ಹಿಂದು ದೆವಾಂಕ್ ಆರಾಧನ್, ಭಜನ್ ವಾ ಪುಜಾ ಕರ್‍ಚ್ಯಾ ಸುವಾತೆಕ್ ದೆವಾಳ್, ಮಂದಿರ್, ದೇವಸ್ಥಾನ, ಗುಡಿ, ಪುರ, ಕೋವಿಲ್ ಮ್ಹಣ್ ಅಪಯ್ತಾತ್. ಜೆರಾಲ್ ಜಾವ್ನ್ ಹಿಂದು ದೆವಾಳಾಂನಿ ಆಮಿ ತೀನ್ ರಿತಿಂಚ್ಯೊ ಬಾಂದ್ಪಾಶೈಲಿ ಪಳೆತಾಂವ್: ನಾಗರ, ದ್ರಾವಿಡ ಆನಿ ವೇಸರ. ನಾಗರ ಮ್ಹಳ್ಯಾರ್ ಬಡ್ಗಾ/ಉತ್ತರಾಚಿ ಶೈಲಿ ತರ್, ದ್ರಾವಿಡ ತೆಣ್ಕಾ/ದಕ್ಷಿಣಾಚಿ ಶೈಲಿ. ವೇಸರ ಮ್ಹಳ್ಯಾರ್ ಉತ್ತರ್ ಆನಿ ದಕ್ಷಿಣ್ ಶೈಲೆಂಚಿ ಎಕ್ಟಾವ್ಣಿ. ಬೃಹತ್ ಸಂಹಿತಾ, ವಾಸ್ತುಶಾಸ್ತ್ರ, ಶಿಲ್ಪಶಾಸ್ತ್ರ ಆನಿ ಹೆರ್ ಆಗಮಶಾಸ್ತ್ರಾಂನಿ ದೆವಾಳ್ ಆನಿ ತಾಚ್ಯಾ ಬಾಂದ್ಪಾರಿತಿವಿಶಿಂ ಜಾಯ್ತೊ ವಿವರ್ ಆಸಾ. ಗುಪ್ತ ರಾಯ್‌ಕುಳ್ಯೆನ್ ಆಡಳ್ತೆಂ ಚಲಯ್ತಾನಾ ಉತ್ತರ್ ಆನಿ ಮಧ್ಗಾತ್ ಭಾರತಾಂತ್ ಸಾಂಚಿ, ಟಿಗಾವಾ, ಭೂಮಾರ (ಮಧ್ಯಪ್ರದೇಶ್), ನಾಚ್ನಾ (ರಾಜಸ್ಥಾನ್), ದಿಯೋಗರ್ (ಉತ್ತರ್ ಪ್ರದೇಶ್) ಪ್ರದೇಶಾಂನಿ ದೆವಾಳಾಂ ಬಾಂದ್ಲಿಂ. ದಕ್ಷಿಣ್ ಭಾರತಾಂತ್ ತಮಿಳ್ನಾಡು ಆನಿ ಕರ್ನಾಟಕಾಂತ್ ಪ್ರಾಚೀನ್ ದೆವಾಳಾಂ ಪಳೆಂವ್ಕ್ ಮೆಳ್ತಾತ್. ಪಲ್ಲವ, ಚಾಲುಕ್ಯ, ಪಾಂಡ್ಯ, ರಾಷ್ಟ್ರಕೂಟ ತಸಲ್ಯಾ ರಾಯ್‌ಕುಳ್ಯೆಂನಿ ಆಡಳ್ತೆಂ ಚಲಯ್ತಾನಾ ಸಬಾರ್ ದೆವಾಳಾಂ ಬಾಂದ್ಲಿಂ. ದಾಕ್ಲ್ಯಾಕ್, ಎಲ್ಲೋರಾಚೆಂ ಕೈಲಾಸನಾಥ ಮಂದಿರ್, ಐಹೊಳೆ ಆನಿ ಪಟ್ಟದಕಲ್ಲು ಪ್ರದೇಶಾಂನಿ ಬಾಂದ್ಲೆಲಿಂ ಪುರಾತನ್ ದೆವಾಳಾಂ ದ್ರಾವಿಡ ಆನಿ ವೇಸರ ಶೈಲೆಚಿಂ ಜಾವ್ನಾಸಾತ್.

