ಪಾಟ್ಲ್ಯಾ ವರ್‍ಸಾಂನಿ ನತಾಲಾಂ ಫೆಸ್ತಾಕ್ ಪಾಪಾ ಫ್ರಾನ್ಸಿಸಾನ್ ದಿಲ್ಲೆಂ ಪ್ರವಚನ್ ಆನಿ ತಾಚೊ ಸಂದೇಶ್ ಹ್ಯಾ ಲೇಖನಾಂತ್ ಉಲ್ಲೇಖ್ ಕೆಲಾ. ನತಾಲಾಂ ಫೆಸ್ತ್ ಮ್ಹಳ್ಯಾರ್ ಕಿತೆಂ ಆನಿ ಹೆಂ ಫೆಸ್ತ್ ಕಶೆಂ ಅರ್ಥಾಭರಿತ್ ರಿತಿನ್ ಆಚರಣ್ ಕರ್‍ಯೆತ್ ಮ್ಹಳ್ಳೆವಿಶಿಂ ಪಾಪಾನ್ ಉಜ್ವಾಡ್ ಫಾಂಕಯ್ಲೊ.

1. ನತಾಲಾಂ ಫೆಸ್ತ್ ಕ್ರೀಸ್ತಾಚ್ಯಾ ಉಜ್ವಾಡಾಚೆಂ ಫೆಸ್ತ್, ಮನ್ಶಾಂಚ್ಯಾ ಕಾಳ್ಜಾಂನಿ ಕಾಳೊಕ್ ಆಸಾ. ಪುಣ್ ಕ್ರೀಸ್ತಾಚೊ ಉಜ್ವಾಡ್ ತಾಚ್ಯಾಕೀ ವರ್ತೊ, ವಯಕ್ತಿಕ್, ಕುಟ್ಮಾಚ್ಯಾ ಆನಿ ಸಮಾಜಿಕ್ ಸಂಬಂದಾಂನಿ ಅಂದ್ಕಾರ್ ಆಸಾ ತರೀ, ಕ್ರೀಸ್ತಾಚ್ಯಾ ಉಜ್ವಾಡಾಮುಕಾರ್ ಹೆಂ ಕಾಂಯ್ಚ್ ನ್ಹಯ್.

2. ನತಾಲಾಂ ಫೆಸ್ತ್ ದೆವಾಚೊ ಶರ್ತಾರಹಿತ್ ಮೋಗ್ ಉಗ್ಡಾಪೊ ಕರ್‍ತಾ. ಹೊ ಮೋಗ್ ಬದ್ಲಾವಣ್ ಹಾಡ್ತಾ, ಪರಿವರ್ತನ್ ಕರ್‍ತಾ, ಖೊಟ್ಯಾಥಾವ್ನ್ ಸುಟ್ಕಾ ದಿತಾ ಆನಿ ಆಮ್ಚಿಂ ಕಾಳ್ಜಾಂ ಸಮಾಧಾನಾನ್ ಆನಿ ಸಂತೊಸಾನ್ ಭರ್‍ತಾ. ಕಿತ್ಯಾಕ್ ಹೊ ಮೋಗ್ ದೈವಿಕ್ ಆನಿ ತೊ ಜೆಜು ಕ್ರೀಸ್ತಾ ಮಾರಿಫಾತ್ ಆಮ್ಕಾಂ ಉಗ್ಡಾಪೊ ಜಾಲಾ. ಆಮಿ ಕಿತ್ಲಿಂ ಖೊಟಿಂ ಜಾಲ್ಯಾರೀ, ದೇವ್ ಆಮ್ಚೊ ಮೋಗ್ ಕರ್‍ತಾ ಮ್ಹಳ್ಳೆಂ ನತಾಲಾಂ ಫೆಸ್ತ್ ಕಳಯ್ತಾ. ತಾಚೊ ಮೋಗ್ ಶರ್ತಾರಹಿತ್. ಆಮ್ಚ್ಯಾ ಜಿವಿತಾಂತ್ ಆಮಿ ಪಾತಕ್ ಕೆಲಾಂ ಜಾವ್ಯೆತ್, ಪುಣ್ ದೇವ್ ಆಮ್ಚೊ ಮೋಗ್ ಕರ್‍ತಾ. ತಾಚೊ ಮೋಗ್ ಬದ್ಲಾನಾ. ಕಿತ್ಯಾಕ್ ತೊ ಸೊಸ್ಣಿಕ್ ಆನಿ ವಿಶ್ವಾಸಿ. ಹೊ ಮೋಗ್ ಆಮಿ ನತಾಲಾಂ ಫೆಸ್ತಾ ವೆಳಾರ್, ಜೆಜುಥಂಯ್ ದೆವಾಚೆಂ ದೆಣೆಂ ಜಾವ್ನ್ ಘೆತಾನಾ, ತಾಕಾ ಅರ್ಗಾಂ ದಿವ್ಯಾಂ ಆನಿ ಜೆಜುಬರಿ ಏಕ್ ದೆಣೆಂ ಜಾವ್ನ್ ಹೆರಾಂಚ್ಯಾ ಜಿವಿತಾಂತ್ ಬರೆಪಣ್ ಹಾಡ್ಯಾಂ.

