ಕಾಜಾರ್ ಜಾವ್ನ್ 10 ವರ್‍ಸಾಂ ಉಪ್ರಾಂತ್ ಗರ್ಬೆಸ್ತ್ ಜಾಲ್ಲ್ಯಾ ತಿಚೊ ಸಂಭ್ರಮ್ ಸಾಂಗ್ಚೊ ನ್ಹಯ್. ಎಕಾ ಭುರ್ಗ್ಯಾಚ್ಯಾ ದೆಣ್ಯಾಪಾಸತ್ ತಿಣೆಂ ಕರಿನಾತ್‌ಲ್ಲೆಂ ವೊಕತ್ ನಾ, ಮಾಗನಾತ್‌ಲ್ಲೊ ಸಾಂತ್ ನಾ. ಮಾಗ್ಣೆಂ, ವೊಕತ್ ಆನಿ ಅಜ್ಯಾಪ್ ಸಾಂಗಾತಾ ಯೇವ್ನ್ ಮ್ಹಳ್ಳೆಬರಿ ತಿಕಾ ಭುರ್ಗ್ಯಾಚೆಂ ದೆಣೆಂ ಲಾಬ್‌ಲ್ಲೆಂ. ೨೦ ಹಫ್ತೆ ಭರ್‍ತಿ ಜಾತಾನಾ ಹರ್‍ಯೇಕ್ ಗರ್ಬೆಸ್ತ್ ಸ್ತ್ರೀಯೆನ್ ಕರುಂಕ್ ಆಸ್ಚೆಂ Anomaly Scan ಕರ್‍ನ್ ರಿಪೋರ್ಟ್ ಹಾತಿಂ ಧರ್‍ತಾನಾ ತಿಚ್ಯಾ ಪಾಂಯಾಂಪಂದ್ಲಿ ಧರ್‍ಣ್ ಕೊಸಾಳ್‌ಲ್ಲಿ. 20 ಹಫ್ತ್ಯಾಂನಿ ಭುರ್ಗ್ಯಾಚ್ಯಾ ಮೆಂದ್ವಾಂತ್ ಜಾಯ್ಜೆ ಜಾಲ್ಲಿ ವಾಡಾವಳ್ ಜಾಯ್ನಾಸ್ತಾಂ, ಭುರ್ಗ್ಯಾಚ್ಯಾ ಮೆಂದ್ವಾಚೆಂ ವಿಭಜನ್ ಜಾಂವ್ಕ್ ನಾತ್‌ಲ್ಲೆಂ. ದೆಕುನ್ ದಾಕ್ತೆರಾನ್ ತಿಕಾ ಭುರ್ಗ್ಯಾಕ್ ಗರ್ಬಾಪಾತ್ ಕರಯ್ಜೆ (ವಾ medical termination of pregnancy) ಮ್ಹಣ್ ಸಲಹಾ ದಿಲ್ಲಿ. ಇತ್ಲ್ಯಾ ವರ್‍ಸಾಂ ಉಪ್ರಾಂತ್ ಭುರ್ಗ್ಯಾಚ್ಯಾ ಯೆಣ್ಯಾಕ್ ರಾಕೊನ್ ಆತಾಂ ಜಾಂವ್ಕ್ ಆಸ್ಚೆಂ ಭುರ್ಗೆಂಯ್ ಕಾಡಯ್ಜೆ ಮ್ಹಣ್ತಾನಾ ಸಗ್ಳೆಂ ಕುಟಮ್ ಕಂಗಾಲ್ ಜಾವ್ನ್ ಗೆಲ್ಲೆಂ.

