“ತುಮ್ಚೆಂ ಅಸ್ತಿತ್ವ್ ಆನಿ ಅಸ್ಕತ್ಕಾಯ್ ತುಮ್ಚ್ಯೆ ಕುಟ್ಮಾಜಿಣಿಯೆಚೆರ್ ಹೊಂದೊನ್ ಆಸಾ. ಖಂಯ್ ತ್ಯಾಗ್, ಸಾಕ್ರಿಫಿಸ್ ಆಸಾ ತ್ಯಾ ಕುಟ್ಮಾಂತ್ ಖರ್‍ಯಾ ಮೊಗಾಚೊ ಅನ್ಭೋಗ್ ತುಮ್ಕಾಂ ಜಾತಾ. ಕುಟ್ಮಾಭಾಯ್ರ್ ಕೆದಿಂಚ್ ತೊ ಫಾವೊ ಜಾಂವ್ಚೊನಾ” (ಪಾಪಾ ಬೆನಿಡಿಕ್ಟ್ ಸೊಳಾವೊ). ಭುರ್ಗ್ಯಾಂಕ್ ಇಸ್ಕೊಲಾಂತ್ ವಸ್ತು ಪ್ರದರ್ಶನ್ ಆಸ್ತಾನಾ ತಶೆಂಚ್ ಕ್ರಿಸ್ಮಸ್ ಸಂದರ್ಬಾರ್ ಗರ್ದನಾಚೊ ಗೊಟೊ ಕರ್‍ಚೊ ಸ್ಪರ್ಧೊ ಆಸ್ತಾನಾ ಭುರ್ಗಿಂ ಥರ್ಮಾಕೊಲಾಚಿ ಸೊಭಿತ್ ಘರಾಂ ಕರ್‍ತಾತ್. ಭಾಯ್ಲ್ಯಾನ್ ತಿಂ ಪಳೆಂವ್ಕ್ ಸೊಭಿತ್ ದಿಸ್ತಾತ್. ತಿಂ ಘರಾಂ ಸೊಭಾಯೆಕ್ ಮಾತ್ರ್ ಆನಿ ತ್ಯಾ ಘರಾಂನಿ ಕೊಣಾಯ್ಕಿ ಜಿಯೆಂವ್ಕ್ ಅಸಾಧ್. ಘರ್ ಭಾಯ್ಲ್ಯಾನ್ ಸೊಭಿತ್ ದಿಸ್ಲ್ಯಾರ್ ಪಾವನಾ ತ್ಯಾ ಘರಾಂತ್ ರಾಂವ್ಚ್ಯಾ ಸಾಂದ್ಯಾಂಚೆಂ ಸಾಂಗಾತ್ಪಾಣ್ ತಶೆಂಚ್ ಎಕಾಮೆಕಾ ಮದ್ಲೊ ಬಾಂದ್ ಮಜ್ಬೂತ್ ಆಸೊಂಕ್ ಜಾಯ್. ಏಕ್ ಘರ್ ಘರಾಣೆಂ ಜಾಯ್ಜೆ ತರ್ ಸಕ್ಡಾಂಚೊ ಸಾಂಗಾತ್ ಗರ್ಜೆಚೊ. ಪ್ರಸ್ತುತ್ ಸಮಾಜೆಂತ್ ಘರಾಂ ರಾವ್ಳೆರಾಂ ಜಾಲ್ಯಾಂತ್ ಆನಿ ತ್ಯಾ ಘರಾಂನಿ ಮನ್ಶಾಂಚ್ಯಾಕೀ ಪೆಟ್ಯಾ-ಮಾಜ್ರಾಂಚೊ ಸಂಖೊ ಚಡ್ ಆಸಾ.

ಸಪ್ಟೆಂಬರ್ ೮ ತಾರಿಕೆರ್ ಮರಿಯೆಚೊ ಜಲ್ಮಾದೀಸ್ ಕುಟ್ಮಾಂ ಸಂಭ್ರಮ್ ಜಾವ್ನ್ ಆಚರಣ್ ಕರ್‍ತಾಂವ್. ಮೊಂತಿ ಸಾಯ್ಬಿಣ್ ಮ್ಹಳ್ಯಾರ್ ದೊಂಗ್ರಾಚಿ ಸಾಯ್ಬಿಣ್. ತಿ ಬಾಳ್‌ಮರಿಚ್ ಜಾಯ್ಜೆ ಮ್ಹಣ್ ನಾ. ಜೆರಾಲ್ ರಿತಿನ್ ಮೊಂತಿಫೆಸ್ತ್ ಮ್ಹಳ್ಯಾರ್ ಬಾಳ್ ಮರಿಯೆಚೆಂ ಫೆಸ್ತ್ ಮ್ಹಣ್ ಆಮಿ ಮಾನುನ್ ಘೆತ್ಲಾಂ; ಮುಂಬಯ್ ಆನಿ ಹೆರ್ ಜಾಗ್ಯಾಂನಿ ವೆಲಂಕಣಿ ಸಾಯ್ಬಿಣ್ ದವರ್‍ನ್ ತಿಕಾ ಮಾನ್ ಕರ್‍ತಾತ್ ಆನಿ ಸಂಭ್ರಮ್ ಚಲಯ್ತಾತ್. ಹೆಂ ಫೆಸ್ತ್ ಮಂಗ್ಳುರಿ ಕ್ರಿಸ್ತಾಂವಾಂಚಿ ಅಸ್ಮಿತಾಯ್ ದಾಕಯ್ತಾ. ದೆಕುನ್ ಹೆಂ ಫೆಸ್ತ್ ಆಮ್ಕಾಂ ಮೊಗಾಚೆಂ. ಪರ್ಗಾಂವಾಂತ್ ವಾ ಮಂಗ್ಳುರಾಭಾಯ್ರ್ ವಸ್ತಿ ಕರ್‍ಚ್ಯಾ ಮಂಗ್ಳುರ್‌ಗಾರಾಂಕ್ ‘ನವ್ಯಾ ಬೆಳಾಚೆಂ ಫೆಸ್ತ್’ ನವ್ಯಾ ಜಿವಾನ್ ಭರ್‍ತಾ ಆನಿ ಸಂಬಂದ್ ಫುಲಯ್ತಾ.

ಮೊಂತಿಫೆಸ್ತಾವಿಶಿಂ ಲಿತುರ್ಜಿಂತ್ ಜಾಂವ್ ವಾ ಕೆನರಾಚ್ಯೆ ಚರಿತ್ರೆಂತ್ ಜಾಂವ್ ಸ್ಪಶ್ಟ್ ಪುರಾವೆ ನಾಂತ್. ಪುಣ್ ಹ್ಯಾ ಫೆಸ್ತಾವಿಶಿಂ ಸಬಾರಾಂನಿ ಚಿಂತಪ್ ಆಟಯ್ಲಾಂ ಆನಿ ಸೊಧ್ನಾಂ ಕೆಲ್ಯಾಂತ್. ಮಂಗ್ಳುರಾಂತ್ ತವಳ್ ಆಸ್‌ಲ್ಲ್ಯಾ ಮಿಶನರಿಂನಿ ‘ಸುಗ್ಗಿ ಆನಿ ಚೊವ್ತೆಕ್’ ಕ್ರಿಸ್ತಾಂವ್ಪಣಾಚೆಂ ವೋಲ್ ಲಾಯ್ಲೆಂ. ದೊಂಗ್ರಾಚ್ಯೆ ಸಾಯ್ಬಿಣೆಚೆಂ ಫೆಸ್ತ್ ಕರುನ್ ತಿಕಾ ಫುಲಾಂ ಅರ್ಪಿಲಿಂ. ಫೆಸ್ತಾದಿಸಾ ಕೊಬುಯ್ ವಾಂಟ್ಲೊ. ಮಿಶನರಿಂನಿ ಸುಗ್ಗಿ ಆಚರಣ್ ಕರುಂಕ್ ಇನ್ಕಾರ್ ಕರುಂಕ್ ನಾ, ಕಿತ್ಯಾಕ್ ಮಂಗ್ಳುರಿ ಕ್ರಿಸ್ತಾಂವ್ ಚಡಾವತ್ ಕೃಶಿ ಲೋಕ್. ‘ಸುಗ್ಗಿ’ ಕೃಶಿಕಾಂಚೊ ಪ್ರಮುಕ್ ಸಂಭ್ರಮ್. ತಿಚ್ ಸುಗ್ಗಿ, ನವ್ಯಾ ಬೆಳಾಂಚೆಂ ಫೆಸ್ತ್ ವಾ ‘ನವೆಂ ಜೆಂವ್ಚೆಂ’ ಜಾಲೆಂ. ಮೊಂತಿ ಫೆಸ್ತಾಖಾತಿರ್‌ಚ್ ಆಳುಂ ದೆಂಟೊ, ಆಲ್ಸಾಂಡೆ, ಬೆಂಡಾಂ, ತೊವ್ಶಿ ರಾಂದುಂಕ್ ಧರ್‍ಲಿಂ ಆನಿ ಆಪಾಪ್ಲ್ಯಾ ಹಿತ್ಲಾಂತ್ ಜಾಲ್ಲಿ ಪ್ರಥಮ್ ರಾಂದ್ವಯ್ ಫೆಸ್ತಾದಿಸಾ ವಾಪಾರುನ್ ದೆವಾಕ್ ಆರ್ಗಾಂ ಪಾಟೊಂವ್ಕ್ ಉಲೊ ದಿಲೊ. ಭಾವಾಡ್ತ್ ಥಿರ್ ಕರ್‍ಚ್ಯಾ ಎಕಾಚ್ ಉದ್ದೇಶಾನ್ ಮಿಶನರಿಂನಿ ಇತ್ಲೆಂ ಸಕ್ಕಡ್ ಕೆಲೆಂ. ಸ್ಥಳೀಯ್ ಸಂಸಕೃತಿ ಕ್ರೀಸ್ತೀಕರಣ್ ಕರುನ್ ಲೊಕಾಂಚೊ ಭಾವಾಡ್ತ್ ಜಿವಾಳ್ ದವರ್‍ಲೊ. ಕೇವಲ್ ಮಾಗ್ಣೆಂ ಧ್ಯಾನ್ ನ್ಹಯ್ ಆಸ್ತಾಂ, ಕುಟ್ಮಾಸಂಬಂದ್ ಸದಾಂಚ್ ಜಿವಾಳ್ ಉರಜೆ ಮ್ಹಳ್ಳೆಂ ಚಿಂತಪ್ ತಾಂಚ್ಯೆ ಮತಿಂತ್ ಆಸ್‌ಲ್ಲೆಂ.

