ಪಾಟ್ಲ್ಯಾ ಅಕ್ಟೋಬರ್-ನವೆಂಬರ್ ಮ್ಹಯ್ನ್ಯಾಂನಿ ಸಗ್ಳ್ಯಾ ದೆಶಾಂತ್ ವಿಶ್ವಕಪ್ ಕ್ರಿಕೆಟ್ ಫೆಸ್ತ್ ದಬಾಜಾನ್ ಸಂಭ್ರಮ್ಲೆಂ. ಭಾರತೀಯ್ ಟೀಮಾಚೆಂ ಪ್ರದರ್ಶನ್ ಸಯ್ತ್ ಉಂಚ್ಲ್ಯಾ ಮಟ್ಟಾಚೆಂ ಆಸ್‌ಲ್ಲ್ಯಾನ್ ಕ್ರಿಕೆಟ್ ಪ್ರೇಮಿಂಚೊ ಜೋಶ್, ಮಾದ್ಯಮಾಂನಿ ದಿಲ್ಲೊ ಪ್ರಚಾರ್, ರಾಜಕಾರಣಿ ಆನಿ ಬಾಲಿವುಡ್ ಸೆಲೆಬ್ರಿಟಿಂನಿ ಸ್ಟೇಡಿಯಮ್ಮಾಂನಿ ಬಸೊನ್ ಟೀಮ್ ಇಂಡಿಯಾಕ್ ದಿಲ್ಲೊ ಪಾಟಿಂಬೊ ಪಳೆತನಾ ಭಾರತಾಂತ್ ಕ್ರಿಕೆಟ್ ಕೇವಲ್ ಖೆಳ್ ವಾ ಥೊಡ್ಯಾಂಚಿ ಆಸಕ್ತ್, ಅಭಿರೂಚ್ ನ್ಹಯ್, ಬಗಾರ್ ಆಮ್ಚ್ಯಾ ಲೊಕಾಕ್ ಲಾಗ್‌ಲ್ಲೆಂ ಏಕ್ ವಿಚಿತ್ರ್ ಪಿಶೆಂ ಮ್ಹಣ್ ಪರತ್ ರುಜು ಜಾಲೆಂ. ಜಶೆಂ ಆಮ್ಕಾಂ ವ್ಹಡ್ಲ್ಯಾ ಫೆಸ್ತಾಬರಿ ದುಸ್ರೆಂ ಖಂಯ್ಚೆಂಯ್ ಫೆಸ್ತ್ ನಾ, ತಶೆಂಚ್ ಕ್ರಿಕೆಟ್ ಪ್ರೇಮಿಂಕ್ ಇಂಡಿಯಾ ಆನಿ ಪಾಕಿಸ್ತಾನಾಚ್ಯಾ ಮ್ಯಾಚಾಕ್ ಸರಿ ಜಾಲ್ಲೆಂ ರೋಮಾಂಚನ್ ನಾ. ಕಿತ್ಯಾಕ್ ಆಮ್ಚೊ ದೇಶ್‌ಪ್ರೇಮ್ ಕಿತ್ಲೊ ಮ್ಹಣ್ ದಾಕೊಂವ್ಕ್ ಚಾರ್ ವರ್‍ಸಾಂಕ್ ಏಕ್ ಪಾವ್ಟಿಂ ಆವ್ಕಾಸ್ ದಿಂವ್ಚೊ ಹ್ಯಾಚ್ ಮ್ಯಾಚಾನ್.

ಮೋದಿ ಸ್ಟೇಡಿಯಮ್ಮಾಂತ್ಲೆಂ ನಾಲಿಸಾಯೆಚೆಂ ಘಡಿತ್: ಅಕ್ಟೋಬರ್ 14 ತಾರಿಕೆರ್ ಗುಜರಾತಾಚ್ಯಾ ಅಹಮದಾಬಾದ್ ಶ್ಹೆರಾಂತ್ಲ್ಯಾ ನರೇಂದ್ರ ಮೋದಿ ಸ್ಟೇಡಿಯಮ್ಮಾಂತ್ ಹ್ಯಾ ವಿಶ್ವಕಪ್‌ಚೆಂ, ಬೊವ್ ಆತುರಾಯೆನ್ ಅಭಿಮಾನಿಂನಿ ರಾಕೊನ್ ರಾವ್‌ಲ್ಲೆಂ ಇಂಡಿಯಾ ಆನಿ ಪಾಕಿಸ್ತಾನಾಚೆಂ ಮ್ಯಾಚ್ ಚಲ್ಲೆಂ. 1,32,000 ಲೋಕ್ ಸ್ಟೇಡಿಯಮ್ಮಾಂತ್ ಆನಿ ಕೊರೊಡಾಂನಿ ಲೋಕ್ ಟಿ.ವಿ.ಮುಕಾರ್ ಬಸೊನ್ ಹೆಂ ಮ್ಯಾಚ್ ಪಳೆವ್ನ್ ಆಸ್‌ಲ್ಲೊ. ಪಯ್ಲೆಂ ಬ್ಯಾಟಿಂಗ್ ಕರ್‍ನ್ ಆಸ್‌ಲ್ಲೆಂ ಪಾಕಿಸ್ತಾನ್ ಎಕಾ ಹಂತಾರ್ ಕೇವಲ್ ದೋನ್ ವಿಕೆಟ್ ಹೊಗ್ಡಾವ್ನ್ 150 ರನ್ ಕರ್‍ನ್ ಸುಸ್ಥಿತೆರ್ ಆಸ್‌ಲ್ಲೆಂ ತರೀ, ಎಕಾಚ್ಚಾಣೆಂ ವಿಕೆಟ್ಯೊ ಪಡೊಂಕ್ ಸುರು ಜಾಲ್ಯೊ. ಸ್ಟೇಡಿಯಮ್ಮಾಭಿತರ್ ಪದಾಂ ಖೆಳ್ತಲ್ಯಾ ಡಿ.ಜೆ.