಬರೊ ರೂಕ್ ಪಾಡ್ ಫಳ್ ದೀನಾ ತಶೆಂಚ್ಚ್ ಪಾಡ್ ರೂಕ್ ಥಾವ್ನ್ ಬರಿಂ ಫಳಾಂ ಆಪೇಕ್ಸುಂಕ್ ಸಾಧ್ಯ್ ನಾ’. ದೆಕುನ್ ಆಮಿ ಆಮ್ಚ್ಯಾ ಭುರ್ಗ್ಯಾಂಕ್ ಬೂದ್ ಸಾಂಗ್ತಾಂವ್, ಪುಣ್ ಭುರ್ಗ್ಯಾಂನಿ ಆಮ್ಕಾಂಚ್ಚ್ ಪಳೆವ್ನ್ ಅನುಕರಣ್ ಕರ್‍ಚೆಂ ಮ್ಹಳ್ಳೆಂ ಸತ್ ವಿಸ್ರಾತಾಂವ್. ಮ್ಹಜೊ ಆಬ್ ಆಮಿ ಲ್ಹಾನ್ ಆಸ್ತಾನಾ ಹಾತಾಂತ್ ಸೊರ್‍ಯಾಚೊ ಗ್ಲಾಸ್ ಘೆವ್ನ್ ಆಮ್ಕಾಂ ಬೂದ್ ಸಾಂಗ್ತಾಲೊ, “ಸೊರೊ ಪಿಯೆಂವ್ಚೊ ಬರೊ ನ್ಹಯ್, ತೊ ಜಿವಾಕ್ ಪಾಡ್”.

ಆಮಿ ಕಶ್ಟ್ ಕಾಡ್ಲ್ಯಾತ್, ಆಮ್ಚ್ಯಾ ಭುರ್ಗ್ಯಾಂನಿ ಸುಖಾನ್ ಜಿಯೆಜೆ

ಹರ್‍ಯೆಕಾ ಆವಯ್ ಬಾಪಾಯ್ಚೆಂ ಏಕ್‌ಚ್ಚ್ ಸ್ವಪಣ್ “ಆಮ್ಚ್ಯಾ ಭುರ್ಗ್ಯಾಂನಿ ಸುಖಾನ್ ಜಿಯೆಜೆ, ಆಮಿ ಕಾಡ್‌ಲ್ಲೆ ಕಶ್ಟ್ ತಾಂಚೆರ್ ಯೇನಾಯೆ”. ಪುಣ್ ಹೆಂ ಚಿಂತಾಪ್‌ಚ್ಚ್ ಆಯ್ಚ್ಯಾ ಭುರ್ಗ್ಯಾಂಕ್ ಮಾರೆಕಾರ್ ಜಾಂವ್ಕ್ ಪಾವ್ಲಾಂ. ಭುರ್ಗ್ಯಾಂನಿ ವಿಚಾರ್‍ಚ್ಯಾ ಫುಡೆಂಚ್ಚ್ ತಾಂಕಾಂ ಜಾಯ್ ಜಾಲ್ಲೆಂ, ನಾಕಾ ಜಾಲ್ಲೆಂ, ಗರ್ಜೆಚೆಂ ವಾ ಗರ್ಜ್ ನಾತ್‌ಲ್ಲೆಂ ಸಕ್ಕಡ್ ತಾಂಕಾಂ ಮೆಳೊನ್ ಆಸಾ. ಪಯ್ಲೆಂ ಘರಾಂತ್ ಸಬಾರ್ ಭುರ್ಗಿಂ ಆಸ್ತಾನಾ ವ್ಹಡ್ಲ್ಯಾಕ್ ಮೆಳ್‌ಲ್ಲೆಂ ತಾಣೆಂ ವಾಪಾರ್‍ಲ್ಯಾ ಉಪ್ರಾಂತ್ ಘರಾಂತ್ಲ್ಯಾ ಉರ್‍ಲ್ಯಾ ಭುರ್ಗ್ಯಾಂನಿ ವಾಂಟುನ್ ಘೆಂವ್ಕ್ ಆಸ್‌ಲ್ಲೆಂ. ಕಸಲಿಯ್ ವಸ್ತ್ ತಿ ಜಾಂವ್ ಸಕ್ಡಾಂಕ್ ಸಕ್ಕಡ್ ಮೆಳ್ನಾಂತ್ಲೆಂ. ಪುಣ್ ಆತಾಂಚ್ಯಾ ಕುಟ್ಮಾಂನಿ ಏಕ್ ವಾ ದೋನ್ ಭುರ್ಗಿಂ ಜಾಲ್ಲ್ಯಾನ್ ಹರ್‍ಯೆಕ್ಲ್ಯಾಕ್ ಏಕ್ ವಾ ದೋನ್ ವಸ್ತು ಚಡ್‌ಚ್ಚ್ ಮೆಳ್ತಾತ್ ಶಿವಾಯ್ ವಾಂಟುನ್ ಘೆಂವ್ಚಿ ಗರ್ಜ್ ಪಡಾನಾ. ಆವಯ್ ಬಾಪುಯ್ ದೊಗಾಂಯ್ ಘೊಳ್ತಾನಾ, ಭುರ್ಗ್ಯಾಂಚೊ ಗರ್ಜೊ ಸುಧಾರ್‍ಸುಂಕ್ ಚಡ್ ಕಶ್ಟ್ ಜಾಯ್ನಾಂತ್ ಜಾಲ್ಲ್ಯಾನ್ ಭುರ್ಗ್ಯಾಂಕ್ ಕಶ್ಟಾಂಚೆಂ ಮೋಲ್‌ಚ್ಚ್ ಕಳಿತ್ ಜಾಂವ್ಕ್ ಅಸಾಧ್ಯ್. ಏಕ್ ರುಪಯ್ ಮೊಡುಂಕ್ ಸಲೀಸ್, ಪುಣ್ ತೊ ಜೊಡುಂಕ್ ಕಿತ್ಲೆ ಕಶ್ಟ್ ಆಸಾತ್ ಮ್ಹಳ್ಳಿ ಸಮ್ಜಣಿ ತಾಂಕಾಂ ನಾ. ದೆಕುನ್ ಜಿಣ್ಯೆಂತ್ ಲ್ಹಾನ್ ಸಲ್ವಣಿ ವಾ ಕಶ್ಟ್ ಆಯ್ಲೆ ಫುಡ್ ಕರುಂಕ್ ತಾಂಕಾನಾಸ್ತಾ, ಲ್ಹಾನ್ ಪ್ರಾಯೆರ್‌ಚ್ಚ್ ಭುರ್ಗಿಂ ಮಾನಸಿಕ್ ದಬಾವ್, ಡಿಪ್ರೆಶನ್ ವಾ ಜೀವ್ಘಾತ್ ಅಸಲ್ಯಾ ಸಮಸ್ಯಾಂಕ್ ಬಲಿ ಜಾತಾತ್.