ಆಜ್ ಕುಟ್ಮಾಜಿಣಿ ಬದಲ್ಲ್ಯಾ. ವ್ಹಡ್ಲ್ಯಾ ಘರಾಂತ್ ಥೊಡಿಂಚ್ ಜಣಾಂ, ವಿವಿಂಗಡ್ ಕುಡಾಂನಿ ಜಿಯೆತಾಂವ್. ಮೊಬಾಯ್ಲಾನ್ ಆಮ್ಕಾಂ ಸರ್ವಾಂಕ್ ಖಾಸ್ಗಿಪಣಾಚ್ಯಾ ಕೊಟ್ಯಾಂತ್ ಬಂದಿ ಕೆಲಾಂ. ಆಮ್ಚೆಭೊಂವ್ತಿಂ ಗಾದೆ ನಾಂತ್. ಗಾದೆ ಆಸ್ಲ್ಯಾರೀ ಕಣ್ಶಿ ನಾ. ರಾಂದ್ವಯ್ ಕರುಂಕ್ ಜಾಗೊ ನಾ, ವೇಳ್‌ಯೀ ನಾ. ಆಜ್ ಸಬಾರಾಂಕ್ ಮಾಸ್-ಮಾಸ್ಳಿ ಜಾಯ್ಜೆ ಶಿವಾಯ್ ರಾಂದ್ವಯೆಚೆಂ ಜೆವಣ್ ರುಚನಾ. ಅಸಲ್ಯೆ ಪರಿಗತೆಂತ್ ಮೊಂತಿಫೆಸ್ತ್ ಏಕ್ ಭರ್ವಶಾಚೆಂ ಕೀರ್ಣ್ ಜಾಂವ್ಕ್ ಜಾಯ್. ಕುಟ್ಮಾಂಚ್ಯಾ ಸಾಂದ್ಯಾಕ್ ಸಾಂಗಾತಾ ಹಾಡುಂಕ್ ಮೊಂತಿಫೆಸ್ತ್‌ಚ್ ಜಾಯ್ಜೆ ಮ್ಹಣ್ ನ್ಹಯ್, ಪುಣ್ ಹೆಂ ಫೆಸ್ತ್ ಆಮ್ಚೊ ಆದ್ಲೊ ಉಗ್ಡಾಸ್ ಜಿವಾಳ್ ಕರ್‍ತಾ ಮಾತ್ರ್ ನ್ಹಯ್ ಕುಟ್ಮಾಜಿಣಿಯೆವಿಶಿಂ ಚಿಂತುಂಕ್ ಆವ್ಕಾಸ್ ಕರ್‍ನ್ ದಿತಾ. ಜೆಂ ಕಿತೆಂ ಆದಿಂ ಕರ್‍ನ್ ಆಸ್‌ಲ್ಲ್ಯಾಂವ್ ತೆಂ ಆತಾಂ ಆಮ್ಕಾಂ ಕರುಂಕ್ ಜಾಂವ್ಚೆಂನಾ ಕೊಣ್ಣಾ, ಪುಣ್ ಕುಟಮ್ ಎಕ್ವಟಿತ್ ದವ್ರುಂಕ್ ಪೆಚಾಡ್ಚೆಂ ಗರ್ಜ್. 