ನ್ ಆಯ್ಲೆವಾರ್ ಮೊಕ್ಳಿಕ್ ಜಾಲ್ಲ್ಯಾ ‘ಆದಿಪುರುಶ್’ ಪಿಂತೂರಾಚೆಂ ‘ರಾಮ್ ಸಿಯಾ ರಾಮ್’ ಲೌಡ್ ಸ್ಪೀಕರಾರ್ ವ್ಹಾಜೊಂವ್ಕ್ ಸುರು ಕೆಲೆಂ. ಕ್ರಿಕೆಟ್ ಅಭಿಮಾನಿಂಚೊ ಸಂಭ್ರಮ್ ಖಿಣಾಭಿತರ್ ಉದ್ವೇಗ್ ಜಾವ್ನ್ ಬದಲ್ಲೊ. ಆಪ್ಲಿ ವಿಕೆಟ್ ಹೊಗ್ಡಾವ್ನ್ ಪೆವಿಲಿಯನಾಕ್ ಪಾಟಿಂ ವಚೊನ್ ಆಸ್‌ಲ್ಲ್ಯಾ ಪಾಕಿಸ್ತಾನಾಚೊ ವಿಕೆಟ್ ಕೀಪರ್ ಮಹಮ್ಮದ್ ರಿಜ್ವಾನಾಕ್ ತುಕ್ಲಾವ್ನ್ ಮ್ಹಳ್ಳೆಬರಿ ಭಾರತೀಯ್ ಅಭಿಮಾನಿ ಜೈ ಶ್ರೀರಾಮ್, ಜೈ ಶ್ರೀರಾಮ್, ಮ್ಹಣ್ ಪ್ರಚೋದನ್‌ಕಾರಿ ರಿತಿನ್ ಬೊಬಾಟುಂಕ್ ಲಾಗ್ಲೆ. ಭಾರತೀಯ್ ಸರ್ಕಾರಾನ್ ವೀಸಾ ದಿಂವ್ಕ್ ನಾತ್‌ಲ್ಲ್ಯಾನ್, ಪಾಕಿಸ್ತಾನಿ ಅಭಿಮಾನಿಂಕ್ ಹೆಂ ಮ್ಯಾಚ್ ಪಳೆಂವ್ಕ್ ಯೇಂವ್ಕ್ ಆವ್ಕಾಸ್ ನಾತ್‌ಲ್ಲೊ. ಪುಣ್ ಹ್ಯಾ ಘುಡಿತಾಚೊ ವೀಡಿಯೊ ಸಂಸಾರ್‌ಭರ್ ವೈರಲ್ ಜಾಲೊ. ‘ಅತಿಥಿ ದೇವೊಭವ’ ಮ್ಹಣ್ ಸಯ್ರ್ಯಾಂಕ್ ದೆವಾಚೆಂ ಸ್ಥಾನ್ ದಿಲ್ಲಿ ಭಾರತೀಯ್ ಸಂಸ್ಕೃತಿ ಹ್ಯಾ ಎಕಾ ಘಡಿತಾಥಾವ್ನ್ ಜಾಗತಿಕ್ ಮಟ್ಟಾರ್ ವಿಣ್ಗಿ ಜಾಲಿ. ಇಂಡಿಯಾ ಮ್ಯಾಚ್ ಜಿಕ್ಲೆಂ ತರೀ ಮನ್ಶಾಪಣ್ ಸಲ್ವಾಲ್ಲೆಂ.

ಹ್ಯಾ ಘಡಿತಾಚೆಂ ಸಮರ್ಥನ್ ಕಿತ್ಲೆಂ ಸೊಂಪೆಂ? ಕೇಂದ್ರ್ ಗೃಹ್‌ಮಂತ್ರಿ ಆಮಿತ್ ಶಾ ಹೆಂ ಮ್ಯಾಚ್ ಪಳೆಂವ್ಕ್ ಸ್ಟೇಡಿಯಮ್ಮಾಂತ್ ಹಾಜರ್ ಆಸ್ತಾನಾಂಚ್ ಹೆಂ ಘಡಿತ್ ಘಡ್‌ಲ್ಲೆಂ ತರೀ ತಾಣೆಂ ಜಾಂವ್ ವಾ ಆಡಳ್ತೆಂ ಚಲೊಂವ್ಚ್ಯಾ ಬಿಜೆಪಿ ಪಾಡ್ತಿಚ್ಯಾ ಖಂಯ್ಚ್ಯಾಯ್ ಮುಕೆಲ್ಯಾನ್ ಜಾಂವ್ ಹಾಚ್ಯಾ ವಿರೋಧ್ ಏಕ್ ವಾಕ್ಮೂಲ್ ಸಯ್ತ್ ದೀಂವ್ಕ್ ನಾ. ತಮಿಳುನಾಡು ರಾಜ್ಯಾಚೊ ಖೆಳಾಮಂತ್ರಿ ಡಿ.ಎಮ್.ಕೆ. ಪಾಡ್ತಿಚ್ಯಾ ಉದಯನಿಧಿ ಸ್ಟಾಲಿನನ್ ಹ್ಯಾ ಘಡಿತಾಚೆಂ ಖಂಡನ್ ಕರ್‍ನ್, “ಕ್ರಿಕೆಟ್ ಲೊಕಾಕ್ ಸಾಂಗಾತಾ ಹಾಡ್ಚೆಂ ಹಾತೆರ್ ಜಾಯ್ಜೆ, ವಿಭಜಿತ್ ಕರ್‍ಚೆಂ ನ್ಹಯ್” ಮ್ಹಣ್ ಆವಾಜ್ ಉಟಯ್ಲೊ. ಅಂರರಾಶ್ಟ್ರೀಯ್ ಮಾದ್ಯಮಾಂನಿ ಹಿ ಖಬರ್ ಆವಾಜ್ ಕರ್‍ತಾನಾ ಉಜ್ವ್ಯಾ ಪಂಥೀಯ್ ರಾಜಕೀಯ್ ಪಾಡ್ತೆಂಚಿ ಟ್ರೋಲ್ ಆರ್ಮಿ ಸಮಾಜಿಕ್ ಜಾಳಿಜಾಗ್ಯಾಂನಿ ಹ್ಯಾ ಘಡಿತಾಚೆಂ ಸಮರ್ಥನ್ ಕರುಂಕ್ ಲಾಗ್ಲಿ. ‘ಜೈ ಶ್ರೀರಾಮ್ ಆಮ್ಚೆಂ ಧರ್ಮಿಕ್ ಘೋಶಣ್, ಆಮಿಂ ಪಾಕಿಸ್ತಾನಿ ಖೆಳ್ಗಾಡ್ಯಾಂಕ್ ಗಾಳಿ ಸೊವುಂಕ್ ನಾಂತ್. ತೆ ಮುಸ್ಲಿಮ್ ಖೆಳ್ಗಾಡಿ ಮ್ಯಾಚ್ ಜಿಕ್ಲೆಲ್ಯಾ ವೆಳಾರ್ ಖೆಳಾ ಮಯ್ದಾನಾರ್‌ಚ್ ನಮಾಜ್ ಕರ್‍ತಾತ್ ತರ್ ಆಮ್ಚ್ಯಾ ದೆಶಾಂತ್ ಆಮ್ಚೆಂ ಧರ್ಮಿಕ್ ಘೋಶಣ್ ಕರ್‍ಚ್ಯಾಂತ್ ಕಿತೆಂ ಚೂಕ್ ಆಸಾ?’ ಮ್ಹಣ್ ಸಬಾರಾಂನಿ ಅಭಿಪ್ರಾಯ್ ದಿಲಿ. ಅಸಲ್ಯಾ ಅಶೀರ್ ಚಿಂತ್ಪಾಚ್ಯಾ ಲೊಕಾಕ್ ಮ್ಹಜಿ ಜಾಪ್ ಅಶಿ. “ಖೆಳಾ ಮಯ್ದಾನಾಂತ್ ಧರ್ಮಿಕ್ ಆಚರಣಾಂಚಿ ಗರ್ಜ್ ಬಿಲ್ಕುಲ್ ನಾ. ಪುಣ್ ಥೊಡ್ಯಾ ಖೆಳ್ಗಾಡಾಂಚ್ಯಾ ರಗ್ತಾಂತ್ ಧರ್ಮ್ ಅಸೊ ಮಿಸ್ಳಲಾ ಕೀ, ತಾಂಕಾಂ ದೆವಾಚೊ ಉಡಾಸ್ ತವಳ್-ತವಳ್ ಯೆತಾ. ಚಡ್ತಾವ್ ಹಿಂದೂ ಖೆಳ್ಗಾಡಿ ಮಯ್ದಾನಾಕ್ ಪ್ರವೇಶ್ ಜೊಡ್ಚ್ಯಾ ಪಯ್ಲೆಂ ಹಾತಾಂತ್ ಮಾತಿ ಆಪಡ್ನ್ ವಾ ಗಳ್ಯಾಂತ್ ಆಸ್ಚ್ಯಾ ದೆವಾಚ್ಯೆ ತಸ್ವೀರೆಚೊ ಉಮೊ ಘೆತಾತ್ ತರ್, ಮುಸ್ಲಿಮ್ ಖೆಳ್ಗಾಡಿ ನಮಾಜ್ ಶಯ್ಲಿ ವಾಪಾರ್‍ನ್ ದೆವಾಚೊ ಉಡಾಸ್ ಕಾಡ್ತಾತ್. ಭಾರತಾಚೊ ಆದ್ಲೊ ಖೆಳ್ಗಾಡಿ ರಾಬಿನ್ ಉತ್ತಪ್ಪ ಏಕ್ ಕ್ರಿಸ್ತಾಂವ್ ಜಾವ್ನಾಸೊನ್ ಹರ್‍ಯೇಕ್ ಪಾವ್ಟಿಂ ಜಿಕ್ತಾನಾ ‘ಆನಂದ್ ಬಾಪಾ’ ಘುರ್‍ತ್ ಕಾಡ್ತಾಲೊ”. ಹ್ಯಾ ದಾಖ್ಲ್ಯಾಂನಿ ದಿಸೊನ್ ಯೆಂವ್ಚೊ ಖೆಳ್ಗಾಡ್ಯಾಂಕ್ ತಾಂಚ್ಯಾ ಧರ್ಮಾಚೆರ್, ದೆವಾಚೆರ್ ಆಸ್ಚೊ ಮೋಗ್. ಪುಣ್ ಮೋದಿ ಸ್ಟೇಡಿಯಮ್ಮಾಂತ್ ಘಡ್‌ಲ್ಲೆಂ ಘಡಿತ್ ಹೆರ್ ಧರ್ಮಾಂಚೆರ್ ಆಸ್ಚೊ ದ್ವೇಶ್ ದಾಕೊಂವ್ಚೆತಸಲೆಂ. ಫಾಲ್ಯಾಂ ವಿರಾಟ್ ಕೊಹ್ಲಿ ಪಯ್ಲ್ಯಾ ಬೊಲಾಕ್‌ಚ್ ಔಟ್ ಜಾವ್ನ್ ವೆತಾನಾ ಪಾಕಿಸ್ತಾನಿ ಅಭಿಮಾನಿಂನಿ ‘ಅಲ್ಲಾಹು ಅಕ್ಬರ್’ ಮ್ಹಣ್ ವಾ ಯುರೋಪಿಯನ್/ಆಸ್ಟ್ರೇಲಿಯನ್ ಲೊಕಾನ್ ‘ಅಲ್ಲೆಲೂಯಾ’ ಮ್ಹಣ್ ವಾ ತಾಚಿಂ ಖೆಳ್ಕುಳಾಂ ಕೆಲ್ಯಾರ್, ಅಸಲ್ಯಾ ಲೊಕಾಕ್ ಆನಿ ಧರ್ಮಿಕ್ ಮೂಳ್‌ಭುತ್‌ವಾದಿಂಕ್ ಕಸಲೊಚ್ ಫರಕ್ ನಾ.