ಹಿಂದು ದೆವಾಳಾಂನಿ ಜಾಯ್ತೆ ಭಾಗ್ ಆಸಾತ್. ತಾಂತ್ಲೆ ಪ್ರಮುಖ್ ಭಾಗ್ ಹ್ಯೆ ಪರಿಂ ಆಸಾತ್:  ಶಿಖರ ವಾ ವಿಮಾನ: ಗರ್ಭಗೃಹ ವಯ್ರ್ ಆಸ್ಚ್ಯಾ ಊಂಚ್ ಬಾಂದ್ಪಾಕ್ ಶಿಖರ ಮ್ಹಣ್ತಾತ್. ಶಿಖರಾಕ್ ಪುರಾಣಾಚ್ಯಾ ಮೇರು ಪರ್ವತಾಕ್ ಸರಿ ಕರ್‍ತಾತ್. ಶಿಖರ ವಯ್ರ್ ವರ್ತುಲಾಕಾರಾಚೊ ಸುಂರ್ಗಾರ್ (ಆಮಾಲಕ) ಆನಿ ಎಕ್ ಕೊಳ್ಸೊ (ಕಲಶ) ದವರ್‍ತಾತ್. ಗರ್ಭಗೃಹ: ಗರ್ಭಗೃಹ ವಾ ಗರ್ಭಗುಡಿ ದೆವಾಳಾಚೊ ಪ್ರಮುಖ್ ವಾಂಟೊ. ತಾಕಾ ದಾರ್ ವಾ ಜನೆಲ್ ಆಸಾನಾ. ಗರ್ಭಗುಡಿ ಮುಖ್ಲ್ಯಾ ಕುಶಿನ್ ಉಗ್ತೆಂ ಆಸ್ತಾ ತರ್‌ಯಿ, ತಾಕಾ ಪ್ರವೇಶ್ ಕರುಂಕ್ ಅಶೀರ್ ಆನಿ ಮಟ್ವ್ಯಾ ವಾಟೆನ್ ಭಿತರ್ ಸರೊಂಕ್ ಪಡ್ತಾ. ತ್ಯಾ ಕುಡಾ ಭಿತರ್ ಪ್ರತಿಷ್ಠಾಪನ್ ಕೆಲ್ಲಿ ಮೂರ್ತಿ ಆಸ್ತಾ. ಪುರ್ವಿತ್/ಪುಜಾರಿ ಮಾತ್ರ್ ತಿ ಮೂರ್ತಿ ಧುತಾ, ಸುಂರ್‍ಗಾರಾಯ್ತಾ ಆನಿ ಫುಲಾಂ, ಗಂಧ್, ದಿವೆ, ದೂದ್, ನ್ಹೆಸಣ್, ಭಾಂಗಾರ್ ಅಸಲ್ಯೊ ಕಾಣಿಕೊ ಭೆಟವ್ನ್ ಪುಜಾ ಕರ್‍ತಾ. ಪ್ರದಕ್ಷಿಣ ಪಥ: ಗರ್ಭಗೃಹಾಚ್ಯಾ ಭೊಂವಾರಿಂ ವಚೊಂಕ್ ಆಸ್ಚ್ಯಾ ವಾಟೆಕ್ ‘ಪ್ರದಕ್ಷಿಣ ಪಥ’ ಮ್ಹಣ್ತಾತ್. ಮುಖಮಂಟಪ: ಗರ್ಭಗೃಹಾಚ್ಯಾ ಮುಖಾರ್ ಆಸ್ಚ್ಯಾ ಸಾಲಾಕ್ ‘ಮುಖಮಂಟಪ’ (ಶುಕನಾಸಿ ವಾ ಅರ್ಧಮಂಟಪ) ಮ್ಹಣ್ತಾತ್. ಅಂತರಾಳ: ಗರ್ಭಗೃಹ ಥಾವ್ನ್ ಮಂಟಪಾಕ್ ವಚೊಂಕ್ ಆಸ್ಚ್ಯಾ ಅಶೀರ್ ವಾಟೆಕ್ ‘ಅಂತರಾಳ’ ಮ್ಹಣ್ತಾತ್. ಮಂಟಪ: ಸಂಗೀತಾಕ್, ನಾಚಾಕ್, ಪ್ರವಚನಾಕ್ ವಾ ಶಾಸ್ತ್ರ್ ಪರ್ಗಟ್ಣೆಕ್ ವಾಪಾರ್‍ಚ್ಯಾ ವ್ಹಡ್ ಸಾಲಾಕ್ ‘ಮಂಟಪ’ ಮ್ಹಣ್ತಾತ್. ಧ್ವಜಸ್ತಂಭ: ಧ್ವಜಸ್ತಂಭ ವಾ ಬಾವ್ಟ್ಯಾಕುಂದೊ ಮಂಟಪಾಚ್ಯಾ ಮುಖ್ಲ್ಯಾನ್ ಆಸ್ತಾ. ತಾಚ್ಯಾ ತಕ್ಲೆರ್ ತಾಂಬ್ಯಾಚಿ ವಾ ಪಿತುಳ್ಚಿ ಏಕ್ ನಿಶಾನಿ (ಲಾಂಛನ) ಆಸ್ತಾ. ತಾಂತುನ್ ಚಡಾವತ್ ಜಾವ್ನ್ ದೆವಾಚೆಂ ವಾಹನಾಚೊ ಗುರ್ತ್ ದವರ್‍ತಾತ್. ಶಿವಾಕ್ ಸಮರ್‍ಪಿಲ್ಲ್ಯಾ ದೆವಾಳಾಂನಿ ಪಾಡ್ಯಾನ್ ನಿದ್‌ಲ್ಲಿ (ನಂದಿ) ವಾ ಲಿಂಗಾಚಿ ಫಾತ್ರಾಚಿ ಆಕೃತಿ ಪಳೆಂವ್ಕ್ ಮೆಳ್ತಾ ತರ್, ವಿಷ್ಣುಕ್ ಸಮರ್‍ಪಿಲ್ಲ್ಯಾ ಮಂದಿರಾಂನಿ ಗರುಡ, ಹನುಮಾನ್, ಸರೊಪ್ ವಾ ಹೆರ್ ರುಪಾಚೊ ಗುರ್ತ್ ಆಸ್ತಾ. ದೇವಿಕ್ ಸಮರ್‍ಪಿಲ್ಲ್ಯಾ ದೆವಾಳಾಂನಿ ಚಡಾವತ್ ಸಿಂಹ್ ಆಸ್ತಾ. ಬಲಿಪೀಠ: ಧ್ವಜಸ್ತಂಭ ಲಾಗ್ಸಾರ್ ಸಾಳಕ್ ವಾ ದೆವಾಚ್ಯಾ ಪಾಂಯಾಂಚೆ ಗುರ್ತ್ ಕಾಂತಯ್ಲಲೆಂ ಬಲಿಪೀಠ ಆಸ್ತಾ. ವೆವೆಗ್ಳಿಂ ಆಚರಣಾಂ ವಾ ವಿಧಿ-ವಿಧಾನಾಂ ಕರ್‍ತಾನಾ ತಾಚೆರ್ ಕುಂಕುಮ್ ಆನಿ ತಾಂದುಳ್ ದವರ್‍ನ್ ಹೆರ್ ದೇವ್ ಆನಿ ದೇವಿಂಕ್ (ಪರಿವಾರದೇವತಾ) ತೃಪ್ತ್ ಕರುಂಕ್ ಪ್ರಯತ್ನ್ ಕರ್‍ತಾತ್. ವೇದ್ ಸಾಹಿತ್ಯಾಂತ್ ಉಲ್ಲೇಕ್ ಕೆಲ್ಲೆ ಯೂಪಸ್ತಂಭ ಆನಿ ಬಲಿಪೀಠ, ಉಪ್ರಾಂತ್ಲ್ಯಾ ಕಾಳಾರ್ ಧ್ವಜಸ್ತಂಭ ಆನಿ ಬಲಿಪೀಠ ಜಾಲಾಂ ಮ್ಹಳ್ಳಿ ಜಾಣ್ತ್ಯಾಂಚಿ ಅಭಿಪ್ರಾಯ್. ಪ್ರಾಕಾರ: ಸಗ್ಳ್ಯಾ ದೆವಾಳಾಚ್ಯಾ ಭೊಂವಾರಿಂ ವ್ಹಡ್ ವೊಣದ್ಯೊ ಅಸ್ತಾತ್. ತಾಕಾ ‘ಪ್ರಾಕಾರ’ ಮ್ಹಣ್ತಾತ್. ಗೋಪುರ: ಮುಖೆಲ್ ಪ್ರವೇಶ್ ದ್ವಾರಾಲಾಗಿಂ ಆಸ್ಚ್ಯಾ ಊಂಚ್ ತೊರಿಕ್ ‘ಗೋಪುರ’ ಮ್ಹಣ್ತಾತ್.