ಖಾಣ್ ಜೆವಾಣ್, ಜಿಣ್ಯೆರೀತ್ (life style) ಆನಿ ಭಲಾಯ್ಕಿ

ಆಜ್‌ಕಾಲ್ ಆಮಿ ಭಾರಿಚ್ಚ್ ಆಮ್ಸೊರಿ ಜಾಲ್ಯಾಂವ್. ಆಮ್ಚೆಂ ಜೀವನ್ ಎಕ್ದಮ್ ಫಾಸ್ಟ್ ಜಾಲಾಂ. ಫಾಸ್ಟ್ ಜಿಣ್ಯೆರಿತಿಂತ್ ಫಾಸ್ಟ್ ಫುಡ್ ಏಕ್ ವ್ಹಡ್ ಸಮಸ್ಯೊ ಜಾಲಾ. ಖೆಲ್ಲೆಂ ಖಾಣ್‌ಚ್ಚ್ ವೀಕ್ ಜಾಲಾಂ ದೆಕುನ್ ಕುಡಿಚಿ ಭಲಾಯ್ಕಿ ಮಾತ್ರ್ ನ್ಹಯ್, ಮಾನಸಿಕ್ ಭಲಯ್ಕಿ ಸಯ್ತ್ ಖಾಣಾ ವರ್ವಿಂ ಪಾಡ್ ಜಾತಾ ಮ್ಹಳ್ಳೆಂ ಸಬಾರ್ ಸಂಸೊದ್ ಆಮ್ಕಾಂ ದಾಕೊವ್ನ್ ದಿತಾತ್. ಜಿವೆಂ, ಪ್ರಾಕೃತಿಕ್ ಖಾಣ್ ಉಣೆಂ ಜಾವ್ನ್ ಸುಲಭಾಯೆನ್ ಪ್ಯಾಕೆಟಿನಿ ಮೆಳ್ಚಿಂ ಖಾಣಾ ಖಾಂವ್ಚೆಂ ಚಡ್ಲಾಂ ಜಾಲ್ಲ್ಯಾನ್ ಭಲಾಯ್ಕೆಚೆರ್ ಹಾಚೊ ಜಾಯ್ತೊ ಪ್ರಭಾವ್ ಪಡ್ತಾ. ಆಮಿ ಖೆಲ್ಲ್ಯಾ ಖಾಣಾ ವರ್ವಿಂಚ್ ಆಮ್ಚ್ಯಾ ಮೆಂದ್ವಾಕ್ ಸಕತ್ ಆನಿ ಜಾಯ್ ಜಾಲ್ಲೆಂ ಪೋಷಣ್ ಮೆಳ್ತಾ ಜಾಲ್ಲ್ಯಾನ್ ಆಜ್‌ಕಾಲ್ ಖಾಣ್ ಜೆವ್ಣಾದ್ವಾರಿಂ ತಾತ್ಕಾಲಿಕ್ ಸಂತೊಸ್ ದಿಂವ್ಚೆ ಹೊರ್ಮೊನ್ ಉತ್ಪತ್ತ್ ಜಾತಾತ್ ಜಾಲ್ಲ್ಯಾನ್ ಆಮ್ಚೊ ಜೀವ್ ಅಸಲೆಂ ಖಾಣ್ ಚಡ್ ಆಶೆತಾ. ಹಾಕಾ ಆಮಿಂ Cravings ಮ್ಹಣ್ತಾಂವ್. ಕೆದ್ನಾಂ ಹೆ Craving ಆಮಿ ಥಾಂಬವ್ಕ್ Junk Food ಖಾತಾಂವ್, ತೆದ್ನಾಂ ತಾತ್ಕಾಲಿಕ್ ಸಂತೃಪ್ತಿ ದಿಂವ್ಚೆಂ ಹೊರ್ಮೊನ್ ಡೊಪಮಿನ್ ಉತ್ಪನ್ನ್ ಜಾತಾತ್. ಹ್ಯಾ ವರ್ವಿಂ ತಾತ್ಕಾಲಿಕ್ ಖುಶಿ ಮೆಳ್ಚೆ ಖಾತಿರ್ ವ್ಹಡಾಂ ತಶೆಂ ಭುರ್ಗಿಂ ಅಸಲ್ಯಾ ಖಾಣಾ ಜೆವ್ಣಾಕ್ ಚಡ್ ವೆಂಗ್ತಾತ್ ಜಾಲ್ಲ್ಯಾನ್ ದೈಹಿಕ್ ತಶೆಂ ಮಾನಸಿಕ್ ಭಲಾಯ್ಕಿ ಭಿಗ್ಡೊಂಕ್ ಕಾರಣ್ ಜಾಲಾಂ.