ಆಮಿ ಒಳ್ಕೊಂಚೊ ಶ್ರೀರಾಮ್ ಕಿತ್ಲೊ ವೆಗ್ಳೊ : ಹ್ಯಾ ದೆಶಾಂತ್ ಜಲ್ಮೊನ್ ರಾಮಾಯಣ ಆನಿ ಮಹಾಭಾರತಾಚ್ಯೊ ಕಾಣಿಯೊ ಆಯ್ಕನಾತ್‌ಲ್ಲಿಂ ಕೊಣೀ ನಾಂತ್. ಥೊಡ್ಯಾಂಕ್ ಹೆ ಬೂಕ್ ಧರ್ಮಿಕ್ ಪವಿತ್ರ್ ಗ್ರಂಥ್, ಥೊಡ್ಯಾಂಕ್ ಪೌರಾಣಿಕ್ ಆನಿ ಚಾರಿತ್ರಿಕ್ ದಾಖ್ಲೆ, ಆನಿ ಆಮ್ಚೆತಸಲ್ಯಾಂಕ್ ಲ್ಹಾನ್ ಥಾವ್ನ್ ಆಯ್ಕಲ್ಲ್ಯೊ ಕಾಣಿಯೊ. ಆಮ್ಕಾಂಚ್ ಕಳನಾತ್‌ಲ್ಲೆಬರಿ ಹ್ಯಾ ಬುಕಾಂತ್ಲೆ ಪಾತ್ರ್-ಘಡಿತಾಂ ಆಮ್ಚ್ಯಾ ದಿಸ್ಪೊಡ್ತಾ ಕಾಮಾಂನಿ ಆನಿ ಉಲೊಂವ್ಚ್ಯೆ ಭಾಶೆಂತ್ ಭರ್‍ಸಲ್ಯಾಂತ್. ‘ತೊ ಬಕಾಸುರಾಬರಿ ಜೆವ್ತಾ’, ‘ತೆಂ ಶೂರ್ಪನಖಿ ತಶೆಂ ದಿಸ್ತಾ’, ‘ತೊ ಭೀಮಬರಿ ದಡಂಗ್ ಆಸಾ’, ‘ದಾನಶೂರ ಕರ್ಣಬರಿ ತಾಚ್ಯಾ ಬೊಲ್ಸಾಂತ್ ಏಕ್ ದೆಡ್ಕಿ ಆಸಾನಾ’ ಅಶೆಂ ಸಬಾರ್ ನಿದರ್ಶನಾಂ ಆಸಾತ್.

1987 ಇಸ್ವೆಂತ್ ದೂರ್‌ದರ್ಶನಾಚೆರ್ ರಮಾನಾಂದ್ ಸಾಗರ್‌ಚೆಂ ‘ರಾಮಾಯಣ’ ಪ್ರಸಾರ್ ಜಾತಾನಾ ಹರ್‍ಯೇಕ್ ಆಯ್ತಾರಾ ಸಕಾಳಿಂ ಹಿಂದೂ ಲೋಕ್ ನ್ಹಾಣ್ ಸಂಪೊವ್ನ್, ನಿತಳ್ ಜಾವ್ನ್ ಟಿ.ವಿ.ಕ್ ಫುಲಾಂ ಘಾಲ್ನ್ ತಾಚೆಮುಕಾರ್ ಬಸ್ತಲೊ ಕಂಯ್. ಕ್ರಿಸ್ತಾಂವ್ ಲೊಕಾಕ್ ಸಯ್ತ್ ಹ್ಯಾ ಕಾರ್ಯಕ್ರಮಾಚೆಂ ಪಿಶೆಂ ಆಸ್‌ಲ್ಲೆಂ ಮ್ಹಣ್ ಥೊಡ್ಯಾಂನಿ ಸಾಂಗ್ಚೆಂ ಹಾಂವೆಂ ಆಯ್ಕಲಾಂ. ಹಾಂತುಂ ದಾರಾ ಸಿಂಗಾನ್ ಖೆಳ್‌ಲ್ಲೊ ‘ಹನುಮಾನ್’ ಪಾತ್ರ್ ಆತಾಂಯ್ ಲೋಕ್ ಉಡಾಸ್ ಕಡ್ತಾ. ಮ್ಹಜ್ಯಾ ಬಾಳ್‌ಪಣಾರ್ ರಾಮಾಯಣ ಪುನರ್‌ಪ್ರಸಾರ್ ಜಾತಾನಾ, ತಾಚ್ಯಾ ಸಾಂಗಾತಾ ಸನ್ವಾರಾ-ಆಯ್ತಾರಾ ‘ದಯಾಸಾಗರ್’ ಮ್ಹಳ್ಳೆಂ ಕಾರ್ಯಕ್ರಮ್ ಜೆಜು ಕ್ರೀಸ್ತಾಚಿ ಜಿಣಿ ಲೊಕಾಕ್ ದಾಕೊಂವ್ಚೆಂ ಪ್ರೇತನ್ ತಶೆಂ ದೂರ್‌ದರ್ಶನಾಚೆರ್ ದಾಕಯ್ತಾಲೆ. ಹ್ಯಾ ದೋನ್ ಕಾರ್ಯಾಂಮದೆಂ ಮ್ಹಜಿ ವಿಂಚವ್ಣ್ ‘ರಾಮಾಯಣ’ ಜಾವ್ನಾಸ್‌ಲ್ಲೆಂ. ಹಾಚ್ಯಾ ಪಾಟ್ಲ್ಯಾನ್ ಧರ್ಮಿಕ್ ವಾ ಭಾವಾಡ್ತಾಕ್ ಸಂಬಂದ್ ಜಾಲ್ಲಿಂ ಕಾರಣಾಂ ನಾತ್‌ಲ್ಲಿಂ, ಬಗಾರ್ ಭುರ್ಗ್ಯಾಪಣಾರ್ ಗಂಭೀರ್ ಆನಿ ಸಿಂತಿಮೆಂತಾಳ್ ಶಿಕೊವ್ಣ್ ದಿಂವ್ಚ್ಯಾ ದಯಾಸಾಗರಾಚ್ಯಾಕೀ ಝುಜಾಂ, ಘೊಡೆ, ಹಸ್ತಿ, ರಾಕ್ಕೊಸ್, ಬಿಲ್ಲುಬಾಣ ಚಡ್ ರೋಚಕ್ ಆನಿ ಆಕರ್ಶಕ್ ಜಾವ್ನ್ ದಿಸ್ತಾಲಿಂ. ಅಶೆಂ ಪಯ್ಲೆಪಾವ್ಟಿಂ ಹಾಂವೆಂ ‘ಜೈ ಶ್ರೀರಾಮ್’ ಘೋಶಣ್ ಆಯ್ಕಾಲ್ಲೆಂ. ತಾಂತುಂ ದಾಕಯಿಲ್ಲೊ ಶ್ರೀರಾಮ ಧಯ್ರಾಧಿಕ್ ಪುಣ್ ತಿತ್ಲೊಚ್ ಮೊವಾಳ್. ರಾವ್ಳೆರಾಂತ್ ವಾಡ್‌ಲ್ಲೊ ರಾಯ್ ತರೀ, ರಾಣಾಂತ್ ಜಿಯೆಂವ್ಚ್ಯೆ ಶಬರಿ ನಾಂವಾಚ್ಯೆ ಎಕೆ ಪ್ರಾಯ್ವಂತ್ ಸ್ತ್ರೀಯೆಚ್ಯಾ ಗುಡ್ಸುಲಾಕ್ ಭೆಟ್ ದಿತಾ. “ರೂಚ್ ಆಸ್‌ಲ್ಲಿಂ ಫಳಾಂಚ್ ಶ್ರೀರಾಮಕ್ ದೀಜೆ” ಮ್ಹಳ್ಳ್ಯಾ ಇರಾದ್ಯಾನ್ ಶಬರಿನ್ ಚಾಬೊನ್ ದಿಲ್ಲಿಂ ಫಳಾಂ ಸಯ್ತ್ ಖುಶೆನ್ ಸ್ವೀಕಾರ್ ಕರ್‍ತಾ. ಆಪ್ಲಿ ಪತಿಣ್ ಸೀತಾಕ್ ಅಪಹರಣ್ ಕೆಲ್ಲ್ಯಾ ರಾವಣಾಚೊ ಭಾವ್ ವೀಭಿಶಣ ಮಾಫ್ ಮಾಗ್ತಾನಾ ತಾಕಾ ಭೊಗ್ಸುನ್ ಆಪ್ಲ್ಯಾ ಸಯ್ನಾಂತ್ ಜಾಗೊ ದಿಂವ್ಚೆಂ ಉದಾರ್‍ಪಣ್ ದಾಕಯ್ತಾ. ಹ್ಯಾ ತಾಚ್ಯಾ ಸಾದೆಪಣಾಕ್ ಲಾಗೊನ್ ತಾಕಾ ದರ್ಯೊ ಉತ್ರೊನ್ ಶ್ರೀಲಂಕಾಕ್ ವಚೊಂಕ್ ಸಾಕೊಂವ್ ಬಾಂದುಂಕ್ ಕುಮೊಕ್ ಕರ್‍ಚೆ ಮಾಂಕೊಡ್ ವಾ ವಾನರ ಸೇನೆ ಹರ್‍ಯೆಕಾ ಫಾತ್ರಾಚೆರ್ ‘ಜೈ ಶ್ರೀರಾಮ್’ ಮ್ಹಣ್ ಬರೊವ್ನ್ ದರ್ಯಾಂತ್ ಉಡಯ್ತಾತ್. ತಾಂಚಿ ಭಕ್ತ್ ಪಳೆವ್ನ್ ತೆ ಫಾತರ್ ಬುಡನಾಸ್ತಾನಾ ದರ್ಯಾಂತ್ ಉಪ್ಯೆವ್ನ್ ‘ರಾಮಸೇತು’ ನಿರ್ಮಾಣ್ ಜಾತಾ. ಸೀತಾಕ್ ಸೊಡೊಂವ್ಚ್ಯಾಕ್ ಝುಜ್ ಮಾಂಡ್ತಾನಾ, ಮತ್ ಚುಕೊನ್ ಪಡ್‌ಲ್ಲ್ಯಾ ಲಕ್ಶ್ಮಣಾಕ್ ವೊಕತ್ ಜಾಂವ್ಚೆಂ ಝಡ್ ಸಂಜೀವಿನಿ ಸೊಧುನ್ ಕಾಡ್ಚೆಂ ಕಾಮ್ ಹನುಮಾನಾಕ್ ವ್ಹಡ್ ಪಂಥಾಹ್ವಾನ್ ಜಾತಾ. ಝಡ್ ಖಂಯ್ಚೆಂ ಮ್ಹಣ್ ಸಮ್ಜನಾಸ್ತಾನಾ ಸಗ್ಳೊ ದ್ರೋಣಗಿರಿ ಪರ್ವತ್ ಹನುಮಾನ್ ಉಕಲ್ನ್ ಹಾಡ್ತಾನಾ ತಾಚ್ಯಾ ತೊಂಡಾರ್ ಯೆಂವ್ಚೆಂ ನಾಂವ್ ‘ಜೈ ಶ್ರೀರಾಮ್’. ಹಾಂಗಾಸರ್ ಜೈ ಶ್ರೀರಾಮ್ ಜೀವ್ ಲಗಡ್ ಕಾಡ್ಚೊ ನ್ಹಯ್, ಬಗಾರ್ ಜಿವಿತ್ ದಿಂವ್ಚ್ಯಾಚೊ ಸಂಕೇತ್. ಆಮಿ ಕಶೆಂ ‘ದೇವ್ ಬರೆಂ ಕರುಂ’, ‘ದೇವ್ ಬರೊ ದೀಸ್ ದೀಂವ್’ ಮ್ಹಳ್ಳಿಂ ಉತ್ರಾಂ ಕೊಂಕ್ಣೆಂತ್ ವಾಪಾರ್‍ತಾಂವ್, ತಶೆಂಚ್ ಉತ್ತರ್ ಭಾರತಾಚ್ಯಾ ಹಿಂದಿ ಭಾಶಿಕಾಂನಿ ಎಕಾಮೆಕಾ ಭೆಟ್ತಾನಾ-ಆದೇವ್ಸ್ ಮಾಗ್ತಾನಾ ನಿತಳ್ ಕಾಳ್ಜಾನ್ ‘ರಾಮ್ ರಾಮ್’ ಮ್ಹಣ್ಚಿ ರಿವಾಜ್ ಆಜೂನ್ ಚಾಲ್ತೆರ್ ಆಸಾ.

