ವರಸ್ ಸಂಪೊನ್ ಆಯ್ಲೆಂ, ನವ್ಯಾ ವರ್‍ಸಾಕ್ ಪಾಯ್ ದವರ್‍ತಾಂವ್ ಮ್ಹಳ್ಳಿ ಏಕ್ ಖುಶಿ. ಜಲ್ಮಾದೀಸ್ ತರ್ ನವಿ ಮುಸ್ತಾಯ್ಕಿ, ಕೇಕ್ ಪಾರ್ಟಿ ಮ್ಹಣ್ ಭಾರಿ ಗಮ್ಮತ್. ಪುಣ್ ಹೊ ಸಂತೊಸ್ ತ್ಯಾ ದಿಸಾ ಮಾತ್ರ್. ನಿಜಾಯ್ಕಿ ಆಮಿ ಲೇಕ್ ಘಾಲೆಂ ತರ್ ಆಮಿ ಮೊರ್‍ನಾಕ್ ಏಕ್ ವರಸ್ ಲಾಗಿಂ ಜಾಲ್ಯಾಂವ್! ಪ್ರಾಯ್ ಸಾಟ್ ತರ್ ನಿವೃತ್ತ್. ಸತ್ತರ್ ತರ್ ಫೊಂಡಾ ಭಿತರ್. ಮ್ಹಾಕಾ ಪ್ರಾಯ್ ಜಾಲಿ ಆನಿ ಹಾಂವೆಂ ಕಿತೆಂ ಕರ್‍ಯೆತ್ ಮ್ಹಣ್ ಅರ್ವಸ್ ಲೋಕ್ ಆಪ್ಲೊ ಫೊಂಡ್ ಆಪುಣ್‌ಚ್ ಖೊಂಡುಂಕ್ ಲಾಗ್ತಾ. ಪುಣ್ ಹ್ಯೆ ಪ್ರಾಯೆರ್ ಬೀರಾ ವೆಚೆಂ, ಆವಾಜ್ ಕರ್‍ಚೊ, ಕದೆಲಾಖಾತಿರ್, ಅಧಿಕಾರಾಖಾತಿರ್, ಭಾಶಣಾ ಕರ್‍ಚಿಂ ರಾಜಕಾರಿಣಿಂನಿ. ತಾಂಕಾಂ ಪ್ರಾಯೆಚಿ ಫಿಕಿರ್‌ಚ್ ನಾ. ಪ್ರಾಯ್ ಕುಡಿಕ್ ಜಾಂವ್ಚಿ ಸಹಜ್. ಪುಣ್ ಮತಿಕ್ ಪ್ರಾಯ್ ಜಾಲಿ ಮ್ಹಣ್ ತುಮಿ ಚಿಂತ್ತಾತ್ ತರ್ ನಿಜಾಯ್ಕಿ ತುಮಿ ಪ್ರಾಯ್ವಂತ್.