ಕುಟ್ಮಾಂತ್ ಚೆಡ್ವಾಂ ಭುರ್ಗ್ಯಾಂಚೊ ಜಾಗೊ ಕೊಣಾಚ್ಯಾನ್‌ಚ್ ಭರ್‍ತಿ ಕರುಂಕ್ ಜಾಯ್ನಾ. ಏಕ್ ಭಯ್ಣ್, ಪತಿಣ್ ಆನಿ ಆವಯ್ ಜಾವ್ನ್ ತಿಚೊ ನಿಸ್ವಾರ್ಥಿ ಮೋಗ್ ಹರ್‍ಯೆಕ್ಲೊ ಆಮಿ ಅನ್ಭೋಗ್ ಕರ್‍ನ್ ಆಸಾಂವ್. ತಿಕಾ ದುಕಯ್ಲ್ಯಾರ್ ಕೊಣೀ ವೊಗೊ ಬಸನಾ. ಮಣಿಪುರಾಂತ್ ಪಾಟ್ಲ್ಯಾ ಮ್ಹಯ್ನ್ಯಾಂತ್ ದೊಗಾಂ ಆದಿವಾಸಿ ಬಾಯ್ಲಾಂಕ್ ನಿರ್ವಸ್ತ್ರ್ ಕರ್‍ನ್ ಥಾಪ್ಡಾಂ ಮಾರ್‍ನ್ ವ್ಹರ್‍ಚೊ ವೀಡಿಯೊ ಅಂತರ್‌ರಾಶ್ಟ್ರೀಯ್ ಹಂತಾರ್ ಸಯ್ತ್ ಆವಾಜ್ ಉಟೊಂವ್ಕ್ ಸಕ್ಲಾ. ಸಂಸಾರ್‌ಭರ್ ಲೊಕಾನ್ ಹೆಂ ಘಡಿತ್ ಖಂಡನ್ ಕರುನ್ ನಿದೊನ್ ಪಡ್‌ಲ್ಲ್ಯಾ ಸರ್ಕಾರಾಕ್ ಜಾಗಯ್ಲಾಂ. ದಾದ್ಲ್ಯಾ ಭಾಶೆನ್ ಸ್ತ್ರೀಯಾಂಕ್‌ಯೀ ಸಮಾನ್ ಮಾನ್ ಗವ್ರವ್ ದೀಂವ್ಕ್ ಜಾಯ್‌ಚ್ ಮ್ಹಳ್ಳೆಂ ಸತ್ ಉಕ್ಲುನ್ ಧರ್‍ಲಾಂ.

ಆಜ್ ಸ್ವಾರ್ಥ್ ಆನಿ ಸ್ವಕೇಂದ್ರಿತ್ ಹೊರ್ಬೊಸಾನ್ ಪ್ರಕೃತಿ ನಾಸ್ ಕರ್‍ನ್ ಆಸಾಂವ್. ಪ್ರತ್ವಿ ಮ್ಹೆಳೊಂವ್ಚಿ, ಕಚ್ರ್ಯಾಚಿ ರಾಸ್ ಕರ್‍ಚಿ ರಿವಾಜ್ ಚಡೊನ್‌ಚ್ ಆಸಾ. ಆಜ್ ಪ್ರಕೃತೆಂತ್ ಆಮ್ಚ್ಯೆ ಪಿಳ್ಗೆಚೊ ವಾಂಟೊ ಆಮಿ ಎದೊಳ್‌ಚ್ ಖಾಲಿ ಕೆಲಾ ಆನಿ ಆತಾಂ ಆಮಿ ಕಿತೆಂ ವಾಪಾರುನ್ ಆಸಾಂವ್ ತೆಂ ಮುಕ್ಲ್ಯೆ ಪಿಳ್ಗೆಚ್ಯಾ ಹಕ್ಕಾಚೆಂ. ಆಜ್ ನವೆಂ ಬೆಳೆಂ ಹಾಡ್ನ್ ಕುಟ್ಮದಾರಾಂಸಾಂಗಾತಾ ನವೆಂ ಜೆವ್ತಾನಾ ಸೃಶೆಚೆರ್ ದೆವಾನ್ ವೊತ್‌ಲ್ಲ್ಯಾ ಆಶೀರ್ವಾದಾಂಚೊ ಉಡಾಸ್ ಕಾಡ್ಯಾಂ. ಪೃತ್ವಿ ರಾಕ್ಚಿ ಆನಿ ಸಾಂಬಾಳ್ಚೆಥಂಯ್ ಆಮ್ಚಿ ಜವಬ್ದಾರಿ ಮತಿಂತ್ ದವರ್‍ನ್ ಪ್ರಕೃತೆಚೊ ಪೋಸ್ ಕರುಂಕ್ ಮುಕಾರ್ ಸರ್‍ಯಾಂ.

ಸಮೇಸ್ತಾಂಕ್ ಕುಟ್ಮಾಸ್ಪಿರಿತಾನ್ ಭರ್‌ಲ್ಲೆಂ ಶಾಂತಿ ಸಮಾಧಾನಾಚೆಂ ಮೊಂತಿಫೆಸ್ತ್ ಮಾಗ್ತಾಂವ್.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್