ಕುಟ್ಮಾಚೊ ವೇಳ್

ಕುಟ್ಮಾಚೊ ವೇಳ್ (Family time) ಸಗ್ಳ್ಯಾ ಕುಟ್ಮಾನ್ ಸಾಂಗಾತಾ ಬಸೊನ್ ಸಗ್ಳೊ ದೀಸ್ ಕಿತೆಂ ಜಾಲಾಂ ತೆಂ ಎಕಾಮೆಕಾ ಸಾಂಗಾತಾ ವಾಂಟುನ್ ಘೆಂವ್ಚೊ ತಸಲೊ. ಪುಣ್ ಆಜ್-ಕಾಲ್ ಸಕ್ಕಡ್ ಆಪ್ಲ್ಯಾಚ್ಚ್ ಕಾಮಾಂನಿ “ಬ್ಯಿಸಿ” ಜಾಲ್ಲ್ಯಾನ್ ಹ್ಯಾ ಕುಟ್ಮಾಚ್ಯಾ ವೆಳಾ ಖಾತಿರ್ ಕೊಣಾಯ್ ಕಡೆ ವೇಳ್‌ಚ್ಚ್ ನಾ ಜಾಲಾ. ಕುಟ್ಮಾಚೆಂ ಮಾಗ್ಣೆಂ, ಕುಟ್ಮಾಚೆಂ ಜೆವಾಣ್ ಭೋವ್ ಥೊಡ್ಯಾಚ್ಚ್ ಘರಾಂನಿಂ ಆಸ್ತಾ ಜಾಲ್ಲ್ಯಾನ್ ಎಕ್ಲ್ಯಾಚ್ಯಾ ಜಿಣ್ಯೆಂತ್ ಕಿತೆಂ ಜಾತಾ ತೆಂ ದುಸ್ರ್ಯಾಕ್ ಕಳಿತ್ ಆಸಾನಾ. ಆತಾಂ ಜೆವ್ಣಾವೆಳಾರ್ ಬೊಶಿ ಘೆವ್ನ್ ಟಿ.ವಿ. ವಾ ಮೊಬಾಯ್ಲ್ ಪಳೆವ್ನ್ ಜೆವ್ತಾನಾ, ಕಿತೆಂ ಖಾವ್ನ್ ಆಸಾ ಮ್ಹಳ್ಳೆಂಯ್ ಥೊಡ್ಯಾಂಕ್ ಕಳಿತ್ ಆಸಾನಾ. ಘೊವಾ-ಬಾಯ್ಲೆಚೊ ಫೋನಾಚೊ ಪಾಸ್‌ವರ್ಡ್ ಎಕಾಮೆಕಾ ಕಳಿತ್ ನಾ. ಭುರ್ಗಿಂ ಆಪಾಪ್ಲ್ಯಾ ಮೊಬಾಯ್ಲಾರ್ ಕಿತೆಂ ಕರ್‍ತಾತ್ ತೆಂ ವ್ಹಡಿಲಾಂಕ್ ಕಳಿತ್ ನಾ.  ಮೊಬಾಯ್ಲಾಂ/ಲ್ಯಾಪ್‌ಟೊಪ್ ಘೆವ್ನ್ ಬಂದ್ ಕುಡಾಚ್ಯಾ ದಾರಾ ಪಾಟ್ಲ್ಯಾನ್ ಸಕ್ಡಾಂಕ್ ಪ್ರೈವೆಸಿ ಜಾಯ್ ದೆಕುನ್ ಕುಟ್ಮಾಚ್ಯಾ ಸಾಂದ್ಯಾಕ್ ಕಿತೆಂ ಜಾತಾ ಮ್ಹಣ್ ಸಮ್ಜಾಜೆ ತರ್, ಎಕಾಮೆಕಾಚಿ Whatsapp status ವಾ Instra Story ಪಳೆಲ್ಯಾರ್ ಮಾತ್ರ್ ಸಮ್ಜಾತಾ. Social Media ಚೆರ್ ಘೊವಾಬಾಯ್ಲೆಚೆ ಸಾಂಗಾತಾ Photo ಆನಿ ರೀಲ್ಸ್ ಘಾಲ್ನ್ #couplegoals ಮ್ಹಣ್ ಘಾಲ್ತಾತ್ ತರೀ ಘರಾ ಬಿತರ್ ಎಕಾಮೆಕಾ ದೆಕ್ತಾನಾ ಕಾಟಾಕ್ ಭಾಂದುನ್ ವೊರ್‍ಚ್ಯಾ ಕೊಂಬ್ಯಾಪರಿಂ ಸುಂಯ್ಪುನ್ ಆಸ್ತಾತ್. ಅಸಲ್ಯಾ ಮಧೆಂ ಕುಟ್ಮಾಚೊ ವೇಳ್ ವಿಂಗಡ್ ದವರ್‍ಚೊ ಕಸೊ?