ಹಾಂವ್ ಲ್ಹಾನ್ ಥಾವ್ನ್ ಆಯ್ಕತಾಲೊಂ ಹರ್‍ಯೆಕಾ ನತಲಾ ವೆಳಾರ್, ಪೊರ್ವಾಂ ನವ್ಯಾ ವರ್‍ಸಾಚೊ ಸಂಭ್ರಮ್. ಮೀಸ್ ಜಾತಚ್ ಮಯ್ದಾನರ್ ‘ಮ್ಹಾತಾರೊ ಲಾಸೊಂವ್ಕ್’ ಆಸಾ; ತಶೆಂಚ್ ವಿವಿಧ್ ಖೆಳ್ ಯುವಕ್ ಸಂಘ್ ಆಸಾ ಕರ್‍ತಾಲೆ. ಹಾಂವ್ ವ್ಹಡ್ ಜಾಲ್ಲೊಂಚ್ ಆಬಾ-ಮಾಂಯ್ಚ್ಯೆ ಪಾಸ್ಳೆಂತ್. ತಶೆಂ ಪ್ರಾಯ್ವಂತಾಂಚೆರ್ ವೋಡ್ ಚಡ್. ಮ್ಹಾತಾರೊ ಲಾಸ್ಚೆವಿಶಿಂ ಆಬಾ ಕಡೆ ಚರ್ಚಾ ಕರ್‍ತಾನಾ ತಾಣೆಂ ಮ್ಹಳ್ಳೆಂ. “ಥೊಡೆ ಸಬ್ದ್ ಪಯ್ಲೆಂ ಥಾವ್ನ್ ಆಸಾ ತಶೆಂ ಉಪ್ಯೋಗ್ ಕರ್‍ತಾತ್. ಮ್ಹಾತಾರೊ, ಪ್ರಾಯ್ವಂತ್ ದೊನೀ ಚೂಕ್. ತಾಂಕಾಂ ಆಮಿ ಜಾಣಾರಿ ಮ್ಹಣಜೆ.” ಹ್ಯಾ ವೆಳಾರ್ ಡೊ. ರಾಜಕುಮಾರಾಕ್ ವೀರಪ್ಪನಾನ್ ಅಪಹರಣ್ ಕೆಲ್ಲೆಂ. ತೆದ್ನಾ ಹಾಂವ್ ಯುವಕ್ ಸಂಘಚೊ ಅಧ್ಯಕ್ಶ್, ಬಾಪ್ ವಲ್ಲಿ ಆಮ್ಚೊ ವಿಗಾರ್ ತಾಕಾ ಸೂಚನ್ ದಿಲೆಂ ಕೀ ಹ್ಯಾ ವರ್‍ಸಾ ವೀರಪ್ಪನಾಕ್ ಲಾಸೊಂವ್ಕ್ ಆಸ್ತಲೆಂ! ಹಾಚ್ಯಾ ಉಪ್ರಾಂತ್ ಆಮ್ಚ್ಯೆ ಫಿರ್ಗಜೆಂತ್ ‘ಮ್ಹಾತಾರೊ ಲಾಸೊಂವ್ಕ್’ ಮ್ಹಳ್ಳೊ ಸಬ್ದ್ ವಾಪಾರುಂಕ್ ನಾ. ಆತಾಂ ಹೆಂ ಲಾಸ್ಚೆಂ ಕಾರ್ಯೆಂಚ್ ನಾ!

ಡಿಸೆಂಬರ್ ಆಖ್ರೇಕ್ ತುಮಿ ಗಾಡಿ ಘೆತ್ಲಿ ವಾ ತುಮ್ಚೊ ಜಲ್ಮಾದೀಸ್ ತರ್ ಥೊಡೆ ‘ಬುದ್ವಂತ್’ ಸಾಂಗ್ತಾತ್. “ಇಲ್ಲೆ ದೀಸ್ ಮುಕಾರ್ ಘಾಲ್ಲೆಂ ತರ್ ನವೆಂ ಮೊಡೆಲ್ ಯೆತೆಂ” ಮ್ಹಣ್! ಕೊಣಾಕೀ ಪ್ರಾಯ್ ಚಡ್ ಮ್ಹಣ್ ಸಾಂಗೊಂಕ್ ನಾಕಾ. ಕಸ್ಲೆಂಯ್ ಸಾಧನ್ ಕರುಂಕ್ ಪ್ರಾಯ್ ಮಾಪ್‌ದಂಡ್ ನ್ಹಯ್. ಯಶಸ್ವಿ ಜೊಡುಂಕ್ ತರ್ನಿ ಪ್ರಾಯ್‌ಚ್ ಜಾಯ್ಜೆ ಮ್ಹಣ್ ನಾ. ಸಕ್ಡಾಂನಿ ನಿವೃತ್ತ್ ಜಾಂವ್ಚ್ಯೆ ಪ್ರಾಯೆರ್ ತಾಣೆಂ ತಾಚೆಂಚ್ ಬ್ರ್ಯಾಂಡ್ ಉಬಾರ್‍ಲೆಂ. ತಾಚ್ಯಾ ಉತ್ಪನ್ನಾಕ್ ತೊಚ್ ರೂಪ್‌ದರ್ಶಿ ಜಾಲೊ. ಆಜ್ ತಾಣೆಂ ಆರಂಬ್ ಕೆಲ್ಲೆಂ ಉತ್ಪನ್ನ್ ಸಂಸಾರಾಚ್ಯಾ 148 ದೆಶಾಂನಿ ಆಸಾ. ತಾಚೆವಿಶಿಂ ಸಾಂಗೊಂಕ್ ವಯ್ಲೆಂ ಪ್ರಸ್ತಾವನ್ ದಿಲೆಂ ಹಾಂವೆಂ. ಆನಿ ತೊ ಕೊಣ್‌ಚ್ ನ್ಹಯ್, ಬಗಾರ್ ಕೆ‌ಎಫ್‌ಸಿ ಸಂಸ್ಥಾಪಕ್ ಕರ್ನಲ್ ಹಾಚ್‌ಲ್ಯಾಂಡ್ ಸ್ಯಾಂಡರ್ಸ್. ತಾಣೆಂ ತಾಚೆಂ ಉದ್ಯಮ್ ಆರಂಬ್ ಕರ್‍ತಾನಾ ತಾಚಿ ಪ್ರಾಯ್ ಕೇವಲ್ 65 !!