Medical termination ವಾ ವಯ್ಜಕೀಯ್ ಗರ್ಬಾಪಾತ್

 ವಯ್ಜಕೀಯ್ ಕಾರಣಾಂಕ್ ಲಾಗೊನ್ ಜರ್ ಭುರ್ಗ್ಯಾಥಂಯ್ ಕಸಲೆಯ್ ಊಣ್ ಆಸಾತ್ ತರ್ ವಾ ಆವಯ್ಚ್ಯಾ ಜಿವಾಕ್ ಗರ್ಬಾವರ್ವಿಂ ಆಪಾಯ್ ಆಸ್‌ಲ್ಲ್ಯಾ ಸಂದರ್ಬಾಂನಿ ದಾಕ್ತೆರಾಂಚ್ಯಾ ಹಿಶಾರ್‍ಯಾಖಾಲ್ ಗರ್ಬ್ ಕಾಡಯ್ಜೆ ಪಡ್ತಾ. ಹಾಕಾಚ್ meಜiಛಿಚಿಟ ಣeಡಿmiಟಿಚಿಣioಟಿ oಜಿ ಠಿಡಿegಟಿಚಿಟಿಛಿಥಿ ಮ್ಹಣ್ತಾತ್. ಂboಡಿಣioಟಿ ವಾ ಗರ್ಬಾಪಾತ್ ತಶೆಂಚ್ ವಯ್ಜಕೀಯ್ ಗರ್ಬಾಪಾತಾಕ್ ಮಸ್ತ್ ಫರಕ್ ಆಸ್ತಾ. ಫಕತ್ ಗರ್ಬಾಪಾತ್ ಕರುಂಕ್ ವಯ್ಜಕೀಯ್ ಕಾರಣಾಂಚ್ ಆಸಜೆ ಮ್ಹಳ್ಳಿ ಗರ್ಜ್ ಪಡನಾ. ಭುರ್ಗೆಂ ನಾಕಾ ಜಾಲ್ಲ್ಯಾ ವಗ್ತಾ ಗರ್ಬಾಪಾತ್ ಕೆಲೆಂ ತರ್ ತಾಕಾ ವಯ್ಜಕೀಯ್ ಗರ್ಬಾಪಾತ್ ಮ್ಹಣೊಂಕ್ ಜಾಯ್ನಾ.

ವಯ್ಜಕೀಯ್ ಗರ್ಬಾಪಾತ್ ಕೆದಾಳಾ ಆನಿ ಕಿತ್ಯಾಕ್?

 ಭಾರತಾಂತ್ ವಯ್ಜಕೀಯ್ ಗರ್ಬಾಪಾತ್ ಕಾಯ್ದೊ 1971ಇಸ್ವೆಂತ್ ಜ್ಯಾರಿಯೆಕ್ ಹಾಡ್‌ಲ್ಲೊ. ಹಾಚೆಪರ್ಮಾಣೆಂ 20 ಹಫ್ತ್ಯಾ ಭಿತರ್‍ಲೊ ಗರ್ಬ್ ಕಾಡುಂಕ್ ಸ್ತ್ರೀಯೆಕ್ ಅಧಿಕಾರ್ ದಿಲ್ಲೊ. ಪುಣ್ 2021 ಚ್ಯಾ ಜನವರಿ ಮ್ಹಯ್ನ್ಯಾಂತ್ ಹ್ಯಾ ಕಾಯ್ದ್ಯಾಕ್ ಇಲ್ಲಿಶಿ ತಿದ್ವೊಣಿ ಕರ್‍ನ್ ಆತಾಂ ೨೦ ಹಫ್ತ್ಯಾ ಭಿತರ್‍ಲೊ ಗರ್ಬ್ ಜರ್ ಆವಯ್ಚ್ಯೆ ಕುಡಿಚ್ಯಾ ವಾ ಮಾನಸಿಕ್ ಭಲಾಯ್ಕೆಕ್ ಮಾರೆಕಾರ್ ಜಾತಾ ತರ್, ತೊ ಗರ್ಬಾಪಾತ್ ಕಾನೂನಾಚ್ಯೆ ಪರಿಧಿ ಭಿತರ್ ಕರುಂಕ್ ಆವ್ಕಾಸ್ ಆಸಾ. ವಯ್ಜಕೀಯ್ ಗರ್ಬಾಪಾತ್ ಕೇವಲ್ ಅಸಹಜ್ ರಿತಿಚ್ಯಾ ಗರ್ಬಾಥಾವ್ನ್ ಮುಕ್ತ್ ಜಾಂವ್ಚ್ಯಾಕ್ ಸ್ತ್ರೀಯೆಕ್ ಆವ್ಕಾಸ್ ಕರ್‍ನ್ ದಿತಾ. ಅಸಹಜ್ ಗರ್ಬ್ ಮ್ಹಳ್ಯಾರ್ ಬಲತ್ಕಾರಾವರ್ವಿಂ ಗರ್ಬ್ ಸಂಭವ್, ಅಂಗ್‌ವಿಕಲ್ ಸ್ತ್ರೀಯೆಚೊ ಗರ್ಬ್ ಸಂಭವ್, ಅಪ್ರಾಪ್ತ್ ಪ್ರಾಯೆಚ್ಯಾ ಚಲಿಯೆಥಂಯ್ ಗರ್ಬ್ ಸಂಭವ್ – ಅಸಲ್ಯಾ ಸಂದರ್ಬಾಂನಿ ಸ್ತ್ರೀಯೆಚ್ಯೆ ಮಾನಸಿಕ್ ತಶೆಂ ದೈಹಿಕ್ ಅಸಮರ್ಥತೆವರ್ವಿಂ ಗರ್ಬ್ ಕಾಡಿಜೆ ಪಡ್ತಾ ಆನಿ ಥೊಡ್ಯಾ ಸಂದರ್ಬಾಂನಿ ಸ್ತ್ರೀಯೆಥಂಯ್ ಗರ್ಬ್ ಸಂಭವ್ ಗರ್ಬಾಕೋಶಾಚ್ಯಾ ಭಾಯ್ರ್ ಜಾತಾ. ಮ್ಹಣ್ಜೆ ವಯ್ಜಕೀಯ್ ಭಾಶೆನ್ ಹಾಕಾ ectopic or extrauterine pregnancy ಮ್ಹಣ್ತಾತ್. ಹ್ಯಾ ಸಂದರ್ಬಾರ್ ಸ್ತ್ರೀಯೆಚ್ಯಾ ಫಾಲೋಪಿಯನ್ ಟ್ಯೂಬಾಂತ್ ಗರ್ಬ್ ರಾವೊನ್ ಭುರ್ಗೆಂ ವಾಡೊಂಕ್ ಸುರು ಜಾತಾನಾ ಟ್ಯೂಬ್ ಫುಟೊನ್ ವಚೊನ್ ಆವಯ್ಕ್ ಮರಣ್ ಹಾಡ್ಚೊ ಸಂಭವ್ ಆಸ್ತಾ ಜಾಲ್ಲ್ಯಾನ್, ಅಸಲ್ಯಾ ಸಂದರ್ಬಾಂನಿ ತುರ್ತು ಚಿಕಿತ್ಸಾ ವಾ ಶಸ್ತ್ರ್‌ಚಿಕಿತ್ಸಾ ಕರ್‍ನ್ ಫಾಲೋಪಿಯನ್ ಟ್ಯೂಬ್‌ಚ್ ಕಾಡಿಜೆ ಪಡ್ತಾ.

