ಆದ್ಲ್ಯಾ ಡಿಸೆಂಬರಾಂತ್ ಟಾಕಿಸಾಂನಿ ಮೊಕ್ಳಿಕ್ ಜಾಲ್ಲ್ಯಾ “ಆನಿಮಲ್” ಸಿನೆಮಾ ದೇಶ್‌ಭರ್ ಖಬಾರ್ ಜಾವ್ನ್ ’ಸೂಪರ್ ಹಿಟ್’ ಜಾಲೆಂ .ಸಗ್ಳ್ಯಾ ಸಿನೆಮಾಂತ್ ಝಗ್ಡೆಂ, ಹಿಂಸಾ, ಖುನಿ, ಸ್ತ್ರೀ ಶೋµಣ್, ದಗಲ್ಬಾಜ್ ತಸಲೆ ದೃಶ್ಯ್ ಮಾತ್ರ್ ನ್ಹಯ್ ಆಸ್ತಾಂ ಖೂಬ್ ಅಶ್ಲೀಲ್ ಆನಿ ಕಾಮುಕ್ ಸಂಬಂಧಿ ದೃಶ್ಯ್ ಜಾತಾ ತಿತ್ಲೆಂ ದಾಕಯ್ಲಾಂ. ಪುರುµ ಜಾಲ್ಲ್ಯಾನ್ ಕಿತೆಂಯ್ ಕರ್ಯೆತ್ ಮ್ಹಣ್ ಪ್ರತಿಪಾದ್ ಕರ್ಚ್ಯಾ ಹ್ಯಾ ಸಿನೆಮಾಂತ್ ಕಸಲೊ ಬರೊ ಸಂದೇಶ್ ಆಸಾ ಮ್ಹಣ್ ಸಿನೆಮಾ ನಿರ್ಮಾಣ್ ಕೆಲ್ಲೊ ಮಾತ್ರ್ ನೆಣಾ. ಫಕತ್ ಥೊಡು‌ಆಚ್ ಲೊಕಾಂನಿ ಪಿಂತುರಾಕ್ ಕಠೀಣ್ ರಿತಿನ್ ವಿಮರ್ಸೊ ಕರ್ನ್ ತಾಂತುನ್ ದಾಕಯ್ಲ್ಯಾ ತಳ್ಮಳಾಂವ್ಚ್ಯಾ ವಿಶಯಾಂಕ್ ವಿರೋಧ್ ಕೆಲ್ಲೆಂ ಶಿವಾಯ್ ಚಡಿತ್ ಜಣಾಂನಿ “ಸಿನೆಮಾ ಸಿನೆಮಾಚಾ ರಿತಿನ್ ಪಳೆಯ್ಜೆಯ್” ಮ್ಹಣ್ ಏಕ್‌ಚ್ ಉತ್ರಾಂನಿ ಪಿಂತುರಾಚೆ ಭಿತೆರ್ ದಾಕಯ್ಲ್ಯಾ ಹರ್ಯೆಕ್ ಅನ್ಯಾಯ್ ಆನಿ ಅನುಚಿತ್ ದೃಶ್ಯಾಂಕ್ ನಿರ್ಲಕ್ಷ ದಾಕಯ್ಲ್ಯಾ. ಸಾಮಾಜಿಕ್ ಜಾಳಿಜಾಗ್ಯಾಂನಿ ಹ್ಯಾ ಸಿನೆಮಾಕ್ ವಿರೋಧ್ ಕರ್ನ್ ಆಪ್ಲೆ ಅಭಿಪ್ರಾಯ್ ವ್ಯಕ್ತ್ ಕೆಲ್ಲ್ಯಾ ಹರ್ಯೆಕ್ಲಾಂಚಾ ಕಮೆಂಟ್ ಸೆಕ್ಷನಾಚಾ ಕುಶಿನ್ ನದರ್ ಘಾಲ್ಯಾರ್ ಥಂಯ್ಸರ್ ಸಿನೆಮಾಕ್ ವಿರೋಧ್ ಕೆಲ್ಲ್ಯಾ ವ್ಯಕ್ತಿಕ್ ಉತ್ತೇಜನ್ ದಿಲ್ಲಿಂ ಉತ್ರಾಂ ಮೆಳಾನಾಂತ್ ಬಗಾರ್ ತಸಲೆ “ಫೇಕ್ ಫೆಮಿನಿಸಂ”ಚೆ ಪೋಸ್ಟ್ ಘಾಲ್ಲ್ಯಾಕ್ ತ್ಯಾ ವ್ಯಕ್ತಿಕ್‌ಚ್ ಪೊಸ್ಡಿ ರಿಪ್ಲಾಯ್ ಘಾಲ್ಯಾ. ತ್ಯಾ ಸಿನೆಮಾಂತ್ ಆಸ್‌ಲ್ಲೆ ಅಶ್ಲೀಲ್ ದೃಶ್ಯ್ “ರೀಲ್ಸ್” ಚಾ ರೂಪಾಂತ್ ಫೇಸ್‌ಬುಕ್ ಆನಿ ಇನ್ಸ್ಟಾಗ್ರಾಮಾಂತ್ ಪಳೆಂವ್ಕ್ ಮೆಳ್ತಾ. ತಸಲ್ಯಾ ವಿಡಿಯೋಕ್ ಮಿಲಿಯನ್ ವೀವ್ಸ್. ಲಾಕಾಂನಿ ಲೋಕ್ ತ್ಯೊ ವೀಡಿಯೋ ಶೇರ್ ಕರ್ತಾತ್. ಜಾಯ್ತೆ ತ್ಯಾಚ್ ಸಿನೆಮಾಚ್ಯಾ ಪದಾಂಕ್ ನಾಚೊನ್ ರೀಲ್ಸ್ ಕರ್ನ್ ಘಾಲ್ನ್ ಆಸಾತ್. ಲೊಕಾಂಕ್ ಕಳನಾಸ್ತಾನಾಂಚ್ ಏಕಾ ಸಿನೆಮಾಚೆಂ ಪ್ರಭಾವ್ ತಾಂಚೆರ್ ಇತ್ಲೆ ಪಡ್ಲಾಂ ತರ್, ’ಸಿನೆಮಾ ಫಕತ್ ಸಿನೆಮಾ ಜಾವ್ನ್ ಪಳೆಯ್ಜೆಯ್’ ಮ್ಹಣ್ಚೆಂ ಉತರ್ ಲೊಕಾನಿಂ ಕಿತ್ಲೆಂ ಗಂಭೀರ್ ಜಾವ್ನ್ ಕಾಣ್ಘೆಲಾಂ?

ರಾಜ್ಯಸಭೆಂತ್ ಕಾಂಗ್ರೆಸ್ ರಾಜ್ಯಸಭಾ ಸದಸ್ಯ್ ರಣ್ಜೀತ್ ರಂಜನಾನ್ ಸೆನ್ಸಾರ್ ಮಂಡಳೆನ್ “ಆನಿಮಲ್” ತಸಲ್ಯಾ ಸಿನೆಮಾಕ್ ನಿರ್ಭಂದ್ ಕಿತ್ಯಾಕ್ ಘಾಲುಂಕ್ ನಾ ಮ್ಹಣ್ ಸವಾಲ್ ಕರ್ಚೆ ಸಾಂಗಾತಾ ಅಸಲಿಂ ಸಿನೆಮಾ ಸಮಾಜೆಕ್ ಕಶೆಂ ಮಾರಾಕ್ ಮ್ಹಣ್ ವಿವರಣ್ ದಿಲಾಂ. ಸೆನ್ಸಾರ್ ಮಂಡಳೆನ್ ಹ್ಯಾ ಸಿನೆಮಾಕ್ ’ಎ’ ಸರ್ಟಿಫಿಕೇಟ್ ದಿಲ್ಯಾ. ಪುಣ್ ಹಾಂತ್ಲೆ ನಾಜೊಕ್ತ್ಯಾ ದೃಶ್ಯಾಂಚೆರ್ ಕಾಂಯ್ಚ್ ಆಡ್ಕಳ್ ಘಾಲುಂಕ್‌ನಾ. . ಥಿಯೆಟರಾಂತ್ ಕಿತೆಂಗೀ ಆಟ್ರಾಂ ವರ್ಸಾಂ ಉತ್ರಾನಾತ್‌ಲ್ಲ್ಯಾ ಭುರ್ಗ್ಯಾಂಕ್ ಸಿನೆಮಾ ಪಳೆಂವ್ಕ್ ಅವ್ಕಾಸ್ ನಾ ಮ್ಹಣ್ ತಿಳ್ಸಿಲಾಂ. ಪುಣ್ ನೆಣ್ತುಲ್ಯಾ ಭುರ್ಗ್ಯಾಂ ಥಾವ್ನ್ ಧರ್‍ನ್ ಪ್ರಾಯ್ವಂತಾ ಮ್ಹಣಾಸರ್ ಸಕ್ಡಾಂಚಾ ಹಾತಿನಿಂ ಮೊಬಾಯ್ಲ್, ಲ್ಯಾಪ್‌ಟೋಪ್ ಆಸ್ಚ್ಯಾ ಕಾಳಾರ್ ಅಸಲಿ ಫಿಲ್ಮಾಂ ಓಟಿಟಿ ತಸಲ್ಯಾ ಮಾಧ್ಯಮಾಂನಿ ಪ್ರಸಾರ್ ಜಾತಾನಾ ಭುಗ್ಯಾಂಚ್ಯಾ ನದ್ರೆಕ್ ಅಸಲಿಂ ಪಿಂತುರಾಂ ಪಳೆಯ್ನಾಸ್ತಾನಾ ರಾವುಂಕ್ ಸಾಧ್ಯ್‌ಗೀ? ನೆಟ್ ಫ್ಲಿಕ್ಸ್, ಅಮೇಜಾನ್ ಪ್ರೈಮ್, ಡಿಸ್ನಿ, ಹೊಟ್ ಸ್ಟಾರ್, ಆಲ್ಟ್ ಬಾಲಾಜಿ, ವೂಟ್, ಜಿಯೋ ಸಿನೆಮಾ ತಸಲ್ಯಾ ಓಟಿಟಿ ಮಾಧ್ಯಮಾಂತ್ ಭಾರತ್ ಮಾತ್ರ್ ನ್ಹಯ್ ಆಸ್ತಾಂ ಸಗ್ಳ್ಯಾ ಸಂಸಾರಾಚಿಂ ಸಿನೆಮಾ, ಧಾರಾವಾಹಿ, ಡೊಕ್ಯುಮೆಂಟರಿ ಆನಿಂ ಸಬಾರ್ ಮನೋರಂಜನಾಚೊ ಶೋ ಪಳೆಂವ್ಕ್ ಮೆಳ್ತಾತ್. ಹೆಂ ಓಟಿಟಿ ಮಾಧ್ಯಮ್ ಖಂಚ್ಯೆಯ್ ಸಾಗೊರಾಕ್ ಉಣೆ ನಾ.

ಓಟಿಟಿ ಮಾಧ್ಯಮಾಂತ್ ಪ್ರಸಾರ್ ಜಾಂವ್ಚ್ಯಾ ಕಾರ್ಯಕ್ರಮಾಂಕ್ ನಿಯಂತ್ರಣ್ ಕರುಂಕ್ ’ಸೆನ್ಸಾರ್’ ಮಂಡಳಿಕ್ ಅಧಿಕಾರ್ ನಾ. ವ ಓಟಿಟಿ ಮಾಧ್ಯಮಾಂಚ್ಯಾ ನಿಯಂತ್ರಣಾ ಖಾತಿರ್ ಭಾರತಾಂತ್ ವೆಗ್ಳೆಂಚ್ ಕಾನೂನಾಚೆಂ ರಚನ್ ಜಾವ್ನಾ. ಓಟಿಟಿಂತ್ ದಾಕಂವ್ಚ್ಯಾ ಕಾರ್ಯಕ್ರಮಾಕ್ ನಿಯಂತ್ರಣ್ ಕರ್ಚೆಂ ಹಕ್ಕ್ ಸಂಪೂರ್ಣ್ ಜಾವ್ನ್ ಓಟಿಟಿ ಮಾಲಿಕಾಂಚೆ ವ ಓಟಿಟಿ ಮಾಧ್ಯಮಾಂತ್ ಸಿನೆಮಾ/ಧಾರಾವಾಹಿ ಪ್ರಸಾರ್ ಕರ್ತಾಲ್ಯಾಂಚೆ ಹಾತಾಂತ್ ಆಸ್ತಾ. ಭಾರತ್ ಸರ್ಕಾರಾನ್ ಓಟಿಟಿ ಮಾಧ್ಯಮಾಂತ್ ಕಾರ್ಯಕ್ರಮಾ ಪ್ರಸಾರ್ ಕರ್ತಾನಾ ಅಶ್ಲೀಲ್ ದೃಶ್ಯಾಂಚೆರ್ ನಿಯಂತ್ರಣ್ ದವರ್ನ್ ಶಿಸ್ತ್ ಸಾಂಬಾಳುಂಕ್ ತಾಕಿದ್ ದಿಲ್ಯಾ. ಹ್ಯಾಚ್‌ವಿಶಿಂ ಥೊಡ್ಯಾ ಮಹಿನ್ಯಾ ಪಯ್ಲೆಂ ಮಾಹೆತ್ ಆನಿ ಪ್ರಸಾರ್ ಮಂತ್ರಿ (ministry of information and broadcasting) ಅನುರಾಗ್ ಠಾಕೋರಾನ್ ಓಟಿಟಿ ಮಾಧ್ಯಮಾಂಕ್ ಉದ್ದೇಶುನ್ “ಓಟಿಟಿ ಮಾಧ್ಯಮಾಂನಿ ಕ್ರಿಯಾಶೀಲತಾ ದಾಕಯ್ಜೆ ಶಿವಾಯ್ ಅಶ್ಲೀಲತಾ ನ್ಹಯ್” ಮ್ಹಣ್ ಅಭಿಪ್ರಾಯ್ ದಿಲ್ಯಾ.

ಓನ್‌ಲಾಯ್ನಿರ್ ಪ್ರಸಾರ್ ಕರ್ತಾನಾ ಅಶ್ಲೀಲ್ ವಾ ವಿವಾದಾತ್ಮಕ್ ದೃಶ್ಯ್ ತಿದ್ವಣಿ ಕರುಂಕ್ ಓಟಿಟಿ ಮಾಧ್ಯಮಾಂ ಆಡ್ಕಳಿ ಭೊಗುನ್ ಆಸಾತ್. ಜಾಯ್ತಿಂ ಅಂತಾರಾಷ್ಟ್ರೀಯ್ ಸಿನೆಮಾ, ಟಿವಿ ಕಾರ್ಯಕ್ರಮಾ ಆನಿ ಧಾರಾವಾಹಿ ಭಾರತಾಚಾ ಪರಿಸ್ಥಿತಿ ಆನಿ ಭಾರತೀಯಾಂಚಾ ಮನೋಸ್ಥಿತಿಕ್ ಸಾರ್ಕೆಂ ಜಾವ್ನ್ ನಿರ್ಮಾಣ್ ಜಾವ್ನ್ ಆಸನಾ. ಪುಣ್ ಓಟಿಟಿ ಮಾಧ್ಯಮಾಂಚೆ ಸಿನೆಮಾ/ ಧಾರಾವಾಹಿ ನಿರ್ಮಾಣ್ಕಾರಾಂಚ್ಯಾ ಸಾಂಗಾತಾ ’ಸಗ್ಳೆ ಸಿನೆಮಾ/ಧಾರಾವಾಹಿ’ ಪ್ರಸಾರ್ ಕರ್ಚ್ಯಾ ಕರಾರಾಕ್ ಸಹಿ ಘಾಲ್ನಾಸ್ತಾತ್ ದೆಕುನ್ ಥೊಡೆ ದೃಶ್ಯ್ ಕಾಡುಂಕ್ ಖುದ್ದ್ ಸರ್ಕಾರಾ ಥಾವ್ನ್ಸಾರ್ವಜನಿಕಾಂ ಥಾವ್ನ್ ಫಿರ್ಯಾದ್ ಯೆಂವ್ಚ್ಯಾ ಶಿವಾಯ್ ತಾಣಿ ಪ್ರಸಾರ್ ಕರ್ಚ್ಯಾಂತ್ ಕಾಂಯ್ಚ್ ಆಡ್ಕಳಿನಾಂತ್. ಏಕ್‌ಚ್ ಸಿನೆಮಾ ವ ಧಾರಾವಾಹಿ ಸಬಾರ್ ಓಟಿಟಿ ಮಾಧ್ಯಮಾಂನಿ ಪ್ರಸಾರ್ ಜಾಂವ್ಚೆ ಸಾಧ್ ಆಸ್ತಾ. ಏಕ್ ಎಪ್ಲಿಕೇಶನ್ನಾಂತ್ ಥೊಡೆ ದೃಶ್ಯ್ ಕಾಡ್ನ್ ಆಸ್ಲ್ಯಾರ್ ಅನ್ಯೇಕ್ ಎಪ್ಲಿಕೇಶನಾಂತ್ ತೆ ದೃಶ್ಯ್ ಆಸಾ ತಶೆಂ ಪ್ರಸಾರ್ ಜಾತಾ.  