ಪ್ರಾಯ್ ಕೇವಲ್ ಸಂಖೊ. ಉರ್ಬಾ, ಆಸಕ್ತ್ ಆನಿ ಆಶಾವಾದ್ ಆಸಾ ತರ್ ಕೊಣೀ ನವಾಲಾಂ ಕರುಂಕ್ ಸಕ್ತಾ. ತ್ಯಾ ಜಾಣ್ತ್ಯಾಕಡೆ ಸಯ್ತ್ ಕಾಂಯ್ ತರೀ ಕರ್‍ಚಿ ಆಶಾ ಆಸ್ಲಿ. ಲ್ಹಾನ್ ಝೊಪ್ಡ್ಯಾಂತ್ ತೊ ಜಿಯೆತಾಲೊ. ಥಂಯ್ ಹಾಂಗಾ ರಾಂವ್ಚೆಂ ಲಟರಿ ಪರ್ನೆಂ ಕಾರ್, ಮ್ಹಯ್ನ್ಯಾಕ್ ಪೆನ್ಶನ್ ಮ್ಹಣ್ 99 ಡೊಲರ್ ಯೆತಾಲೆ (7000 ರುಪಯ್). ಜೀವನ್ ಸಾಗ್ಸುಂಕ್ ಕಶ್ಟತಾಲೊ. ಯೆಂವ್ಚ್ಯಾ ಹ್ಯಾ ಪಯ್ಶಾಂನಿ ವಿನಿಯೋಗ್ ಕರ್‍ನ್ ವೆಪಾರ್ ಕೆಲೊ ತರ್ ಕಾಂಯ್ ಚಡಿತ್ ಜೊಡ್ಯೆತ್ ಅಶೆಂ ಸಪ್ಣೆತಾಲೊ. ತಾಕಾ ಕುಂಕಡ್ ವಿವಿಧ್ ಮಸಾಲ್ಯಾಂನಿ ರಾಂದ್ಚಿ ಪಿಸಾಯ್. ತಾಚೆ ಈಶ್ಟ್ ತಾಂಗೆರ್ ತಾಚಿ ರೆಸಿಪಿ ಚಾಕೊಂಕ್ ಯೆತಾಲೆ ಆನಿ ತಾಚ್ಯಾ ರಾಂದ್ಪಾಕ್ ಹೊಗಾಳ್ಸಿತಾಲೆ. ಸ್ಯಾಂಡರ್ಸ್ ಹಿಚ್ ರೆಸಿಪಿ ವಾಪಾರ್‍ನ್ ಚಿಕನ್ ಉದ್ಯಮ್ ಕರುಂಕ್ ಚಿಂತ್ತಾ. ಈಶ್ಟ್ ಹಾಚ್ಯೆ ಆಶೆಕ್ ಸಯ್ ಘಾಲ್ತಾತ್. ಕೆಂಟುಕಿ ತಾಚೊ ಗಾಂವ್. ತ್ಯಾಚ್ ನಾಂವಾನ್ ಆಪ್ಲಿ ರೆಸಿಪಿ ವಿಕ್ತಾ. ಪುಣ್ ಕಶೆಂ ಕರ್‍ಚೆಂ ಮ್ಹಣ್ ಘುಟ್ ಸೊಡಿನಾ! ಕೆಂಟುಕಿ ಭಾಯ್ರ್ ವಚೊನ್ ಪ್ರಚಾರ್ ಕರ್‍ತಾ. “ಮ್ಹಜ್ಯೆ ರೆಸಿಪಿಚೆಂ ಚಿಕನ್ ತೊಂಡಾಂತ್ ಹಲ್ವಾಬರಿ ಪಿಗಳ್ತಾ. ಏಕ್ ಪಾವ್ಟಿಂ ತುಮ್ಚ್ಯಾ ಹೊಟ್ಲಾಂತ್ ವಾಪಾರ್‍ನ್ ಆವ್ಕಾಸ್ ದಿಯಾ” ಮ್ಹಣ್ ಆಡ್ದೊಸ್ ಮಾಗ್ತಾ. ಪುಣ್ ತಾಚಿ ಪ್ರಾಯ್ ವೇಸ್ ಪಳೆವ್ನ್ ಕೊಣೀ ಆವ್ಕಾಸ್ ದೀನಾಂತ್. ಹಾಂವ್ ಧರ್ಮಾಕ್ ದಿತಾಂ ತುಮಿ ವಾಪಾರ್‍ನ್ ವಿಕಾ ಮ್ಹಣ್ ಒಫರ್ ದಿಲ್ಯಾರೀ ರೆಸ್ಟೋರೆಂಟಾಚೆ ಕಾನ್ ದೀನಾಂತ್. ತಾಚೆ ಸರ್ವ್ ಉಪಾಯ್ ಸಲ್ವತಾತ್.

ತಾಣೆಂ ಹಟ್ ಸಾಂಡ್ಲೆಂನಾ, ತೊ ನಿರಾಸ್ ಜಾಲೊನಾ. ‘ಹಾಂವ್ ಮರೊಂಕ್ ತಯಾರ್, ಪುಣ್ ಸಲ್ವೊಂಕ್ ಸಾಧ್‌ಚ್ ನಾ’ ಅಶೆಂ ನಿಚೆವ್ ಕೆಲ್ಲೊ ತಾಣೆಂ. 1009 ಹೊಟ್ಲಾಂನಿ ತಾಕಾ ‘ನೋ’ ಮ್ಹಳ್ಳೆಂ. ಏಕ್ ದೀಸ್ ಕೆಂಟುಕಿಭಾಯ್ಲ್ಯಾ ಎಕಾ ರೆಸ್ಟೋರೆಂಟಾನ್ ‘ಯಸ್’ ಮ್ಹಳ್ಳೆಂ. ತೆಂ ಏಕ್ ಯಸ್ ಅಮೆರಿಕಾಚ್ಯಾ ಲೊಕಾಂನಿ ಕುಂಕಡ್ ಖಾಂವ್ಚಿ ರೀತ್, ಉಪ್ಯೋಗ್ ಕರ್‍ಚಿ ರೆಸಿಪಿ ಸಗ್ಳೆಂ ಬದ್ಲಿತಾ. ಸ್ಯಾಂಡರ್ಸ್ ನಿರಂತರ್ ಸಲ್ವಣಿ ಪಳೆಲ್ಲ್ಯಾಂಕ್ ಏಕ್ ಪ್ರೇರಣ್. ಪ್ರಾಯ್ ಜಾಲಿ ಮ್ಹಣ್ ವಾಕಿಂಗ್ ಸ್ಟಿಕ್ ಧರ್‍ತಲ್ಯಾಂಕ್ ಏಕ್ ಉತ್ಸಾಹ್. ಆನಿ ಉರ್‌ಲ್ಲೆ ದೀಸ್ ಕಿತ್ಲೆ ಮ್ಹಣ್ ಲೇಕ್ ಘಾಲ್ಚ್ಯಾಂಕ್ ಏಕ್ ಆಶಾವಾದ್. ಕೆ‌ಎಫ್‌ಸಿ ಇತ್ಲೆಂ ಫಾಮಾದ್ ಗೀ, ತಿ ಭಾರತೀಯ್ ಕಂಪೆನಿ ಮ್ಹಣ್ಚೆತಿತ್ಲೆ. ಸ್ಯಾಂಡರ್ಸ್ 1890 ಥಾವ್ನ್ 1980 ಪರ್ಯಾಂತ್ ಭರ್‍ತಿ 90 ವರ್‍ಸಾಂ ಜಿಯೆಲೊ. ಕೆ‌ಎಫ್‌ಸಿ ಕಂಪೆನಿಚೊ ಮುನಾಫೊ 2022 ಇಸ್ವೆಂತ್ ಸುಮಾರ್ 2.80 ಲಾಖ್ ಕೊರೊಡ್ ರುಪಯ್. ಪುಣ್ ಹಿ ಯಶಸ್ವಿ ಸ್ಯಾಂಡರ್ಸಾಕ್ ಮೆಳೊಂಕ್ ನಾ. ತಾಣೆಂ ಕರಿನಾತ್ಲಿಂ ಕಾಮಾಂ ನಾಂತ್. ಇನ್ಸೂರ್ ಏಜೆಂಟ್, ಇಂಜಿನ್ ಸೇಲ್ಸ್‌ಮ್ಯಾನ್, ಪೆಟ್ರೋಲ್ ಫಿಲ್ಲಿಂಗ್ ಸ್ಟೇಶನ್ ಒಪರೇಟರ್ ಇತ್ಯಾದಿ. ರಾಂದ್ಚಿ ತಾಚಿ ಪಿಸಾಯ್. ರಸ್ತ್ಯಾ ದೆಗೆರ್ ಕಬಾಬ್ ವಿಕ್ಚೆಬರಿ ತೊ ವಿಕ್ತಾಲೊ. ಯಶಸ್ವಿ ತಾಚ್ಯೆ ಬಗ್ಲೆಕ್ ಯೆತಾನಾ ವರ್‍ಸಾಂ ಸಾಟ್ ಮಿಕ್ವಲ್ಲಿಂ.

ಪುಣ್ ಜಯ್ತ್ ಜೊಡ್ಚೆಂ ಕಿಟಾಳ್ ಕಾಳ್ಜಾಂತ್ ಪೆಟೊನ್ ಆಸ್ಲೆಂ. ಮುಕಮಳಾಚ್ಯೊ ಮಿರಿಯೊ ಆಮಿ ಹಾಸ್ಲ್ಯಾಂವ್ ತರ್ ಪಯ್ಸ್ ಕರ್‍ಯೆತ್ ಬಗಾರ್ ಕ್ರೀಮಾ ಲಾವ್ನ್ ನ್ಹಯ್. ಆಮ್ಕಾಂ ಚಾಳೀಸ್ ಜಾತಾನಾ ‘ಅಯ್ಯೋ ಹಾಂವ್ ತೀಸಾರ್ ಆಸ್ಲೊಂ ತರ್…’ ಅಶೆಂ ಚಿಂತ್ತಾಂವ್. ಸಾಟಾಂಕ್ ಪಾವ್ತಾನಾ ಪನ್ನಾಸ್ ಜಾಲ್ಲಿಂ ತರ್ ಬರೆಂ ಆಸ್ತೆಂ ಅಶೆಂ ಸಪ್ಣೆತಾಂವ್. ತಾಣೆಂ ತಾಚ್ಯೆ ರೆಸಿಪಿಚೊ ಘುಟ್ ಸೊಡ್ನ್ ದೀಂವ್ಕ್ ನಾ. ಕೆ‌ಎಫ್‌ಸಿಕ್ ಸ್ಪರ್ಧೊ ದೀಂವ್ಕ್ ಹಾಟ್‌ಡಾಗ್, ಸೊಸೆಜ್, ಹ್ಯಾಮ್, ಬರ್ಗರ್ ಆಯ್ಲೆ ತರೀ ಹಾಚೆಮುಕಾರ್ ಠಿಕ್ಲೆನಾಂತ್. ಆಮ್ಚ್ಯಾ ಗಾಂವಾಂಕ್ ಅಮೆರಿಕಾಚಿಂ ಕುಂಕ್ಡಾಂ ಉಟೊನ್ ಯೇನಾಂತ್. ಭಾರತಾಚ್ಯಾ ಸೊಡ್ಯಾಂ ಮಂಗ್ಳುರಾಚ್ಯಾ ಕೆ‌ಎಫ್‌ಸಿಂತ್ ಕುಂಲಡ್ ಆಮ್ಚೆಂ, ಮಸಾಲೊ ಆಮ್ಚೊ, ಉಕಡ್ಚೆಂ, ರಾಂದ್ಚೆಂ ಆಮ್ಚ್ಯಾಚ್ ಮನ್ಶಾಂನಿ, ಪುಣ್ ರೆಸಿಪಿ ಮಾತ್ರ್ ಕೆ‌ಎಫ್‌ಸಿಚಿ! ತುಜ್ಯೆ ಯಶಸ್ವೆಚೆಂ ರಾಜ್ ಕಸಲೆಂ ಮ್ಹಣ್ ವಿಚಾರ್‍ಲಲ್ಯಾಕ್ ಸ್ಯಾಂಡರ್ಸ್ ಅಶೆಂ ಜಾಪ್ ದಿತಾ, “ಹಾಂವ್ ದೋನ್ ಸಂಗ್ತಿ ಪಾಳ್ತಾಂ. ತುಮಿ ಸಯ್ತ್ ತ್ಯೊ ಪಾಳ್ಳ್ಯೊ ತರ್ ಜಯ್ತ್ ತುಮ್ಚೆಂ. ಪಯ್ಲೆಂ, ತುಮ್ಕಾಂ ಖಂಯ್ಚೆಂ ಜಾಯ್ ತೆಂ ಕಾಮ್ ಕರಾ; ಪುಣ್ ಕರ್‍ಚೆಂ ಕಾಮ್ ದಿ ಬೆಸ್ಟ್ ಮ್ಹಳ್ಳೆಬರಿ ಕರಾ. ಹ್ಯಾ ಸಂಸಾರಾಂತ್ ಸರ್ವ್ ಸಮಾನ್. ಮನ್ಶಾಪಣ್ ಬೊವ್ ಗರ್ಜೆಚೆಂ. ದೇವ್ ಮನಿಸ್ ಜಾಲೊ ಮ್ಹಣ್ ಗಾಯ್ಲ್ಯಾರ್ ಪಾವನಾ. ಪೆಲ್ಯಾಥಂಯ್ ದೆವಾಕ್ ಪಳೆಯಾತ್” ಮ್ಹಣ್ತಾ ಸ್ಯಾಂಡರ್ಸ್. “ಹಾಂವ್ ಲಾರಿ ಡ್ರೈವರಾಕ್ ಜಾಂವ್, ಮಲ್ಟಿ ಮಿಲಿಯನಿಯರಾಕ್ ಜಾಂವ್ ಎಕಾಚ್ ಮೆಜಾಚೆರ್ ಖಾಂವ್ಕ್ ವಾಡ್ತಾಂ. ಕಾಳ್ಜಾಂಕ್ ವಚೊಂಕ್ ಪೊಟಾಂತ್ಲ್ಯಾನ್ ವಾಟ್. ಗಿರಾಯ್ಕ್ ಖುಶಿ ತರ್ ಹಾಂವ್ ದಾದೊಶಿ”. ತುಮ್ಕಾಂ ಸರ್ವಾಂಕ್ ನವ್ಯಾ ವರ್‍ಸಾಚೆ ಉಲ್ಲಾಸ್. ಕ್ಯಾಲೆಂಡರ್ ಬದ್ಲತಾ ಪುಣ್ ಖಿಳೊ ತೊಚ್. ವರಸ್ ಬದಲ್ತಾ ಪುಣ್ ತುಂ ತುಂಚ್!

✍️ –ಆಲ್ವಿನ್ ದಾಂತಿ, ಪೆರ್ನಾಲ್