ಭ್ರೂಣಾಚಿ ವಾಡಾವಳ್ ಆನಿ ಗರ್ಬಾಪಾತ್

 ವಯ್ಜಕೀಯ್ ಪ್ರಗತಿ ಅರ್ವಿಲ್ಯಾ ದಿಸಾಂನಿ ಇತ್ಲಿ ವಾಡ್ಲ್ಯಾ ಕೀ, ಆತಾಂ ಪೊಟಾಂತ್ ಭುರ್ಗೆಂ ಕಶೆಂ ಆಸಾ ತೆಂ ತಸ್ವೀರ್‍ಯೊ ವಾ 3D ಪಿಂತುರಾ ರುಪಾರ್ ಪಳೆಂವ್ಕ್ ಸಯ್ತ್ ಮೆಳ್ತಾ. ಅಶೆಂ ಆಸ್ತಾಂ, ಗರ್ಬಾಂತ್ ಭುರ್ಗ್ಯಾಚಿ ವಾಡಾವಳ್ ಸಾರ್ಕ್ಯೆ ರಿತಿರ್ ಜಾತಾಗೀ ವಾ ನಾ ತೆಂ ಸಮ್ಜೊಂಕ್ ಸಬಾರ್ ನಮುನ್ಯಾಚೊ ಪರೀಕ್ಶಾ ಕರ್‍ಯೆತಾ. ಹಾಂಚೆಪಯ್ಕಿ ಭುರ್ಗ್ಯಾಥಂಯ್ ಅನುವಂಶಿಕ್ ವಾ ಅಸಹಜ್ ವಾಡಾವಳ್ ಪ್ರಮುಕ್ ಪರೀಕ್ಶಾ. ಅಸಲ್ಯಾ ಸಂದರ್ಬಾಂನಿ ಭುರ್ಗೆಂ ಮುಕಾರ್ ಕಶೆಂ ಜಲ್ಮಾತಾ, ಭುರ್ಗ್ಯಾಥಂಯ್ ದೈಹಿಕ್ ವಾ ಮಾನಸಿಕ್ ಊಣ್ (Down syndrome) ಇತ್ಯಾದಿ ಆಸಾತ್ ತರ್ ಗರ್ಬಾಂತ್ ಆಸ್ತಾನಾಂಚ್ ಸಮ್ಜೊನ್ ಘೆಂವ್ಕ್ ವಿವಿಧ್ ಪರೀಕ್ಶಾ ಕರ್‍ತಾತ್. ಆನಿ ಸಬಾರ್ ಪಾವ್ಟಿಂ ಅಸಲ್ಯಾ ಪರೀಕ್ಶೆಂಚ್ಯಾ ಆಧಾರಾಚೆರ್ ಗರ್ಬಾಪಾತ್ ಕರ್‍ತಾತ್. ಪುಣ್ ಹ್ಯೊ ಪರೀಕ್ಶಾ ಕಿತ್ಲ್ಯಾ ಪ್ರಮಾಣಾರ್ ನಿಖರ್ ಫಲಿತಾಂತ್ ದಿತಾತ್ ಹಾಚಿ ಗ್ಯಾರಂಟಿ ಕೊಣ್‌ಚ್ ದೀಂವ್ಕ್ ಸಕನಾ. ಸಬಾರ್ ಪಾವ್ಟಿಂ ಪರೀಕ್ಶಾ ಕರ್‍ತಾನಾ abnormal ಮ್ಹಣ್ ದಾಕಯಿಲ್ಲಿಂ ಭುರ್ಗಿಂ ಮುಕಾರ್ Perfectly normal ಜಾವ್ನ್ ಜಲ್ಮಲ್ಲೆ ಸಬಾರ್ ದಾಖ್ಲೆ ಆಸಾತ್. ದೆಕುನ್ ಪ್ರಸವ್‌ಪೂರ್ವ್ ಪರೀಕ್ಶಾ ಕರ್‍ನ್ ಗರ್ಬಾಪಾತ್ ಕರ್‍ಚೆಂ ಕಿತ್ಲೆಂ ಸಮಾ? ಹ್ಯಾ ಸವಾಲಾಕ್ ಜಾಪ್ ದಿಂವ್ಚೆಂ ಸಲೀಸಾಯೆಚೆಂ ಕಾಮ್ ನ್ಹಯ್.

