ಅಪ್ರೂಪ್ ಏಕ್ ದೀಸ್ ಹೊಟ್ಲಾಂತ್ ಬಸೊನ್ ಚಾ ಪಿಯೆತಾಲೊಂ. ಲೋಕ್ ಕಾಂಯ್ ಚಡ್ ನಾತ್ಲೊ. ದೋಗ್ ವೇಯ್ಟರ್ ಇಲ್ಲೊ ಸುಶೆಗ್ ಮೆಳ್ಳೊ ಮ್ಹಣುನ್ ಎಕಾಮೆಕಾ ಮೊಬಾಯ್ಲ್ ದಾಕವ್ನ್ ಹಾಸ್ತಾಲೆ. ಏಕ್ ದೋನ್ ಜೊಡಿ ಚಾ ಪಿಯೆವ್ನ್ ಜಾಲ್ಯಾರೀ ಕಾಲೆಂಗೀ ಗುಂಡಾಯೆಚೆಂ ಉಲವ್ನ್ ಆಸ್ಲಿಂ. ಕ್ಯಾಶ್ ಕೌಂಟರಾರ್ ಬಸ್‌ಲ್ಲೊ ಧನಿ ಹೊಟ್ಲಾ ಮುಕಾರ್ ಉಭ್ಚಿ ಧುಳ್ ಖಂತಿನ್ ಪಳೆತಾಲೊ.

ತಿತ್ಲ್ಯಾರ್ ತೊ ಆಯ್ಲೊ!

ಎಕ್ಲೊಚ್ ಆಯ್ಲೊ, ಬಸ್ಲೊ. ಥಂಯ್ ಆಸ್ಲೆಲ್ಯಾ ಸಕ್ಡಾಂಕ್ ತಾಚಿ ವ್ಹಳಕ್ ಆಸ್ಲಿ. ತೊಯ್ ಹೆಣೆಂ ತೆಣೆಂ ಬಸ್ಲೆಲ್ಯಾಂಕ್ ಆಸಕ್ತೆನ್ ಪಳೆಲಾಗ್ಲೊ. ತೊ ಪಳೆತಾ ಮ್ಹಣ್ ಕಳ್ಳೆಂಚ್ ಹೆರಾಂನಿ ದೊಳೆ ಚುಕಯ್ಲೆ! ಹಾಂವ್ ತಾಕಾ ಪಳೆವ್ನ್ ಆಮ್ರುಕೆಂ ಹಾಸ್ಲೊಂ. ತಾಣೆಂಯ್ ಪಾಟಿಂ ಹಾಸೊ ದಿಲ್ಯೊ.

ಥೊಡ್ಯಾಚ್ ಮ್ಹಯ್ನ್ಯಾಂದಿಂ ತೊ ಎಕ್ಲೊಚ್ ಹೊಟ್ಲಾಕ್ ಯೇನಾತ್ಲೊ. ಆಯ್ಲ್ಯಾರಿ ತಾಚ್ಯಾ ಪಾಟ್ಲ್ಯಾನ್ ಧಾ ಜಣ್ ಆಸ್ತಾಲೆ. ಗಾಡಿಯೊ ಯೆವ್ನ್ ರಾವ್ತಾಲ್ಯೊ, ತೊ ಆಯಿಲ್ಲೆಂಚ್ ಕ್ಯಾಶ್ ಕೌಂಟರಾವಯ್ಲೊ ಧನಿ ಸಯ್ತ್ ಉಟೊನ್ ಯೆತಾಲೊ. ವೇಯ್ಟರ್ ಚುರುಕ್ ಜಾತಾಲೆ. ಆರ್ಡರ್ ದೀವ್ನ್ ಕುಲೊ ತೆಂಕಿಜೆ ತರ್ ಮೆಜಾರ್ ಪ್ಲೇಟಿ ಯೇವ್ನ್ ಪಾವ್ತಾಲ್ಯೊ. ಧನಿ ಬಿಲ್ ದಿಂವ್ಕ್ ಪಾಟಿಂ ಮುಕಾರ್ ಕರ್‍ಚೆಂ ಪಳೇವ್ನ್ ತೊಚ್ ಇಲ್ಲೆ ವ್ಹಡ್ಲೆ ನೋಟ್ ಕಾಡ್ನ್ ಧನಿಯಾಚ್ಯಾ ಬೊಲ್ಸಾಕ್ ಚೆಪ್ತಾಲೊ! ಆಜ್ ಎಕ್ಲೊಚ್ ಆಯ್ಲಾ!