ಜಾಯ್ತೆ ಪಾವ್ಟಿಂ ದೆವಾಳಾಚ್ಯಾ ಪರಿಧೆ ಭಿತರ್ ಹೆರ್ ದೆವಾಂಕ್ ಸಮರ್‍ಪಿಲ್ಲಿಂ ಲ್ಹಾನ್ ಮಂದಿರಾಂ ಆಸ್ತಾತ್. ದಾಕ್ಲ್ಯಾಕ್, ಶಿವ ದೆವಾಳಾ ಭೊಂವಾರಿಂ ಗಣಪತಿ, ಪಾರ್ವತಿ, ಸುಬ್ರಮಣ್ಯ ಆನಿ ಚಂಡೇಶ್ವರ ಮಂದಿರಾಂ ಆಸ್ತಾತ್. ವಿಷ್ಣು ದೆವಾಳಾ ಬಗ್ಲೆನ್ ಲಕ್ಷ್ಮೀ, ಹನುಮಾನ್ ಆನಿ ಗರುಡ ದೆವಾಂಚಿಂ ಮಂದಿರಾಂ ಪಳೆತಾಂವ್. ಹಾಚೆ ಬರಾಬರ್ ಯಾಗಶಾಲಾ (ಸಾಕ್ರಿಫಿಸ್ ಅರ್ಪುಂಚೊ ಜಾಗೊ), ಪಾಕಶಾಲಾ (ರಾಂದ್ಪಾಚೆಂ ಕೂಡ್), ಉತ್ಸವಮೂರ್ತಿ ದವರ್‍ಚಿ ಸುವಾತ್, ಬಾಂಯ್ ವಾ ಪುಷ್ಕರಿಣೀ (ತಳೆಂ), ಪುಲಾಂಚೆಂ ವೋಡ್ತ್ ಆನಿ ಹೆರ್ ಗರ್ಜೆಚ್ಯೊ ಬಾಂದಾವಳಿ ಹಿಂದೂ ದೆವಾಳಾ ಬೊಂವ್ತಿಂ ಆಸ್ತಾತ್. ದಕ್ಷಿಣಾಚ್ಯಾ ದೆವಾಳಾಂನಿ ಬಲಿಪೀಠ ಮುಖಾರ್ ‘ದೀಪಸ್ತಂಭ’ ಆಸ್ತಾತ್. ದೆವಾಳಾ ಭಿತರ್ ವೆತಾನಾ ಭಕ್ತಿಕಾನ್ ಮೊಚೆ ವಾ ವ್ಹಾಣೆ ಕಾಡುಂಕ್ ಆಸಾತ್. ರಿತೆ ಪಾಂಯ್ ಖಾಲ್ತೆಂಪಣಾಚೊ ಆನಿ ಸಮಾನತೆಚೊ ಗುರ್ತ್. ರಿತ್ಯಾ ಪಾಂಯಾಂನಿ ಧರ್ತೆಚೊ ಸ್ಪರ್ಶ್ ಜೊಡುನ್ ದೆವಾಕ್ ಧನಾತ್ಮಕ್ ರಿತಿನ್ ಭೊಗ್ಯೆತ್ ಮ್ಹಣ್ ಹಿಂದು ಧರ್ಮ್ ಶಿಕಯ್ತಾ. ದೆವಾಳಾಕ್ ಭೆಟ್ ದಿಂವ್ಚೆ ಭಕ್ತಿಕ್ ಲಾಗ್ಶಿಲ್ಯಾ ತಳ್ಯಾಂತ್ ವಾ ನ್ಹಂಯ್ತ್ ನಾವ್ನ್, ನವಿ ಮುಸ್ತಾಯ್ಕಿ ನೆಸ್ತಾತ್. ಪ್ರಮುಖ್ ಪೂನ್‌ಶೆತಾ ಭೊಂವಾರಿಂ ತೀನ್, ಪಾಂಚ್ ವಾ ಸಾತ್ ಪಾವ್ಟಿಂ ಯೆತಾತ್ (ಪ್ರದಕ್ಷಿಣ) ಆನಿ ಪುಜೆಂತ್ ವಾಂಟೊ ಘೆತಾತ್. ಪುಜಾ ಕರ್‍ತಾನಾ ಭಕ್ತಿಕಾಂಚೆಂ ಗಮನ್ ಮೂರ್ತಿಚ್ಯಾ ಕುಶಿನ್ ವೊಡುಂಕ್ ಪುರ್ವಿತ್ ಧಾವ್ಯಾ ಹಾತಾಂತ್ ಘಾಂಟ್ ವಾಜಯ್ತಾ. ತಾಚ್ಯಾ ಉಪ್ರಾಂತ್ ಪುರ್ವಿತ್ ಜಮ್ಲೆಲ್ಯಾಂಕ್ ಫಳ್, ಫುಲ್ ವಾ ಖಾಣಾರುಪಿಂ ಕಾಣಿಕ್ ವಾ ಪ್ರಸಾದ ವಾಂಟ್ತಾ ಆನಿ ಹರ್‍ಯೆಕ್ಲ್ಯಾಚ್ಯಾ ತಳಾತಾರ್ ಪಿಯೆಂವ್ಚ್ಯಾಕ್ ತೀರ್ಥ ವೊತ್ತಾ.