ಅಪಾಂಗ್ ಭುರ್ಗ್ಯಾಚೊ ಗರ್ಬಾಪಾತ್

 ಜೆದ್ನಾ ಏಕ್ ಸ್ತ್ರೀ ಗರ್ಬೆಸ್ತ್ ಜಾತಾ, ತ್ಯಾ ಭುರ್ಗ್ಯಾವಿಶ್ಯಾಂತ್ ಕುಟ್ಮಾಚ್ಯಾ ಹರ್‍ಯೆಕಾ ಸಾಂದ್ಯಾಕ್ ಸಬಾರ್ ಆಪೇಕ್ಶಾ ಆಸಾತ್. ಪ್ರತ್ಯೇಕ್ ಜಾವ್ನ್ ಆವಯ್-ಬಾಪಾಯ್ಕ್ ಆಪ್ಣಾಕ್ ಏಕ್ ಭಲಾಯ್ಕೆಭರಿತ್, ಸೊಭಾಯೆಚೆಂ ಭುರ್ಗೆಂ ಜಲ್ಮಜೆ ಮ್ಹಳ್ಳಿ ಆಪೇಕ್ಶಾ ಆಸ್ಚೆಂ ಸಹಜ್. ಜೆದ್ನಾ ಪರೀಕ್ಶಾ ಕರ್‍ತಾತ್ ಆನಿ ಭುರ್ಗೆಂ ಸಾರ್ಕ್ಯೆ ರಿತಿರ್ ವಾಡೊಂಕ್ ನಾ ಭುರ್ಗ್ಯಾಥಂಯ್ ಊಣ್ ಆಸ್ಚೆ ಸಂದರ್ಬ್ ಆಸ್ತಿತ್ ಮ್ಹಣ್ತಾನಾ, ವ್ಹಡಿಲಾಂಕ್ ಧಕೊ ಜಾತಾ. ಭುರ್ಗೆಂ ಅಪಾಂಗ್ ವಾ ಊಣ್ ಆಸೊನ್ ಜಲ್ಮಲೆಂ ತರ್, ತ್ಯಾ ಭುರ್ಗ್ಯಾಚಿ ಜತನ್ ಕಶಿ ಘೆಂವ್ಚಿ? ವಾ ಜೀಣ್‌ಭರ್ ತ್ಯಾ ಭುರ್ಗ್ಯಾನ್ ಕಶ್ಟಜೆ ಪಡ್ತಾ ನ್ಹಯ್‌ಗೀ ಮ್ಹಣ್ ಖಂತಿನ್ ಬುಡ್ತಾತ್. ಅಶೆಂ ಆಸ್ತಾಂ ಅಸಲೊ ಗರ್ಬ್ ಕಾಡ್ಚೊಗೀ ವಾ ಭುರ್ಗ್ಯಾಕ್ ಜಲ್ಮ್ ದೀಜೆಗೀ ಮ್ಹಳ್ಳೊ ಸಮಸ್ಸೊ ಧೊಸುಂಕ್ ಲಾಗ್ತಾ. ಸಬಾರ್ ಪಾವ್ಟಿಂ ದಾಕ್ತೆರ್ ಅಸಲೊ ಗರ್ಬ್ ಮುಂದರುನ್ ವ್ಹರುಂಕ್ ಸಲಹಾ ದೀನಾಂತ್. ಬದ್ಲಾಕ್ ವಯ್ಜಕೀಯ್ ಗರ್ಬಾಪಾತ್‌ಚ್ ಬರೊ ಮ್ಹಳ್ಳೊ ಠರಾವೊ ದಿತಾನಾ ವ್ಹಡಿಲಾಂ ಗರ್ಬಾಪಾತಾಕ್ ಮುಕಾರ್ ಸರ್‍ತಾತ್. ಪುಣ್ ಸಬಾರ್ ಕಡೆನ್ ದೆವಾಚೆರ್ ಪಾತ್ಯೆಣಿ ದವರ್‍ನ್ ಭುರ್ಗ್ಯಾಂಕ್ ಜಲ್ಮ್ ದಿಲ್ಲ್ಯಾಂಪಯ್ಕಿ ಥೊಡಿಶಿಂ ಭುರ್ಗಿಂ ಬರ್‍ಯೆ ಭಲಾಯ್ಕೆನ್ ಜಲ್ಮೊನ್ ವ್ಹಡ್ ಜಾಲ್ಲೆ ದಾಖ್ಲೆ ಹಾಂವೆಂ ಖುದ್ಧ್ ಮ್ಹಜ್ಯೆ ಜಿಣಿಯೆಂತ್ ಪಳೆಲ್ಯಾತ್.