3. ಗರ್ದಾನಾಚ್ಯಾ ಗೊಟ್ಯಾಂತ್ ದೆವಾಚೆಂ ಲಾಗ್ಶಿಲೆಂಪಣ್ ಆಮ್ಕಾಂ ದಿಸೊನ್ ಯೆತಾ. ಖಾವಣ್ ಆಸ್ಚಿ ಗೊರ್ವಾಂಕ್ ಖಾಂವ್ಕ್ ದೀಂವ್ಕ್, ಮೊನ್ಜಾತಿ ಖಾತಾನಾ, ಆಧುನಿಕ್ ಸಂಸಾರಾಂತ್ ದುಡ್ವಾಚೊ ಆನಿ ಅಧಿಕಾರಾಚೊ ಆಬ್ಲೆಸ್, ಪೆಲ್ಯಾಕ್ ಸಯ್ತ್ ಖಾಂವ್ಕ್ ಪಾಟಿಂ ಸರನಾ ತಸಲಿ ಪರಿಸ್ಥಿತಿ ಪಳೆಂವ್ಕ್ ಮೆಳ್ತಾ. ಝುಜಾಂ, ಅನೀತ್ ಅಸಲಿಂ ಖರ್ಗಾಂ ಮನ್ಶಾಗವ್ರವಾಕ್ ಆನಿ ಸ್ವಾತಂತ್ರ್ಯಾಕ್ ಮಾರೆಕಾರ್ ಕಶಿಂ ಆಸಾತ್. ಅಸಲ್ಯಾ ಇನ್ಕಾರ್ ಕೆಲ್ಲ್ಯಾ ಗೊಟ್ಯಾಂತ್ ದೆವಾಚೊ ಪೂತ್ ಜಲ್ಮಾತಾ ಆನಿ ಮನ್ಶಾಂಚ್ಯೆ ಖೂಬ್ ವಾಯ್ಟ್ ಪರಿಸ್ಥಿತೆಂತ್ ಸಯ್ತ್ ದೇವ್ ಹಾಜರ್ ಆಸಾ ಆನಿ ಸಾಂಗಾತ್ ದಿತಾ ಮ್ಹಣ್ ಕಳಯ್ತಾ. ತ್ಯಾ ಗೊಟ್ಯಾಂತ್ ದೆವಾಚೆಂ ಲಾಗ್ಶಿಲೆಂಪಣ್ ಆಮಿ ಪಳೆಂವ್ಕ್ ಸಾಧನ್ ಚಲೊವ್ಯಾಂ. ತೊಚ್ ದೇವ್ ಆಪ್ಲ್ಯಾ ಮೊವಾಳ್ ಮೊಗಾನ್ ಆಮ್ಕಾಂ ಪೊಸ್ತಾ. ಆಮ್ಚ್ಯಾ ಕಶ್ಟಾಂ ದುಕಾಂನಿ ತೊ ಆಮ್ಕಾಂ ಲಾಗಿಂ ಆಸಾ. ತೊ ಆಮ್ಚ್ಯಾ ಸಾಂಗಾತಾ ಆಸಾ, ಆಮ್ಚೊ ಮೋಗ್ ಕರ್‍ತಾ ಆನಿ ಆಮ್ಕಾಂ ಸೊಧುನ್ ಯೆತಾ ಮ್ಹಣ್ ಹೆಂ ಫೆಸ್ತ್ ಕಳಯ್ತಾ.