ಭುರ್ಗಿಂ ಪಳೆವ್ನ್ ಶಿಕ್ತಾತ್

ಚಡಾವತ್ ವ್ಹಡಿಲಾಂ ಭುರ್ಗ್ಯಾಂಕ್ ಬೂದ್ ಸಾಂಗ್ತಾತ್. ತುಮಿಂ ಬರಿಂ ಭುರ್ಗಿಂ ಜಾಯ್ಜೆ, ಸಾಂಗ್‌ಲ್ಲೆಂ ಆಯ್ಕಾಜೆ, ಇಸ್ಕೊಲಾಂತ್ ಬರೆಂ ಶಿಕಾಜೆ, ಫೋನಾರ್ ಚಡ್ ಖೆಳೊಂಕ್ ನಜೊ, ಇತ್ಯಾದಿ. ಅಪುಣ್ ಮಾತ್ರ್ ಆಸ್‌ಲ್ಲೆ ಪೂರಾ ಗೇಮ್ಸ್ ಆನಿ ರೀಲ್ಸ್ ಮ್ಹಣೊನ್ ಘಂಟ್ಯಾಗಟ್ಲ್ಯಾನ್ ಫೋನಾರ್ ವೇಳ್ ಖರ್ಚಿತಾತ್. ರೂಲಿ-ರೆಗ್ರೊ ಆಸ್ಚ್ಯೊ ಭುರ್ಗ್ಯಾಂ ಖಾತಿರ್ ಮಾತ್ರ್ ಅಪುಣ್ ಮಾತ್ರ್ ಕಸಲೆಂಚ್ ಪಾಳಿನಾ ಮ್ಹಳ್ಳೊ ಮನೋಭಾವ್ ಆಸ್‌ಲ್ಲೆ ಕಡೆ ಭುರ್ಗಿಂ ಕಶೆಂ ಶಿಸ್ತ್ ಶಿಕ್ತೆಲಿಂ? ವ್ಹಡಿಲಾಂನಿ ಚಿಂತ್ಚೆಂ ಭುರ್ಗ್ಯಾಂಕ್ ಬೂದ್ ಸಾಂಗ್ಲ್ಯಾರ್ ಪಾವ್ತಾ ಮ್ಹಣೊನ್, ಪುಣ್ ಲ್ಹಾನ್ ಭುರ್ಗ್ಯಾಂಕ್ ಪಳೆಯಾ ಆಮಿ ವ್ಹಡಾಂನಿಂ ಕೆಲ್ಲೆ ಬರಿಚ್ಚ್ ಕರುಂಕ್ ಪ್ರಯತ್ನ್ ಕರ್‍ತಾತ್. ಆಮಿ ವ್ಹಡಾಂನಿ ಉಲಯ್ಲೆ ಬರಿಚ್ಚ್ ಉಲಂವ್ಕ್, ನೆಸೊಂಕ್ ಪ್ರಯತ್ನ್ ಕರ್‍ತಾತ್. ಅಶೆಂ ಆಸ್ತಾಂ ಆಮಿ ಬರೆ ಜಾಲ್ಯಾರ್ ಆಮ್ಚಿ ಭುರ್ಗಿಂ ಆಪಾಪಿಂಚ್ಚ್ ಬರಿಂ ಜಾತೆಲೆಂ. ದೆಕುನ್ ಆಮಿ ಶಿಸ್ತೆ ಭರಿತ್ ಜೀವನ್ ಶೈಲಿ ಆಪ್ಣಾಯ್ಲಿ ತರ್ ಭುರ್ಗ್ಯಾಂಕ್ ಆಮಿ ಬೂದ್ ಸಾಂಗ್ಚಿ ಗರ್ಜ್‌ಚ್ಚ್ ಪಡ್ಚಿ ನಾ ಕೊಣ್ಣಾ. ಆಸಿಸ್ಸಿಚ್ಯಾ ಸಾಂ. ಫ್ರಾನ್ಸಿಸಾಚ್ಯಾ ಮಾಗ್ಣ್ಯಾ ಪರ್ಮಾಣೆಂ ‘ಹೆರಾಂನಿಂ ಆಮ್ಕಾಂ ಕಿತೆಂ ಕರಿಜಾಯ್ ಮ್ಹಣ್ ಆಮಿ ಆಶೆತಾಂವ್‌ಗೀ ತೆಂ ಆಮಿ ಹೆರಾಂಕ್ ಕರಿಜೆ’. ಆಮಿ ಆಮ್ಚ್ಯಾ ಭುರ್ಗ್ಯಾಂ ಥಂಯ್ ಕಸಲೆ ಗೂಣ್ ಪಳೆಂವ್ಕ್ ಆಶೆತಾಂವ್‌ಗೀ, ತೆ ಶೆಗುಣ್ ಆಮಿ ಪಾಳುಂಕ್ ಸುರು ಕೆಲೆ ತರ್, ಆಮ್ಚಿ ಭುರ್ಗಿಂ ಆಪಾಪಿಂಚ್ಚ್ ಶೆಗುಣಿ ಜಾವ್ನ್ ವಾಡ್ತೆಲಿಂ.