ಆಮಿ ಒಳ್ಕನಾತ್‌ಲ್ಲೊ ‘ಶ್ರೀರಾಮ್’ : ಕೆದಾಳಾ ಹ್ಯಾ ದೆಶಾಚ್ಯಾ ಥೊಡ್ಯಾ ದಿವ್ಳಾಂನಿ ರಾಜಕೀಯ್ ಪ್ರವೇಶ್ ಜಾಲೆಂ, ತ್ಯಾ ದಿಸಾ ಏಕ್ ವಿಭಿನ್ನ್ ಶ್ರೀರಾಮಾನ್ ಜಲ್ಮ್ ಘೆತ್ಲೊ. ಹಾಚ್ಯಾ ಜಲ್ಮ್‌ದಾತಾರಾಂನಿ ದ್ವೇಶ್ ಪಾಚಾರ್‍ಚೊ, ಅನ್ಯ್ ಧರ್ಮೀಯ್ ಲೊಕಾಕ್ ಕಾಂಟಾಳ್ಚೊ, ಅಮಾಯಕಾಂಚೆರ್ ಹಲ್ಲೊ ಕರ್‍ಚೊ, ಸಬಾರ್ ಸಂಸ್ಕೃತಿ ಬಗ್ಲೆಕ್ ದವರ್‍ನ್ ಹೊ ದೇಶ್ ಹಿಂದೂ ರಾಶ್ಟ್ರ್ ಜಾಯ್ಜೆ ಮ್ಹಳ್ಳೊ ವಾದ್ ಮಾಂಡ್ಚ್ಯಾ ಎಕಾ ಕೃತಕ್ ಶ್ರೀರಾಮಾಕ್ ಲೊಕಾಕ್ ಅರ್ಪಿಲೊ. ತಾಚ್ಯಾ ಉಪ್ರಾಂತ್ ಜಾಲ್ಲಿಂ ಘಡಿತಾಂ. ಪಳೆಯಾ, ಅಯೋಧ್ಯೆಂತ್ ರಾಮ್‌ಮಂದಿರ್ ನಿರ್ಮಾಣ್ ಜಾಯ್ಜೆ ಮ್ಹಣ್ ಲಾಲ್‌ಕೃಶ್ಣ ಆಡ್ವಾಣಿನ್ 1990 ಇಸ್ವೆಂತ್ ಪ್ರಾರಂಬ್ ಕೆಲ್ಲ್ಯಾ ರಥ್‌ಯಾತ್ರಾಂತ್ ‘ಜೈಶ್ರೀರಾಮ್’ ಘೋಶಣ್ ಫಾಮಾದ್ ಜಾಲೆಂ. ಹಾಚೊ ಪರಿಣಾಮ್ ಆಸೊ ಜಾಲೊ ಕೀ, ಉದ್ರಿಕ್ತ್ ಹಿಂದೂ ಪಂಗ್ಡಾನ್ ಕೋರ್ಟಾಚ್ಯಾ ತೀರ್ಪಾಕ್ ರಾಕನಾಸ್ತಾನಾ 1992 ಇಸ್ವೆಂತ್ ಬಾಬ್ರಿ ಮಸೀದ್ ಕೊಸ್ಳಾವ್ನ್ ಘಾಲ್ನ್ ‘ಜೈ ಶ್ರೀರಾಮ್’ ಮ್ಹಣ್ ಬೊಬಾಟುಂಕ್ ಲಾಗ್ಲೆ. ತೀನ್ ವರ್‍ಸಾಂ ಆದಿಂ ಟಾಟಾ ಕಂಪ್ಣೆಚ್ಯಾ ಅಧೀನ್ ಆಸ್ಚ್ಯಾ ‘ತನಿಶ್ಕ್’ ಜ್ಯುವೆಲ್ಲರಿ ಬ್ರ್ಯಾಂಡಾನ್ ಏಕ್ ಜಾಯ್ರಾತ್ ತಯಾರ್ ಕೆಲ್ಲೆಂ. ಏಕ್ ಮುಸ್ಲಿಮ್ ಸಾಸುಮಾಂಯೆನ್ ಆಪ್ಲ್ಯಾ ಹಿಂದೂ ಸುನೆಕ್ ಗುರ್‍ವಾರಿಕ್ ಧಾಡ್ಚೆಂ ದೃಶ್ಯ್ ಹಾಂತು ಆಸ್‌ಲ್ಲೆಂ. ಜಾಯ್ರಾತ್ ಮೊಕ್ಳಿಕ್ ಜಾತಚ್ ಹೆಂ ‘ಲವ್‌ಜಿಹಾದಾ’ಕ್ ಪ್ರೇರಣ್ ದಿಂವ್ಚೆಂ ಪ್ರೇತನ್ ಮ್ಹಣ್ ದೇಶ್‌ಭರ್ ‘ತನಿಶ್ಕ್’ ಶೋರೂಮಾಂಚೆರ್ ಥೊಡ್ಯಾ ಸಂಘಟನಾಂನಿ ದಾಢ್ ಘಾಲ್ನ್ ‘ಜೈ ಶ್ರೀರಾಮ್’ ಮ್ಹಣ್ ಕಿಂಕ್ರಾಟ್ಯೊ ಮಾರ್‍ತಾನಾ, ಹೆಂ ಜಾಯ್ರಾತ್‌ಚ್ ಕಂಪ್ಣೆನ್ ರದ್ದ್ ಕೆಲೆಂ. ಜಾಯ್ರಾತಾಚೊ ನೀಜ್ ಉದ್ದೇಶ್ ಆಸ್‌ಲ್ಲೊ ‘ಏಕತ್ವಂ’ ವಾ ಹಿಂದೂ-ಮುಸ್ಲಿಮ್ ಎಕ್ವಟ್. ಸಕ್ಕಡ್ ಸೊಡ್ನ್, 2019 ಇಸ್ವೆಂತ್ ಮೋದಿ ಸರ್ಕಾರ್ ದುಸ್ರ್ಯೆ ಆವ್ದೆಕ್ ವಿಂಚುನ್ ಆಯಿಲ್ಲ್ಯಾ ವೆಳಾರ್, ಪ್ರಜಾಪ್ರಭುತ್ವಾಚೆಂ ಮಂದಿರ್ ಮ್ಹಣ್ ಆಮಿ ಮಾನುನ್ ಘೆಂವ್ಚ್ಯಾ ಪಾರ್ಲಿಮೆಂಟ್ ಭವನಾಂತ್‌ಚ್ ಪರತ್ ‘ಜೈ ಶ್ರೀರಾಮ್’ ಆಯ್ಕೊಂಕ್ ಮೆಳ್ಳೆಂ. ಪಾರ್ಲಿಮೆಂಟ್ ಸಾಂದ್ಯಾಂನಿ ಪ್ರಮಾಣ್‌ವಚನ್ ಸ್ವೀಕಾರ್ ಕರ್‍ಚ್ಯಾ ವಗ್ತಾ ಹೆಂ ಘಡಿತ್ ಘಡ್ಲೆಂ. ಸಗ್ಲೆ ಧರ್ಮ್ ಸಮಾನ್ ಮ್ಹಣ್ ಅರ್ಥ್ ದಿಂವ್ಚೊ ‘ಜಾತ್ಯಾತೀತ್’ ಮ್ಹಳ್ಳೊ ಸಬ್ದ್ ದೆಶಾಚಿ ಬುನ್ಯಾದ್ ಘಾಲ್ಲ್ಯಾ ಮುಕೆಲ್ಯಾಂನಿ ಹ್ಯಾಚ್ ಪಾರ್ಲಿಮೆಂಟ್ ಭವನಾಂತ್ ಮಂಜೂರ್ ಕೆಲ್ಲೊ ಮ್ಹಳ್ಳೆಂ ವಿಪರ್ಯಾಸ್ ತಶೆಂ ಭೊಗ್ಲೆಂ. ಹಾಚ್ಯಾ ಶಿವಾಯ್ ಗೋರಕ್ಶಕ್ ಮ್ಹಣ್ ನೀಬ್ ದೀವ್ನ್ ಉಣ್ಯಾಸಂಖ್ಯಾತಾಂಚೆರ್, ದಲಿತ್ ಲೊಕಾಂಚೆರ್ ಹಲ್ಲೊ ಕರ್‍ತಾನಾ, ‘ಸಂಸ್ಕೃತಿಚೆ ರಾಕ್ವೊಲಿ’ ಮ್ಹಳ್ಳೆಂ ಮುಕ್ಡೆಂ ಘಾಲ್ನ್ ಪಾರ್ಕಾಂತ್ ಬಸ್‌ಲ್ಲ್ಯಾ ತರ್ನ್ಯಾ ಜೊಡ್ಯಾಂಕ್ ಮಾರ್‍ನ್-ಬಡಯ್ತಾನಾ, ಶಾರೂಖ್-ಆಮೀರ್ ಖಾನಾಚಿಂ ಫಿಲ್ಮಾಂ ಬ್ಯಾನ್ ಕರಿಜೆ ಮ್ಹಣ್ ಥಿಯೇಟರಾಂನಿ ಗಲಾಟೊ ಕರ್‍ತಾನಾ ಸಯ್ತ್ ಹ್ಯಾ ಕಾರ್ಯಕರ್ತಾಂಚೆಂ ತೆಂಚ್ ರಡ್ಣೆಂ – ‘ಜೈ ಶ್ರೀರಾಮ್’.

ಹ್ಯಾ ಕಾಳಾಚಿ ಗರ್ಜ್ ರಾಮರಾಜ್ಯ್: ದೆಶಾಕ್ ಸುಟ್ಕಾ ಮೆಳ್ತಾನಾ ರಾಶ್ಟ್ರಪಿತ ಮಹಾತ್ಮ ಗಾಂಧಿ, ಹಾಂಗಾ ರಾಮರಾಜ್ಯ್ ಸ್ಥಾಪನ್ ಜಾಂವ್ದಿ ಮ್ಹಣ್ ಸಪ್ಣೆಲ್ಲೊ. ಗಾಂಧಿಚ್ಯಾ ರಾಮರಾಜ್ಯಾಚೊ ನೀಜ್ ಅರ್ಥ್-ಸಮಾನತೆನ್ ಆನಿ ಭಾಂದವ್ಪಣಾನ್ ಭರ್‍ಲಲೊ ಮೌಲ್ಯಾಧಾರಿತ್ ದೇಶ್. ಆಮಿ ಭಾರತ್ ನಿರ್ಮಾಣ್ ಕರ್‍ನ್ 77 ವರ್‍ಸಾಂ ಜಾಲಿಂ ತರೀ ಖರ್‍ಯಾ ಭಾರತೀಯಾಂಕ್ ನಿರ್ಮಾಣ್ ಕರಿಜೆ ತರ್ ಆಜ್ ಗಾಂಧಿಚ್ಯಾ ರಾಮರಾಜ್ಯಾಚಿ ಗರ್ಜ್ ಆಸಾ. ಆಯ್ಲೆವಾರ್ ಜಾಲ್ಲ್ಯಾ ವಿಶ್ವಕಪ್ ಪಂದ್ಯಾಟಾಂತ್ ಭಾರತೀಯ್ ಟೀಮಾಚ್ಯೆ ಯಶಸ್ವೆಂತ್ ಪ್ರಧಾನ್ ಪಾತ್ರ್ ಘೆತ್‌ಲ್ಲೆ ಖೆಳ್ಗಾಡಿ ಮೊಹಮ್ಮದ್ ಶಮಿ ಆನಿ ಮೊಹಮ್ಮದ್ ಸಿರಾಜ್ ಮ್ಹಳ್ಳೆಂ ಸತ್ ಸ್ಟೇಡಿಯಮ್ಮಾಂನಿ ‘ಜೈ ಶ್ರೀರಾಮ್’ ಬೊಬಾಟ್ತಲ್ಯಾಂಕ್ ವಿಸ್ರಲಾಂ ತಶೆಂ ಭೊಗ್ತಾ.