ಆದಿಂ ದಿವ್ಳಾ ವಠಾರಾರ್ ನಾಚ್ಚಿಂ ಚೆಡ್ವಾಂ ವಾ ‘ದೇವದಾಸಿ’ ಆಸ್ತಾಲಿಂ. ಗುರ್ವಾರ್ ಸ್ತ್ರೀಯೊ ಆಪ್ಣಾಚೆಂ ಪ್ರಸೂತ್‌ಪಣ್ ಬರ್‍ಯಾನ್ ಜಾಂವ್ಚ್ಯಾಕ್ ಆಂಗೊವ್ಣ್ ಘಾಲ್ತಾಲಿಂ ಆನಿ ಜರ್, ಚೆಡುಂ ಭುರ್ಗೆಂ ಜಾಲೆಂ ತರ್, ದಿವ್ಳಾಂತ್ ಸೆವೆಕ್ ಅರ್ಪಿತಾಲಿಂ. ತಿಂ ನಾಚೊಂಕ್ ಆನಿ ಗಾಂವ್ಕ್ ಕುಮಕ್ ಕರ್‍ತಾಲಿಂ. ಚಡಾವತ್ ಜಾವ್ನ್ ಹಿಂದು ದೆವಾಳಾಂನಿ ತೀನ್ ಪಂಗ್ಡಾಚ್ಯೊ ಮೂರ್ತಿ ವಾ ರುಪ್ಣಿಂ ಆಸ್ತಾತ್: ಶೈವ, ಶಾಕ್ತ ಆನಿ ವೈಷ್ಣವ. ತಿಂ ರುಪ್ಣಿಂ ‘ಅಚಲ’ (ಚಲನ್ ನಾತ್ಲಲಿಂ) ಆನಿ ‘ಚಲ’ (ಚಲನ್ ಆಸ್ಚಿಂ) ಮ್ಹಣ್ ವಿಂಗಡ್ ಕೆಲ್ಯಾಂತ್. ‘ಅಚಲ’ ಮ್ಹಳ್ಯಾರ್ ಫಾತ್ರಾಂತ್ ಕೆಲ್ಲಿಂ ರುಪ್ಣಿಂ ತರ್, ಚಲ ಮ್ಹಳ್ಯಾರ್ ಕಾಶೆಂ ವಾ ಪಂಚಲೋಹ (ಭಾಂಗಾರ್, ರುಪೆಂ, ತಾಂಬೆಂ, ಸತು/ziಟಿಛಿ ಆನಿ ಲೊಂಕಡ್) ವಾಪಾರ್‍ನ್ ಕೆಲ್ಲಿಂ ರುಪ್ಣಿಂ. ‘ಚಲ’ ರುಪ್ಣಿಂ ಫೆಸ್ತಾಂ-ಪರ್ಭೆಂಚ್ಯಾ ಸಮಯಾರ್ ಪುರ್ಶ್ಯಾಂವಾಂನಿ ವ್ಹರ್‍ತಾತ್ ವಾ ಥೊಡೆ ಪಾವ್ಟಿಂ ಘರಾಂನಿ ದವರ್‍ತಾತ್. ಅತಾಂ ರುಕಡಾಚಿ ಆನಿ ಮಾತ್ಯೆಚಿ ಮೂರ್ತ್ಯೊಯಿ ವಾಪರ್‍ಚೆಂ ಪಳೆತಾಂವ್. ದೆವಾಳಾಂನಿ ದವರ್‍ಚಿಂ ರುಪ್ಣಿಂ ಉಬ್ಯಾ (ಸ್ಥಾನಕ), ಬಸ್ಚ್ಯಾ (ಆಸನ) ಆನಿ ನಿದ್ಚ್ಯಾ (ಶಯನ) ರಿತಿಂನಿ ಆಸ್ಯೆತಾ. ಹಿಂದೂ ಸಂಪ್ರದಾಯಾಂತ್ ಉಬಾರ್‍ಲೆಲೆಂ ದೆವಾಳ್, ದೇವ್ ವಾ ದೇವಿಚ್ಯಾ ಕುಡಿಕ್ ಆಡ್ವೆಂ ಆನಿ ನೀಟ್ ಜಾವ್ನ್ ಸರಿ ಕರ್‍ತಾತ್. ಆಡ್ವೆಂ ಜಾವ್ನ್ ಪಳೆಂವ್ಚೆಂ ಜಾಲ್ಯಾರ್, ಗರ್ಭಗೃಹ ದೆವಾಚಿ ತಕ್ಲಿ, ಗೋಪುರ ಪಾಂಯ್, ಅರ್ಧಮಂಟಪ ನಾಕ್, ಅಂತರಾಳ ಗೊಮ್ಟಿ ಜಾವ್ನ್ ಮಾನುನ್ ಘೆತಾತ್. ಹೆರ್ ಮಂಟಪ್ ಕೂಡ್ ತರ್, ಭೊಂವ್ತಿಲ್ಯೊ ವೊಣದಿ ಹಾತ್ ಮ್ಹಣ್ ಲೆಕ್ಚೆಂ ಆಸಾ. ಉಬ್ಯಾ ಕೋನಾರ್, ಗರ್ಭಗೃಹ ದೆವಾಚಿ ಗೊಮ್ಟಿ, ಶಿಖರ್ ತಾಚಿ ತಕ್ಲಿ ಆನಿ ಕಲಶ ತಾಚ್ಯಾ ಕೆಸಾಂಚೊ ಗೊಂಡೊ ಮ್ಹಣ್ ಚಿಂತ್ಚೆಂ ಆಸಾ.

ವಿಶ್ವ್ ವಾ ಜಗಾಚೆ ಸಾತ್ ಜಾಗೆ ದೆವಾಳಾಚ್ಯಾ ಸಾತ್ ಭಾಗಾಂಕ್ ಸರಿ ಕರ್‍ತಾತ್. ದೆವಾಳಾ ಪಂದ್ಲಿ ಧರ್ಣ್ ಭೂಲೋಕ ತರ್, ಮುಖೆಲ್ ಮೂರ್ತಿ ಪಂದ್ಲೊ ಫಾತರ್ (ಅಧಿಷ್ಠಾನಪೀಠ) ಭುವರ್‌ಲೋಕ, ಖಾಂಬೆ ವಾ ಕುಂದೆ ಸ್ವರ್‌ಲೋಕ, ಕುಂದ್ಯಾವಯ್ರ್ ಅಸೊನ್ ಪಾಕ್ಯಾಕ್ ಬಳ್ ದಿಂವ್ಚೊ ಭಾಗ್ (ಪ್ರಸ್ತರ) ಮಹರ್‌ಲೋಕ, ದೆವಾಳಾಚೆಂ ಶಿಖರ್ ಜನೋಲೋಕ; ಪಾಕ್ಯಾವಯ್ಲಿ ಸುಂರ್ಗಾರಾಚಿ ಗಾಂಟಿಚೊ ಸಕಯ್ಲೊ ಭಾಗ್ (ಆಮಲಸಾರ) ತಪೋಲೋಕ ಆನಿ ಸುಂರ್ಗಾರಾಚೊ ವಯ್ಲೊ ಭಾಗ್ (ಸ್ತೂಪಿಕಾ) ಬ್ರಹ್ಮಲೋಕ ವಾ ಸತ್ಯಲೋಕ. ಅನ್ಯೆಕಾ ರಿತಿನ್, ಭೂಲೋಕ ದೆವಾಚೆ ಪಾಂಯ್, ಸತ್ಯಲೋಕ ತಾಚ್ಯಾ ತಕ್ಲೆಚೆ ಕೇಸ್ ಆನಿ ಹೆರ್ ಲೋಕ ತಾಚ್ಯಾ ಕುಡಿಚೆ ಹೆರ್ ಭಾಗ್ ಮ್ಹಣೊನ್‌ಯಿ ತುಲನ್ ಕೆಲಾಂ. ಚಡಾವತ್ ದೊಂಗ್ರಾಂನಿ, ಮಾಟ್ಯಾಂನಿ, ರಾನಾಂನಿ ಆನಿ ನ್ಹಂಯ್ ತಡಿಂನಿ ಹಿಂದೂ ದೆವಾಳಾಂ ಪಳೆಂವ್ಕ್ ಮೆಳ್ತಾತ್. ಅಸಲ್ಯಾ ಜಾಗ್ಯಾಂನಿ ದೇವ್ ಖೆಳ್ತಾ ಮ್ಹಣ್ ಬೃಹತ್ ಸಂಹಿತಾ ವರ್‍ಣಿತಾ. ಖಜುರಾಹೊ, ಕೊಣಾರ್ಕ್ ತಸಲ್ಯಾ ಥೊಡ್ಯಾ ಪುರಾತನ್ ಹಿಂದೂ ದೆವಾಳಾಂಚ್ಯಾ ಭಾಯ್ಲ್ಯಾನ್ ಕುಡಿಚ್ಯೊ ಥರಾವಳ್ ಲೈಂಗಿಕ್ ಆಕಾರ್ ಆನಿ ರಿತಿ ಕಾಂತಯ್ಲ್ಯಾತ್. ಭಕ್ತಿಕಾನ್ ದೆವಾಚೆಂ ದರ್ಶನ್ ಜೊಡುಂಕ್ ದೆವಾಳಾ ಭಿತರ್ ವೆತಾನಾ, ಕುಡಿಚ್ಯಾ ವೊಡ್ನ್ಯಾಂಚೆರ್ ನಿಯಂತ್ರಣ್ ಆನಿ ಜಯ್ತ್ ಜೊಡುನ್, ನಿತಳ್ ಕಾಳ್ಜಾನ್ ವಚೊಂಕ್‌ಜಾಯ್ ಮ್ಹಣ್ ತಾಚೊ ಜೆರಾಲ್ ಇರಾದೊ ಮ್ಹಣ್ಯೆತ್. ದುಸ್ರ್ಯಾನ್, ಲೈಂಗಿಕತಾ ಮನ್ಶ್ಯಾಚಿ ಮುಳಾವಿ ಆನಿ ಸ್ವಾಭಾವಿಕ್ ಗರ್ಜ್. ತೆಂ ಫಕತ್ ಖುಶಾಲಾಯೆಚೆಂ ಸಾಧನ್ ನ್ಹಯ್, ಬಗಾರ್ ದೆವಾಚ್ಯಾ ರಚ್ನೆಚ್ಯಾ ಕಾಮಾಂತ್ ವಾಂಟೆಲಿ ಜಾಂವ್ಕ್ ಅವ್ಕಾಸ್ ಆನಿ ಬರಿ ಸಕತ್ ಮ್ಹಳ್ಳಿ ಶಿಕೊವ್ಣ್‌ಯಿ ತಾಂತುನ್ ಆಸಾ. ಹಾಚೆ ಬರಾಬರ್, ಆದ್ಲ್ಯಾ ಕಾಳಾರ್ ದೆವಾಳಾಂ ಶಿಕ್ಪಾಚಿಂ ಕೇಂದ್ರಾಂ ಜಾವ್ನಾಸ್ಲೆಲ್ಯಾನ್, ವೊಣ್ತಿವಯ್ಲಿಂ ಲೈಂಗಿಕತೆಕ್ ಲಗ್ತಿಂ ಜಾಲ್ಲಿಂ ಶಿಲ್ಪ್‌ಕಲಾ ಭಕ್ತಿಕಾಂಕ್ ಲೈಂಗಿಕ್ ಶಿಕೊವ್ಣ್ ಜೊಡುಂಕ್ ಆಧಾರಾಚಿಂ ಜಾತಾಲಿಂ.

✍️ –ಐವನ್ ಮಿಯಾರ್