ಕಶ್ಟ್-ಸಮಸ್ಯೆ ಭುರ್ಗ್ಯಾಂಕ್ ಕಳೊಂ

ಸಬಾರ್ ಪಾವ್ಟಿಂ ವ್ಹಡಿಲಾಂ ಮಸ್ತು ಕಶ್ಟ್ ಕಾಡ್ತಾತ್ ಆನಿ ಆಪ್ಲ್ಯಾ ಭುರ್ಗ್ಯಾಂಕ್ ತೆ ಕಶ್ಟ್ ಕಳಾನಾಯೇ ತಾಣಿಂ ಸುಖಾನ್ ಜಿಯೆಜೆ ಮ್ಹಣೊನ್ ಆಶೆತಾತ್. ಎಕಾ ಲೆಕಾರ್ ಆವಯ್ ಬಾಪಾಯ್ಚೆಂ ಅಂತಸ್ಕರ್ನ್ ಭುರ್ಗ್ಯಾಂಕ್ ಬರೆಂಚ್ಚ್ ಆಶೆತಾ. ಪುಣ್ ಚಡ್ ಸುಖ್ ಕ್ರಮೇಣ್ ದುಃಖಾಕ್ ಲೊಟ್ತಾ ಮ್ಹಳ್ಳೆಂ ಥೊಡೆಂ ಸಮ್ಜಾನಾಂತ್. ಥೊಡ್ಯಾ ವರ್ಸಾಂ ಆದ್ಲೆಂ ಘಡಿತ್: ಕೊರೊನಾಚ್ಯಾ ವೆಳಾರ್ ಏಕ್ ಚೆರ್ಕೊ ಎಕಾ ಪಿಜಿಂತ್ ರಾವೊನ್ ಆಸ್‌ಲ್ಲೊ. ಆವಯ್-ಬಾಪುಯ್ ಭಾಯ್ಲ್ಯಾ ಗಾಂವಾಂತ್ ವಾವುರ್‍ತಾಲಿಂ ಆನಿ ಲ್ಹಾನ್ಪಣಾರ್ ಥಾವ್ನ್‌ಚ್ಚ್ ಬಾಪಯ್ನ್ ಘರಾಂತ್ ತಾಕಿದ್ ದಿಲ್ಲಿಕೀ ಘರಾಂತ್ ಭುರ್ಗ್ಯಾಂ ಕರ್ನಾಂ ಕಿತೆಂಚ್ ಕಾಮ್ ಕರಂವ್ಕ್ ನಾ. ಅಶೆಂ ಸುಖಾನ್ ವಾಡ್‌ಲ್ಲೊ ಚೆಡೊ ಪಿಜಿಂತ್ ಆಸ್ತಾನಾ ವೊಸ್ತುರ್ ಲಾಂಡ್ರಿಕ್ ದಿತಾಲೊ. ಹೊಟೆಲಾಂತ್ ಖಾತಾಲೊ ಅಶೆಂ ಮಜೆನ್ ಜಿಯೆವ್ನ್ ಆಸ್ತಾನಾ, ಲಾಕ್‌ಡೌನ್ ಸುರು ಜಾಲ್ಲೆಂ. ಲಾಂಡ್ರಿ, ಹೊಟ್ಲಾಂ ಪುರಾ ಬಂದ್ ಜಾತಾನಾ ತಾಚೆ ಕಶ್ಟ್ ಸಾಂಗೊನ್ ಫಾಯ್ದೊ ನಾ. ಪೊಟಾಕ್ ನಾಸ್ತಾಂ ರಾಂದುಕ್ ಗೊತ್ತುನಾಸ್ತಾಂ ಅಖ್ರೇಕ್ ಥೊಡ್ಯಾ ಬರ್‍ಯಾ ಸೆಜಾರ್‍ಯಾ ಧರ್ಮಾನ್ ದೀಸ್ ಲೊಟ್ಲೆ. ಮಾಗಿರ್ ತಾಣೆಂ ಲಾಕ್‌ಡೌನ್ ಕಬಾರ್ ಜಾಂವ್ಚೆ ಭಿತರ್ ಸಕ್ಕಡ್ ಕಾಮ್ ಕರುಂಕ್ ಶಿಕ್ಲೊ. ದೆಕುನ್‌ಚ್ಚ್ ಕೊಣಾಕ್ ಕಶ್ಟಾಚೆ ಮಹತ್ವ್ ಗೊತ್ತಾಸಾಗೀ ತಿಂ ಜಿಣ್ಯೆಂತ್ ಕಿತೆಂ ಆಯ್ಲ್ಯಾರ್ ಫುಡ್ ಕರುಂಕ್ ಸಕ್ತಾತ್.

ಸಂಪ್ಣಿ

ಭುರ್ಗಿಂ ದೆವಾಚೆಂ ದೆಣೆಂ. ತೆಂ ಮೊಲಾಧಿಕ್ ದಿರ್ವೆಂ ಸಾಂಬಾಳುಂಕ್ ದೆವಾನ್ ಆವಯ್-ಬಾಪಾಯ್ಕ್ ಜವಾಬ್ದಾರಿ ದಿಲ್ಯಾ. ತರ್ ಹಿ ಜವಾಬ್ದಾರಿ ಪಾಳ್ಚಿ ಸುಲಭ್ ನ್ಹಯ್. ದೆಕುನ್ ಭುರ್ಗ್ಯಾಂನಿ ಬರ್‍ಯಾನ್ ವಾಡಾಜೆ ತರ್ ತಾಂಕಾಂ ಮಾರ್‍ನ್ ಬಡಯ್ಜೆಚ್ಚ್ ಮ್ಹಳ್ಳಿ ಗರ್ಜ್ ನಾ. ಆತಾಂಚಿಂ ಭುರ್ಗಿಂ ಲ್ಹಾನ್ಪಣಾರ್ ಥಾವ್ನ್‌ಚ್ಚ್ ಭಾರಿಚ್ಚ್ ಹುಶಾರ್ ದೆಕುನ್ ತಿ ಸರ್ವ್ ಪಳೆವ್ನ್‌ಚ್ಚ್ ಶಿಕ್ತಾತ್ ಜಾಲ್ಲ್ಯಾನ್ ತಾಂಕಾಂ ಬರೆಂ ವಾತವರಣ್ ರಚುನ್ ದಿವ್ಯಾಂ. ಆಮ್ಚೆಂ ನಡ್ತೆಂ, ಉಲವ್ಣೆಂ, ಜಿಣ್ಯೆರೀತ್ ಆಮಿ ಬರಿ ಕರ್‍ನ್ ಘೆತ್ಲಿ ತರ್, ಭುರ್ಗಿಂ ಆಮ್ಕಾಂ ಪಳೆವ್ನ್‌ಚ್ಚ್ ತಾಂಚಿಂ ಜಿಣಿ ಬರಿ ಕರ್‍ನ್ ಘೆತೆಲಿಂ. ಲ್ಹಾನ್ ಭುರ್ಗಿಂ ಜೆವಿನಾಂತ್ ಮ್ಹಣೊನ್ ತಾಂಕಾಂ ಮೊಬಾಯ್ಲಾರ್ ಕಾರ್ಟೂನ್ ದಾಕೊವ್ನ್ ಜೆವಾಣ್ ಲಾವ್ನ್ ಆಮಿಚ್ಚ್ ಸವಯ್ ಕರ್‍ನ್, ಮಾಗಿರ್ ತಿಂ ಮೊಬಾಯ್ಲ್ ಗುಲಾಮ್ ಜಾಲ್ಯಾಂತ್ ಮ್ಹಣ್ ದುರ್ಸಾಲ್ಯಾರ್ ಜಾತಾಗೀ? ತಾಂಚಿಂ ಲ್ಹಾನ್ ಲ್ಹಾನ್ ಕಾಮಾಂ ತಾಂಕಾಂಚ್ ಕರುಂಕ್ ಸೊಡ್ಯಾಂ. ಘರಾಂತ್ ಟಿ.ವಿ. ಆನಿ ಮೊಬಾಯ್ಲಾಂ ಇಲ್ಲೊಸೊ ವೇಳ್ ಬಂದ್ ಕರ್‍ನ್ ದವರುಂಕ್ ಸುರು ಕೆಲಿಂ ತರ್ ಆಮ್ಚಿ ಭುರ್ಗಿಂ ಪ್ರಾಯೆನ್ ಮಾತ್ರ್ ನ್ಹಯ್ ಜಾಣ್ವಾಯೆನ್ ವಾಡ್ತೆಲಿಂ.

–ಲೀಝಾ ರೊಡ್ರಿಗಸ್