ಪವಿತ್ರ್ ಸಭಾ ಆನಿ ಗರ್ಬಾಪಾತ್

 ಪಯ್ಲ್ಯಾ ಶತಮಾನಾಥಾವ್ನ್‌ಚ್ ಪವಿತ್ರ್ ಸಭೆಚಿ ಶಿಕೊವ್ಣ್ ಗರ್ಬಾಪಾತ್ ಏಕ್ ಮ್ಹಾಪಾತಕ್ ಮ್ಹಣ್ತಾ. ದೊತೊರ್ನ್ ಅಶಿ ಸಾಂಗ್ತಾ ಕೀ, ಗರ್ಬಾಪಾತಾಥಂಯ್ ಪವಿತ್ರ್ ಸಭೆಚಿ ಶಿಕೊವ್ಣ್ ‘ಎದೊಳ್ ಬದ್ಲೊಂಕ್ ನಾ, ಆನಿ ಮುಕಾರ್‌ಯೀ ತಿ ಬದಲ್ಚಿನಾ.’ ಜ್ಯಾ ದೀಸ್ ಏಕ್ ಫಳಾಭರಿತ್ ತಾಂತಿಂ ಆವಯ್ಚ್ಯಾ ಗರ್ಬಾಕೋಶಾಕ್ ಚಿಡ್ಕತಾ, ತ್ಯೆ ಘಡಿಯೆಥಾವ್ನ್‌ಚ್ ಏಕ್ ಸಂಪೂರ್ಣ್ ಮನಿಸ್ ಜಾವ್ನ್ ವಾಡೊಂಕ್ ಸುರ್ವಾತ್ತಾ. ತಶೆಂ ಜಾಲ್ಲ್ಯಾನ್ ಖಂಯ್ಚ್ಯೇಯ್ ಘಡಿಯೆ ಗರ್ಬಾಪಾತ್ ಕೆಲ್ಯಾರೀ ತಿ ಎಕೆ ಖುನಿಯೆಕ್ ಸರಿ ಕರ್‍ಯೆತ್. ಪುಣ್ ectopic pregnancy/tubal pregnancy ಭುರ್ಗ್ಯಾಕ್ ವಾಚೊಂವ್ಚೆಂ 100% ಸಾಧ್ ನಾ ಜಾಲ್ಲ್ಯಾನ್ ಅಸಲೊ ಗರ್ಬ್ ಆವಯ್ಚ್ಯಾ ಜಿವಾಕ್ ಮಾರೆಕಾರ್ ಜಾವ್ನ್ ಖುದ್ಧ್ ಭುರ್ಗೆಂಯ್ ವಾಂಚನಾ ಜಾಲ್ಲ್ಯಾನ್ ಆವಯ್ಚ್ಯಾ ಜಿವಾಕ್ ರಕ್ಶಣ್ ದಿಂವ್ಚೆಖಾತಿರ್ ಕರ್‍ಚ್ಯ್ಯಾ ಗರ್ಬಾಪಾತಾಕ್ double effect ಮ್ಹಣ್ತಾತ್. ಆನಿ ಹೆಂ ಪವಿತ್ರ್ ಸಭಾ ಮಾಂದುನ್ ಘೆತಾ. ಪುಣ್ ಹಾಚೆಭಾಯ್ರ್ ಕಸಲೊಯ್ ಗರ್ಬಾಪಾತ್ ಪವಿತ್ರ್ ಸಭಾ ಮಾಂದುನ್ ಘೆನಾ. ಪಯ್ಲೆಂಚ್ಯಾ ಕಾಳಾರ್ ಗರ್ಬಾಪಾತ್ ಕುಮ್ಸಾರಾಂತ್ ಸಾಂಗ್ಲ್ಯಾರ್ ತೆಂ ಬಿಸ್ಪಾಕ್ ಮಾತ್ರ್ ಭೊಗ್ಸುಂಕ್ ಸಾಧ್ ಆಸ್‌ಲ್ಲೆಂ. ಪುಣ್ ಥೊಡ್ಯಾ ವರ್‍ಸಾಂಪಯ್ಲೆಂ ಗರ್ಬಾಪಾತಾಚ್ಯಾ ಪಾತ್ಕಾಕ್ ಯಾಜಕಾಂಕ್ ಕುಮ್ಸಾರಾಂತ್ ಆಬ್ಸುಲುಸಾಂವ್ ದೀಂವ್ಕ್ ಪರ್ವಣ್ಗಿ ದಿಲ್ಯಾ. ತರೀ ಗರ್ಬಾಪಾತ್ ಮ್ಹಳ್ಯಾರ್ ಖುನಿಚ್ ಸಯ್, ದೆಕುನ್ ಕಸಲೊಚ್ ಗರ್ಬಾಪಾತ್ ಖಂಯ್ಚ್ಯಾಯ್ ಸಂದರ್ಬಾರ್ ಸಾರ್ಕೊ ಮ್ಹಣೊಂಕ್ ಸಾಧ್ ನಾ.

ಸಂಪ್ಣಿ

 ಜೀವ್ ದಿಂವ್ಚೊ ದೆವಾನ್. ಕಾಜಾರಾಚ್ಯಾ ಸಾಕ್ರಾಮೆಂತಾಕ್ ಭುರ್ಗ್ಯಾಚೆಂ ದೆಣೆಂ ದೆವಾಚೆಂ ಬೆಸಾಂವ್. ಎಕಾದಾ ವೆಳಾ ಮನ್ಶಾಚ್ಯಾ ನಿಯಮಾ ಪರ್ಮಾಣೆಂ ಗರ್ಬ್ ಸಂಭವ್ ಜಾಲ್ಲೊ ತರ್ ಆಜ್ ಸಂಸಾರ್‌ಚ್ ಆಸ್ತೊನಾ ಕೊಣ್ಣಾ. ಎಕೆ ಸ್ತ್ರೀಯೆಕ್ ಹರ್‍ಯೆಕಾ ಮ್ಹಯ್ನ್ಯಾಂತ್ ಆನಿ ಎಕಾ ದಾದ್ಲ್ಯಾಕ್ ಹರ್‍ಯೇಕ್ ದೀಸ್ ಭುರ್ಗೆಂ ಜಾಂವ್ಕ್ ಸಾಧ್ ಆಸಾ; ತರೀ, ಗರ್ಬ್ ಸಂಭವ್ ಜಾಂವ್ಚೊ ಎಕಾ ನಿಯಮಿತ್ ವೆಳಾರ್ ಮಾತ್ರ್ ಆನಿ ಹೆಂ ದೆವಾಚ್ಯೆ ಖುಶೆಪರ್ಮಾಣೆಂ ಘಡ್ತಾ ಮ್ಹಣ್ ಆಮ್ಚಿ ಪಾತ್ಯೆಣಿ. ಆನಿ ಜೆದ್ನಾ ಹೊ ಗರ್ಬ್ ಸಂಭವ್ತಾ ಆನಿ ಆವಯ್ಚ್ಯಾ ಗರ್ಬಾಂತ್ ಚಿಡ್ಕೊನ್ ವಾಡೊಂಕ್ ಸುರು ಜಾತಾಗೀ, ತ್ಯೆಚ್ ಘಡಿಯೆಥಾವ್ನ್ ತ್ಯಾ ಭುರ್ಗ್ಯಾಥಂಯ್ ಜೀವ್ ಆಸಾ. ಕಸಲಿಯ್ ವಯ್ಜಕೀಯ್ ಪರೀಕ್ಶಾ ಜಾಂವ್ ವಾ ದಾಕ್ತೆರ್ ಜಾಂವ್ ತ್ಯಾ ಭುರ್ಗ್ಯಾನ್ ಜಿಯೆಜೆಗೀ ನಾ ಮ್ಹಳ್ಳೆಂ ನಿರ್ಧಾರ್ ಕರುಂಕ್ ಯೋಗ್ಯ್ ನ್ಹಯ್. ದೆಕುನ್ ಭುರ್ಗೆಂ ಸಮಾ ವಾಡೊನ್ ನಾ ವಾ ಭುರ್ಗೆಂ ಅಪಾಂಗ್ ಜಾಯ್ತ್ ಮ್ಹಳ್ಳ್ಯಾ ಭಿಯಾನ್ ಜರ್ ಗರ್ಬಾಪಾತ್ ಆಮಿ ಸಮಾ ಮ್ಹಣ್ತಾಂವ್ ತರ್ ಆಮಿ ಖುನಿಗಾರಾಂಕ್ ರಕ್ಶಣ್ ದಿಲ್ಲೆಬರಿ. ದೆಕುನ್ ಜೀವ್ ದಿಲ್ಲೊ ದೆವಾನ್ ತರ್ ತಾಕಾ ತೊ ಜೀವ್‌ಯೀ ಸಾಂಬಾಳುಕ್ ಕಳಿತ್ ಆಸಾ. ಮದರ್ ತೆರೇಸಾ ಮ್ಹಣ್ತಾ, “ಗರ್ಬಾಪಾತ್ ಮ್ಹಳ್ಯಾರ್ ಶಾಂತಿ ವಿಧ್ವಂಸಕ್. ಕಿತ್ಯಾಕ್ ಗರ್ಬಾಪಾತ್ ದೋನ್ ಜೀವ್ ನಾಸ್ ಕರ್‍ತಾ. ಏಕ್ ಭುರ್ಗ್ಯಾಚೊ ಜೀವ್ ತರ್ ಆನ್ಯೇಕ್ ಆವಯ್ಚೆಂ ಕೊಶೆಡ್ದ್”. ದೆಕುನ್ ಜರ್ ಕೊಣೀ ಗರ್ಬಾಪಾತ್ ಕರುಂಕ್ ಚಿಂತ್ತಾ ವಾ ತಶೆಂ ಕರುಂಕ್ ಪ್ರೇರಣ್ ವಾ ಆಧಾರ್ ದಿತಾ, ತಸಲ್ಯಾಂಕ್ ದೇವ್ ತಾಂಚಿ ಮತ್ ಉಜ್ವಾಡಾವ್ನ್ ತ್ಯಾ ಮ್ಹಾಪಾತ್ಕಾಕ್ ಬಲಿ ಜಾಯ್ನಾಶೆಂ ರಾಕೊನ್ ವ್ಹರುಂದಿ ಮ್ಹಣ್ ಮಾಗ್ಯಾಂ.

✍️ –ಲೀಝಾ ರೊಡ್ರಿಗಸ್, ವಾಮಂಜೂರ್