ತವಳ್ ತೊ ಅಧಿಕಾರಾರ್ ಆಸ್ಲೊ! ತಾಣೆಂ ಸಾಂಗ್ಲ್ಯಾರ್ ಕಾಮ್ ಜಾತಾಲೆಂ. ಪೊರ್‍ಚ್ಯಾ ಎಲಿಸಾಂವಾಂತ್ ಸಲ್ವಲೊ! ಸಲ್ವಲ್ಲೊಚ್ ತೊ ಮಾಜಿ ಜಾಲೊ. ತಾಚೆಪಾಟ್ಲ್ಯಾನ್ ಆಸ್ಲೆಲೆ ಆತಾಂ ಜಿಕ್ಲಲೆಲ್ಯಾಚೆ ಪಾಟಿಕ್ ಲಾಗ್ಲ್ಯಾತ್.

ಹಾಂವೆಂ ಭಾಯ್ರ್ ತೀಳ್ನ್ ಪಳೆಲೆಂ. ಕಾರ್ ಸಾಧೆಂ ಆಸಾ, ಪುಣ್ ‘ಮಾಜಿ ಅಧ್ಯಕ್ಷರು’ ಮ್ಹಣ್ ಬರಯಿಲ್ಲೆಂ ಆಸಾ! ಮ್ಹಾಕಾ ಹಾಸೊ ಆಯ್ಲ್ಯೊ. ಆಪ್ಣಾಚೊ ನ್ಹಯ್ ಆಸ್ಲೆಲ್ಯಾ ಹುದ್ದ್ಯಾಕ್ ಅಜೂನ್ ಉಮ್ಕೊಳ್ ಘೆಂವ್ಚಿ ಪರಿಸ್ಥಿತಿ ಕಿತ್ಯಾ ಆಯ್ಲಿಗಾಯ್?

ಕಾಂಯ್ ಇಲ್ಲೊ ಅಧಿಕಾರ್ ಜೊಡ್ಲೊ, ಕಾಂಯ್ ಇಲ್ಲಿ ಆಸ್ತ್ ಜಾಲಿ, ತ್ಯಾ ಆಸ್ತಿಕ್ ಆನಿ ಅಧಿಕಾರಾಕ್ ಲಾಗೊನ್ ‘ಗವ್ರವ್’ ಮೆಳೊಂಕ್ ಸುರು ಜಾತಾ ನ್ಹಂಯ್ಗಿ? ಚಾರ್ ಕಾಸ್ ಆಸ್ತಾನಾ ಕೆದೊ ವ್ಹಡ್ಲೊ ಪೊಟ್ಟು ಜ್ಯೋಕ್ ಸಾಂಗ್ಲ್ಯಾರಿ ಲೋಕ್ ಹಾಸ್ತಾ ನ್ಹಂಯ್ಗಿ? ತಾಣೆಂ ಉಲಯಿಲ್ಲೆಂ ಪುರಾಯ್ ‘ಮೋಟಿವೇಶನಲ್ ಸ್ಚೀಚ್’ ಜಾತಾ ನ್ಹಂಯ್ಗಿ? ಆಮ್ಚೆಕಡೆ ಕಾಂಯ್ ಏಕ್ ಆಸಾ ಮ್ಹಳ್ಳೆ ಖಾತಿರ್ ಲೋಕ್ ಮಾನ್ ದಿತಾ, ಬೋವ್ ಬರೆಂ. ಜರ್ ಆಮ್ಚೆಕಡೆ ಆಸ್ಚಿ ಹಿ ಆಸ್ತ್, ಅಧಿಕಾರ್, ದುಡು ನಾತ್‌ಲ್ಲೊ ಜಾಲ್ಯಾರ್ ಲೋಕ್ ಆಮ್ಕಾಂ ಕಶೆಂ ಆನಿ ಕಿತೆಂ ಮ್ಹಣ್ ವ್ಹಳ್ಕತೊ? ಹೆಂ ಸಗ್ಳೆಂಯ್ ನಾ ಜಾಲ್ಯಾರ್ ಮನ್ಶಾಕ್ ಏಕ್ ವೆಕ್ತಿತ್ವ್ ಮ್ಹಳ್ಳೆಂ ನಾಂಗಿ? ಆಮ್ಚೆಕಡೆ ಆಸ್ಚೆಂ ಕಿತೆಂಗಿ ಆಮ್ಕಾಂ ಗವ್ರವ್, ಮಾನ್ ದಿಂವ್ಕ್ ಸಕ್ತಾ ತರ್ ತೆಂ ನಾಸ್ತಾನಾ ಆಮಿ ಕಾಂಯ್ಚ್ ನ್ಹಯ್ಗಿ? ಜರ್ ಆಮ್ಕಾಂ ಚಾರ್ ಚೊವ್ಗಾಂನಿ ಮಾನ್ ದೀಜೆ ತರ್ ಆಮ್ಚೆಕಡೆ ಕಿತೆಂ ಕರೀ ಆಸಾಜೆಚ್‌ಗಿ?