ಸಿನೆಮಾ ಥಿಯೇಟರ್ ಆನಿ ಟಿವಿಂತ್ ಥೊಡೆ ದೃಶ್ಯ್ ಕಾಡ್ತಾತ್ ಮ್ಹಳ್ಳ್ಯಯಾ ಕಾರಣಾಕ್ ಓಟಿಟಿಂತ್ ಸಿನೆಮಾ ಪಳಂವ್ಚೆ ಬುದ್ವಂತ್ ಲೊಕಾಂಕ್ ಕಾಂಯ್ ಸಮಸ್ಸೊ ನಾ. ಎಕಾ ಎಪ್ಲಿಕೇಶನಾಂತ್ ಏಕ್ ಸಿನೆಮಾಚೆ ಥೊಡೆ ದೃಶ್ಯ್ ನಾ ತರ್ ಖಂಚ್ಯಾ ಎಪ್ಲಿಕೇಶನಾಂತ್ ತೆ ದೃಶ್ಯ್ ಆಸಾತ್ ಥಂಯ್ಸರ್ ವಚುನ್ ತೆಂ ಫಿಲ್ಮ್ ಪಳೆವ್ಯೆತ್. 2021 ಇಸ್ವೆಂತ್ ಓಟಿಟಿ ಮಾಧ್ಯಮಾಂಚೆರ್ ನಿಯಂತ್ರಣ್ ಘಾಲುಂಕ್ Information Technology(Intermeidary Guideline and Digital Media Ethics Code) ಖuಟes ಜ್ಯಾರಿಕ್ ಹಾಡ್ಲೆಂ ತರೀ ತಾಂತ ಖಂಚೆ ದೃಶ್ಯಾಂಕ್ ಆಡ್ಕಳ್ ಘಾಲಿಜಾಯ್ ಆನಿ ಖಂಚ್ಯಾಂಕ್ ಘಾಲುಂಕ್ ನ್ಹಜೊ ಮ್ಹಣ್ ಸ್ಪಶ್ಟ್ ನಾ.

ಒನ್ಲಾಯ್ನ್ ಮ್ಹಳ್ಳ್ಯಾ ಮಹಾ ಸಾಗೊರಾಂತ್ ಫಕತ್ ಓಟಿಟಿ ಎಪ್ಲಿಕೇಶನಾಂತ್ ಮಾತ್ರ್ ನ್ಹಯ್ ಆಸ್ತಾಂ ಫೇಸ್‌ಬುಕ್, ಇನ್ಸ್ಟಾಗ್ರಾಮ್ ತಸಲ್ಯಾ ಮಾಧ್ಯಮಾಂನಿ ಜಾಯ್ತಿಂ ಸಿನೆಮಾ ಆನಿ ಧಾರಾವಾಹಿಚೆಂ ವಿವಾದಾತ್ಮಕ್ ದೃಶ್ಯ್ ಪ್ರಸಾರ್ ಜಾತಾತ್ ಆನಿಂ ಸೆಕುಂಡಾ ಭಿತೆರ್ ಶೇರ್ ಜಾತಾತ್. ಹ್ಯಾ ಸಾಮಾಜಿಕ್ ಜಾಳಿಜಾಗ್ಯಾಂಚೆ ಅಲ್ಗೊರಿದಂ ಕಶೆಂ ಆಸ್ತಾ ಮ್ಹಳ್ಯಾರ್ ಏಕ್ ತಸಲೊ ವೀಡಿಯೊ ಉಗ್ತೊ ಜಾಲ್ಯಾರ್ ಸಾಂಕಾಳಿ ರುಪಾರ್ ತಸಲ್ಲ್ಯೊಚ್ ವೀಡಿಯೊ ಪಳೆಂವ್ಕ್ ಮೆಳ್ತಾತ್. ಸಾಮಾಜಿಕ್ ಜಾಳಿಜಾಗ್ಯಾಂನಿ ತಸಲ್ಯಾ ದೃಶ್ಯಾಂಕ್ ’ರಿಪೋರ್ಟ್’ ಕರುಂಕ್ ಆವ್ಕಾಸ್ ಆಸ್ತಾ ತರೀ ಕಿತ್ಲೆ ಜಣ್ ರಿಪೋರ್ಟ್ ಕರ್‍ತಾತ್? ಕಿತ್ಲೆ ಪಾವ್ಟಿ ಕರ್‍ತಾತ್? ಹೆಂ ಭುರ್ಗ್ಯಾಂಚೆರ್ ಆನಿ ತರ್ನಾಟ್ಯಾಂಚೆರ್ ಪಾಡ್ ಪ್ರಭಾವ್ ಕರಿನಾಸ್ತಾನಾ ರಾವಾತ್‌ಗೀ? ಓಟಿಟಿ ಮಾಧ್ಯಮಾಂಕ್‌ಚ್ ನಿಯಂತ್ರಣಾಕ್ ಹಾಡುಂಕ್ ಕಶ್ಟ್ ಜಾತಾ ತರ್ ಸರ್ಕಾರ್ ಅಸಲ್ಯಾ ವಿಶಯಾವಿಶಿಂ ಕೆದಾಳಾ ಚಿಂತುಂಕ್ ಪ್ರಾರಂಭ್ ಕರಿತ್? ಆಜ್ ’ಆನಿಮಲ್’ ತಸಲೆ ಸಿನೆಮಾಕ್ ಶಾಭಾಸ್ಕಿ ದಿಂವ್ಚೊ ಲೊಕಾಂಚೊ ಸಮುದಾಯ್ ಮುಕಾರ್ ಅತ್ಯಾಚಾರ್ ತಸಲಿಂ ಆನಿಕೀ ವಾಯ್ಟ್  ಪರಿಣಾಮ್ ಹಾಡ್ಚಿಂ ಸಿನೆಮಾಕ್ ಪ್ರೋತ್ಸಾಹ್ ದಿಂವ್ಚೊನಾಂಗೀ?

ಭಾರತ್ ತಸಲ್ಯಾ  ದೇಶಾಂತ್ ’ನಿರ್ಭಯಾ’, ’ಆಸೀಫಾ’, ’ಉನ್ನಾವೊ’ ತಸಲೆ ಪ್ರಕರಣ್ ಘಡ್ಲ್ಯಾತ್ ಆನಿಕೀ ಘಡುನುಂಚ್ ಆಸಾತ್.  ಥೊಡ್ಯೊ ಖಬ್ರೊ ಉಜ್ವಾಡಾಕ್ ಯೆತಾತ್ ಆನಿ ಥೊಡೆ ಲಿಪ್ತಾತ್. ಅನ್ಯಾಯ್ ಜಾಲ್ಲ್ಯಾಂನಿ ನ್ಯಾಯ್ ಮೆಳ್ಚ್ಯಾಕ್ ಆಪ್ಲಿ ಜಿಣಿ ಝರೊನ್ ಆಸಾತ್. ಆಜೂನೀ ಸ್ತ್ರೀಯೋ ಘರಾ ಥಾವ್ನ್ ಭಾಯ್ರ್ ಯೆಂವ್ಕ್ ಭಿಯಂವ್ಚೆ ತಸಲಿ ಪರಿಸ್ಥಿತಿ ಆಸಾ. ಅಸಲ್ಯಾ ದೇಶಾಂತ್ ಸಿನೆಮಾ/ ಧಾರಾವಾಹಿ ಪ್ರಸಾರ್ ಕರ್ತಾನಾ ತಾಂತು ದಾಕಂವ್ಚೆ ದೃಶ್ಯಾಂಕ್ ಪಾರ್ಕುನ್ ಪಳೆಂವ್ಚಿ ಗರ್ಜ್ ಆಸಾ. ಹ್ಯೊ ಸಂಗ್ತಿ ನಿಯಂತ್ರಣಾಕ್ ಹಾಡ್ಚ್ಯಾಕ್ ಸರ್ಕಾರ್ ಕೆದಾಳಾ ಜಾಗೊ ಜಾತಾ ತೆಂ ರಾಕೊನ್ ಪಳೆಯ್ಜೆ.

–ಮುದ್ದು ತೀರ್ಥಹಳ್ಳಿ