ಏಕ್ ಚಾನಿಯೆಚಿ ಕಾಣಿ : ರಾಮಸೇತು ನಿರ್ಮಾಣ್ ಜಾತಾನಾ ಥಂಯ್ ಆಸ್‌ಲ್ಲೆ ಬಳಿಶ್ಟ್ ವಾಂದೊರ್, ಗೊರಿಲ್ಲಾ ಗಾತ್ರಾಚೆ ವಾನರ ಸಯ್ನಿಕ್ ವ್ಹಡ್-ವ್ಹಡ್ ಫಾತರ್ ಹಾಡ್ನ್ ರಾಸ್ ಘಾಲ್ತಾಲೆ ಕಂಯ್. ಹೆಂ ಪಳೆವ್ನ್ ಆಸ್‌ಲ್ಲ್ಯಾ ಏಕ್ ಲ್ಹಾನ್ ಚಾನಿಯೆಕ್ ಶ್ರೀರಾಮಾಕ್ ಕುಮೊಕ್ ಕರ್‍ಚೆಂ ಮನ್ ಜಾಲೆಂ. ಫಾತರ್ ವ್ಹಾವೊಂವ್ಚಿ ತಾಂಕ್ ತ್ಯೆ ಚಾನಿಯೆಕ್ ನಾತ್‌ಲ್ಲಿ. ಪುಣ್ ಆಪ್ಣಾಚೆಂಯ್ ಮ್ಹೆತೆರ್‌ಪಣ್ ಆಸೊಂದಿ ಮ್ಹಣ್ ದರ್ಯಾಚ್ಯಾ ಉದ್ಕಾಂತ್ ಆಪ್ಣಾಕ್ ಭಿಜೊವ್ನ್, ತಡಿರ್ ಆಸ್‌ಲ್ಲ್ಯೆ ತ್ಯೆ ರೆಂವೆಂತ್ ಲೊಳೊನ್, ಸಾಂಕೊವ್ ಬಾಂದ್ಚ್ಯಾ ಜಾಗ್ಯಾರ್ ಯೇವ್ನ್ ಆಪ್ಲೆಂ ಆಂಗ್ ಹಾಲೊವ್ನ್ ರೇಂವ್ ಪಾಪುಡ್ಚೆಂ ಕಾಮ್ ತಿ ಚಾನಿ ಕರುಂಕ್ ಲಾಗ್ಲಿ. ಹೆಂ ಪಳೆವ್ನ್ ಥಂಯ್ ಆಸ್‌ಲ್ಲೆ ಮಾಂಕೊಡ್ “ತುವೆಂ ಹಾಡ್ನ್ ಘಾಲ್ಲ್ಯೆ ರೆಂವೆಂತ್ ಕಿತ್ಲೊ ವ್ಹಡ್ ಸಾಂಕೊವ್ ಬಾಂದ್ಯೆತ್” ಮ್ಹಣ್ ಚಾನಿಯೆಚಿಂ ಖೆಳ್ಕುಳಾಂ ಕರುಂಕ್ ಲಾಗ್ಲೆಂ. ಹೆಂ ಸಕ್ಕಡ್ ಪಯ್ಸ್ ಥಾವ್ನ್ ಪಳೆವ್ನ್ ಆಸ್‌ಲ್ಲೊ ಶ್ರೀರಾಮ ತ್ಯೆ ಚಾನಿಯೆಕ್ ಆಪ್ಲ್ಯಾ ಹಾತಾಂತ್ ಘೆವ್ನ್, ತಾಚಿ ಪಾಟ್ ಪೊಶೆವ್ನ್ ಮ್ಹಣಾಲೊ ಕಂಯ್ “ಮ್ಹಜೆಂ ನಾಂವ್ ಹ್ಯಾ ಸಂಸಾರಾಂತ್ ಆಸ್ತಾ ಮ್ಹಣಸರ್ ತುವೆಂ ದಿಲ್ಲಿ ತಾಂಕಿಪುರ್‍ತಿ ಸೆವಾ ಲೋಕ್ ಉಡಾಸಾಂತ್ ದವರ್‍ತೊಲೊ”. ಅಶೆಂ ಜಾವ್ನ್ ಚಾನಿಯೆನ್ ಕೆಲ್ಲೆ ತೆಂ ಲ್ಹಾನ್ ಕಾಮ್ ಆಜ್ ಪರ್ಯಾಂತ್ ‘ಅಳಿಲು ಸೇವೆ’ ಮ್ಹಣ್ ಲೋಕ್ ಉಡಾಸ್ ಕಾಡ್ತಾ. ಚಾನಿಯೆಚ್ಯೆ ಪಾಟಿರ್ ಆಸ್ಚೆ ತೀನ್ ಗೀಟ್ ಶ್ರೀರಾಮಾಚ್ಯಾ ಬೊಟಾಂಚಿಚ್ ನಿಶಾನಿ ಮ್ಹಣ್ ಲೋಕ್ ಪಾತ್ಯೆತಾ. ಆಮ್ಕಾಂ ಹಿ ಏಕ್ ಕಾಣಿ ಜಾಂವ್ಕ್ ಪುರೊ. ಪುಣ್ ಹ್ಯೆ ಕಾಣಿಯೆಂತ್ ಜಿವಿತಾಚೆಂ ಸತ್ ಆಸಾ. ಶ್ರೀರಾಮಾಕ್ ತ್ಯೆ ಮನ್ಜಾತಿಥಂಯ್ ದೈವಿಕ್‌ಪಣ್ ದಿಸ್ಲೆಂ. ಆಮ್ಚ್ಯಾ ದೆಶಾಚ್ಯಾ ಲೊಕಾಕ್ ಪೆಲ್ಯಾಥಂಯ್ ದೆವಾಸ್ಪಣಾಚ್ಯಾಕೀ ಪಯ್ಲೆಂ ಮನ್ಶಾಪಣ್ ದಿಸ್‌ಲ್ಲ್ಯೆ ಘಡಿಯೆ ಗಾಂಧೀಜಿಚೆಂ ರಾಮರಾಜ್ಯಾಚೆಂ ಸಪಣ್ ನೀಜ್ ಜಾತೆಲೆಂ.

✍️ –ಮನೋಜ್ ಫೆರ್ನಾಂಡಿಸ್, ಕಿರೆಂ