ಆಮ್ಚೆಕಡೆ ಆಸ್ಚ್ಯಾ ಖಂಯ್ಚ್ಯಾಗಿ ಎಕಾ ಸಂಗ್ತಿಖಾತಿರ್ ಆಯಿಲ್ಲೊ ಮಾನ್ ತಿ ಸಂಗತ್ ಖಾಲಿ ಜಾತಚ್ ತೊ ಮಾನ್‌ಯೀ ದೆಂವೊನ್ ವೆತಾ. ತುಂ ಯೇ, ತುಂ ಬಸ್ ಮ್ಹಣ್ಚೆಯ್ ಆಸ್ಚೆನಾಂತ್. ತುಂ ಗೆಲ್ಯಾರ್ ಕಿತ್ಯಾಕ್ ಗೆಲೊಯ್ ಮ್ಹಣ್‌ಯೀ ವಿಚಾರ್‍ಚೆ ನಾಂತ್.

ಸೊಭಾಯ್ ಆಸ್ತಾಸರ್ ತಾಚೆಖಾತಿರ್ ವೆದಿ ಉಭ್ಯೊ ಜಾತಾತ್. ಇನಾಮಾಂ ತಾಚೆಕರ್‍ನಾಂಚ್ ವಾಂಟಯ್ತಾತ್. ಇತ್ಲ್ಯಾಕ್‌ಚ್ ಆಪ್ಣಾಕ್ ಬಾರಿ ಮಾನ್ ಆಸಾ ಮ್ಹಣ್ ಚಿಂತ್ಲ್ಯಾರ್ ತಿ ಸೊಭಾಯ್ ಸಂಪ್ತನಾ, ಪ್ರಾಯ್ ಚಡೊನ್ ಯೆತಾನಾ ರಡ್ಚೆಂ ಖಂಡಿತ್.