4. ಜೆಜುಚ್ಯೆ ದುರ್ಬಳ್‌ಕಾಯೆಂತ್ ಖರಿ ಗ್ರೇಸ್ತ್‌ಕಾಯ್ ಆಟಾಪುನ್ ಆಸಾ. ಗರ್ದಾನಾಚ್ಯಾ ಗೊಟ್ಯಾಂತ್ ದುರ್ಬಳ್‌ಕಾಯ್ ಪಳೆಂವ್ಕ್ ಮೆಳ್ತಾ. ಹಿ ದುರ್ಬಳ್‌ಕಾಯ್, ಆಮ್ಚ್ಯಾ ಜಿವಿತಾಂತ್ ಖರಿ ಗ್ರೇಸ್ತ್‌ಕಾಯ್ ಖಂಯ್ಸರ್ ಪಳೆವ್ಯೆತ್ ಮ್ಹಣ್ ಸಾಂಗ್ತಾ. ಪಯ್ಶಾಂನಿ ಆನಿ ಅಧಿಕಾರಾಂತ್ ತಿ ಆಟಾಪುನ್ ನಾ, ಬಗಾರ್ ಸಂಬಂದಾಂನಿ ಆನಿ ಮನ್ಶಾಂನಿ ತಿ ಪಳೆಂವ್ಕ್ ಮೆಳ್ತಾ. ಜೆಜು ಆಮ್ಚ್ಯಾ ಜಿವಿತಾಚೆಂ ಮೊಲಾಧಿಕ್ ದಿರ್ವೆಂ ಆನಿ ಹೆ ದಿರ್ವೆಂ ದುಬ್ಳ್ಯಾಂಥಂಯ್ ಪಳೆಜೆ ಆನಿ ತಾಂಚೊ ಮೋಗ್ ಕರಿಜೆ. ದೆಕುನ್ ದುಬ್ಳ್ಯಾಂವಿಣೆಂ ಖರೆಂ ನತಾಲಾಂ ಫೆಸ್ತ್ ನಾ ಮ್ಹಣ್ ಆಮಿ ಸಮ್ಜಜೆ. ಹ್ಯಾ ಖಾತಿರ್ ನತಾಲಾಂ ಫೆಸ್ತ್ ಸಂಭ್ರಮ್ತಾನಾ, ಹೆರಾಂಕ್ ಚಡ್ ಜಾವ್ನ್ ಗರ್ಜೆವಂತಾಂಕ್ ಬರೆಪಣ್ ಕರುಂಕ್ ಪೆಚಾಡ್ಯಾಂ.

5. ನತಾಲಾಂ ಫೆಸ್ತ್ ಭಾವ್‌ಪಣಾನ್ ಜಿಯೆಂವ್ಕ್ ಆಧಾರ್. ಆಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ಜೆಜುಕ್ ಹ್ಯಾ ಸಂಸಾರಿಂ ಧಾಡ್ನ್, ಬಾಪಾನ್ ಆಮ್ಕಾಂ ತಾಚಿಂ ಭುರ್ಗಿಂ ಕೆಲ್ಯಾಂತ್. ಆಮ್ಚೆಂ ಭಾವ್‌ಪಣ್ ಖರ್‍ಯಾ ಮೊಗಾಂತ್ ಆಟಾಪುನ್ ಆಸಾ ಜಾಲ್ಲ್ಯಾನ್, ಪರ್ಕ್ಯಾಂಕ್ ಆಮಿ ಭೆಟೊನ್, ತಾಂಚ್ಯಾ ಕಶ್ಟಾಂನಿ ಆಧಾರ್ ದಿವ್ಯೆತ್, ಆನಿ ಕೋಣ್ ಆಮ್ಚ್ಯಾ ಕುಟ್ಮಾಂಚಿಂ ನ್ಹಯ್, ತಾಂಚಿ ಆಮಿ ಜತನ್ ಘೆವ್ಯೆತ್. ಬೆತ್ಲೆಹೆಮಾಂತ್ ಗೊರ್ವಾಂಚ್ಯಾ ಗೊಟ್ಯಾಂತ್ ಜಲ್ಮಾಲ್ಲೊ ಬಾಳೊಕ್ ಜೆಜು ಆಮಿ ನಿರ್ಗತಿಕಾಂಕ್, ಪಿಡೇಸ್ತಾಂಕ್ ಆನಿ ಕಶ್ಟಾಂತ್ ಸಾಂಪ್ಡಲ್ಲ್ಯಾಂಕ್ ಪಾವೊಂಕ್ ಆಧಾರ್ ದೀಂವ್.

6. ಭರ್ವಸೊ ಸಾಂಡ್ಲಲ್ಯಾಂಕ್ ಭರ್ವಸೊ ದೀಂವ್ಕ್ ನತಾಲಾಂ ಫೆಸ್ತ್ ಉಲೊ ದಿತಾ. ಕಶ್ಟಾತಲ್ಯಾ ಭಾಂವ್ಡಾಂಥಂಯ್ ಜೆಜುಚೆಂ ಮುಕಮಳ್ ಪಳೆಂವ್ಕ್ ಮೆಳ್ತಾ. ದೂಕ್ ಆನಿ ವಾಯ್ಟ್ ನಿಮಾಣೆಂ ಉತರ್ ನ್ಹಯ್, ತಾಚ್ಯಾ ಪಾಟ್ಲ್ಯಾನ್ ಭರ್ವಸೊ ಆಸಾ. ಹೊ ಭರ್ವಸೊ ಆಮಿ ಕ್ರಿಸ್ತಾಂವಾಂನಿ ಹೆರಾಂಕ್ ದೀಂವ್ಕ್ ಆನಿ ಕಶ್ಟಾತಲ್ಯಾಂಕ್ ಭುಜೊಂವ್ಕ್ ಜೆಜು ಆಮ್ಕಾಂ ಆಪಯ್ತಾ.

✍️ –ಬಾಪ್ ಗ್ರೇಶನ್ ಆಲ್ವಾರಿಸ್