ತರ್ ಆಮ್ಚೆಂ ‘ಸ್ವಂತ್’ ಮ್ಹಳ್ಳೆಂ ಕಿತೆಂ ಆಸ್ಯೆತ್? ಆಮ್ಚ್ಯಾ ವೆಕ್ತಿತ್ವಾಕ್ ಶಾಶ್ವತ್ ಮಾನ್ ಮೆಳ್ಚೆಬರಿ ಕಿತೆಂ ಕರ್‍ಯೆತ್? ಆಮಿ ಜೊಡ್ಲಲೆಂ ಶಿಕಪ್, ಆಮ್ಚೆಥಂಯ್ ಆಸ್ಚೆಂ ಪ್ರಮಾಣಿಕ್ಪಣ್, ಹೆರಾಂಖಾತಿರ್ ನಿಸ್ವಾರ್ಥ್‌ಪಣಿಂ ಕೆಲ್ಲೆಂ ಕಾಮ್, ಸರಳ್ ಜಿವಿತ್.. ಆಮ್ಚ್ಯಾ ವೆಕ್ತಿತ್ವಾಕ್ ಅಪಾಪಿಂಚ್ ಮಾನ್ ಚಡಯ್ತಾ. ಏಕ್ ಪ್ರಮಾಣಿಕ್ ಆನಿ ಬರೊ ಶಿಕ್ಶಕ್, ತಾಚ್ಯಾ ರಿಟಾಯರ್‌ಮೆಂಟಾ ಉಪ್ರಾಂತ್‌ಯೀ ತೊಚ್ ಮಾನ್ ಆಪ್ಣಾಯ್ತಾ. ತಾಚ್ಯೆ ವೃತ್ತೆಂತ್ ತೊ ನಿವೃತ್ತ್ ಜಾಲಾ ಆಸ್ಯೆತ್, ಪುಣ್ ಲೊಕಾಚ್ಯಾ ಕಾಳ್ಜಾ ಮನಾಂನಿ ತೊ ತಸೊಚ್ ಉರ್‍ಲಾ. ತಾಚೆಂ ಬರೆಂಪಣ್, ನಿಸ್ವಾರ್ಥಿ ವಾವ್ರ್, ಪ್ರಮಾಣಿಕ್ ಜಿವಿತ್ ಆನಿ ತಾಚಿ ಜಾಣ್ವಾಯ್ ಕೊಣೆಂಯ್ ನಾಕಾರುಂಕ್ ವಾ ಲ್ಹಾನ್ ಕರುಂಕ್ ಜಾಯ್ನಾ.

ದೆಕುನ್ ತೆಂ ಜೊಡ್ತಾಂ, ಹೆಂ ಜೊಡ್ತಾ, ತಾಕಾ ಲಾಗುನ್ ಮಾನ್ ಜೊಡ್ತಾಂ ಮ್ಹಣ್ ಚಿಂತ್ಲ್ಯಾರ್ ತೆಂ ಆಮ್ಕಾಂ ಶಾಶ್ವಿತ್ ವೆಕ್ತಿತ್ವ್ ಬಾಂದುನ್ ದೀನಾ. ಲೊಕಾಮಧೆಂ ಏಕ್ ನಕ್ಲಿ ಗವ್ರವ್ ಜೊಡ್ಯೆತ್, ಪುಣ್ ತೊ ವೆಗಿಂಚ್ ನಪಂಯ್ಚ್ ಜಾತಲೊ. ಸರಳ್, ಪ್ರಮಾಣಿಕ್ ಆನಿ ಬರೆಂ ವೆಕ್ತಿತ್ವ್ ಆವಾಜ್ ಕರಿನಾ, ದಬಾಜೊ ಉಟಯ್ನಾ, ಗಲಾಟೊ ರಚಿನಾ. ಬಾಕಿಚೆಂ ಸಗ್ಳೆಂ ಚಾರ್ ಜಣಾ ಜಮೊ, ಆವಾಜ್ ಆನಿ ಜೈಕಾರ್ ರಚುನ್ ಘೆತಾ. ತ್ಯಾ ಆವಾಜಾಂತ್ ಮನಿಸ್ ಕಿತ್ಲೊ ವಯ್ರ್ ವೆತಾಗಿ ತಿತ್ಲೊಚ್ ಏಕ್ ದೀಸ್ ಸಕ್ಲಾ ಪಡ್ತಾ. ತೊ ಪಡ್ತಾನಾ ಮಾನ್ ಆನಿ ಗವ್ರವ್‌ಯೀ ಧರ್ಣಿ ಸಮಾ ಜಾತಾ.

ಚಿಂತ್ನಾಂ ಥಾವ್ನ್ ಭಾಯ್ರ್ ಯೇವ್ನ್ ಪಳೆತಾನಾ ಮುಕ್ಲ್ಯಾ ಮೆಜಾರ್ ತಾಣೆಂ ಪಿಯೆವ್ನ್ ಖಾಲಿ ಕೆಲ್ಲೊ ಗೊಬ್ಳೊ ಮಾತ್ರ್ ಆಸ್ಲೊ. ತೊ ಕೆದ್ನಾಂಗಿ ಉಟೊನ್ ಗೆಲ್ಲೊ!

✍️ –ಜೊ. ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್