ಬಾಳೊಕ್ ಜೆಜುಚೆಂ ದೆವಾಸಾಂವ್ ಜಾಯ್ತ್ಯಾ ಲೊಕಾಕ್ ಮೊಗಾಚೆಂ ಆನಿ ಕಾಳ್ಜಾಕ್ ಲಾಗ್ಶಿಲೆಂ. ಕಾರ್ಮೆಲ್ ಗುಡ್ಯಾರ್ ಬಾಳೊಕ್ ಜೆಜುಚೆಂ ದೆವಾಸಾಂವ್ ಸುರು ಜಾವ್ನ್ ಲೊಕಾಮೊಗಾಳ್ ಜಾತಾನಾ ಆನಿ ಆತಾಂಯ್ ಜಾಯ್ತ್ಯಾಂನಿ ವ್ಯಂಗ್ಯ್ ಉಲವ್ನ್ ವಿಚಾರ್‍ಚೆಂ ಆಸಾ: ‘ಕಾರ್ಮೆಲ್ ಗುಡ್ಯಾವ್ಹಯ್ಲೊ ಬಾಳೊಕ್ ಜೆಜು ಕಿತ್ಯಾಕ್ ವಾಡಾನಾ?’. ಥೊಡ್ಯಾ ಪ್ರಸಂಗ್‌ದಾರಾಂನಿ ‘ಹೆಂ ದೆವಾಸಾಂವ್‌ಚ್ ನ್ಹಯ್, ಆಮ್ಚೊ ಜೆಜು ಜಿವಂತ್ ಜಾಲಾ’ ಮ್ಹಣ್ ಪ್ರಚಾರ್ ದಿಲ್ಲೊಯ್ ಆಸಾ. ಜಿವಂತ್ಪಣ್ ಜಾಂವ್ಚೆ ಆದಿಂ ಜೆಜು ಸಂಸಾರಾಕ್ ಏಕ್ ಬಾಳ್ ಜಾವ್ನ್ ಜಲ್ಮಲೊ ಮ್ಹಳ್ಳೊ ಮಿಸ್ತೆರ್ ತೆ ವಿಸರ್‍ತಾತ್ ಮಾತ್ರ್ ನ್ಹಯ್, ಜೆಜುಚ್ಯಾ ಜಿವಂತ್ಪಣಾವಿಶಿಂ ಮಾತ್ರ್ ಉಲವ್ನ್ ದೇವ್ಪಣ್ ಪಾಚಾರ್‍ತಾನಾ ತೊ ದೇವ್ ‘ಮನಿಸ್ ಜಾಲ್ಲ್ಯಾ’ ಮ್ಹಾನ್ ಘಡಿತಾಚಿ ಬೆಪರ್ವಾ ಕರ್‍ತಾತ್. ಆಶೆಂ ಜೆಜುಚ್ಯಾ ಕಶ್ಟಾ-ಮರ್ಣಾ-ಜಿವಂತ್ಪಣಾಚಿ ಶಿಕವ್ಣ್ ಆಮ್ಕಾಂ ಗರ್ಜೆಚಿ ವ್ಹಯ್ ತರ್ ‘ತೊ ಮನಿಸ್ ಜಾಲೊ’ ಮ್ಹಳ್ಳೆಂಯ್ ನಿಯಾಳ್ಚೆಂ ವಾಜ್ಬಿ. ದೆಕುನ್ ಬಾಳೊಕ್ ಜೆಜುಚೆಂ ದೆವಾಸಾಂವ್ ‘ದೇವ್ ಮನಿಸ್ ಜಾಲೊ’ ಮ್ಹಳ್ಳಿ ಪವಿತ್ರ್ ಸಭೆಚಿ ಶಿಕವ್ಣ್ ಮನಾಂತ್ ಧರುನ್ ತಾಚ್ಯಾ ಬಾಳ್ಪಣಾಕ್ ಮಾನ್ ದಿಂವ್ಚೆಂ ಆನಿ ತಾಚ್ಯಾ ಮನ್ಶಾಪಣಾಂತ್ ಆಮ್ಚೆಂ ಸಂಯ್ಭ್ ಉಭಾರ್‍ಚೆಂಚ್ ಹೆಂ ದೆವಾಸಾಂವ್. ಹಿ ಗಜಾಲ್ ಮುಕಾರ್ ದವ್ರುನ್ ಹ್ಯಾ ವರ್ಸಾ ಫೆಸ್ತಾಕ್ ಆಮಿ ವಿಂಚ್‌ಲ್ಲೊ ವಿಶಯ್ – “ಜೆಜು ಮಾನ್ವಾಲ್ಲೊ ಜಾಲೊ, ಜಾಣ್ವಾಯೆನ್ ಆನಿ ಪ್ರಾಯೆನ್ ವಾಡ್ಲೊ” (ಲೂಕ್ 2:52). ಹಾಚೊ ನೀಜ್ ಅರ್ಥ್ ಸಾದ್ಯಾ ಉತ್ರಾಂನಿ ಸಾಂಗ್ಚೆ ತರ್ ಜೆಜು ಸಮಗ್ರ್ ರಿತಿನ್ ವಾಡ್ಲೊ ಆನಿ ಆಮ್ಕಾಂ ಸರ್ವಾಂಕ್ ಏಕ್ ದೇಕ್ ಜಾಲೊ.

ಜೆಜು ಬಾಳ್ಕಾಚೆಂ ದೆವಾಸಾಂವ್, ದೇವ್ ಕುಂವರ್ ‘ಬಾಳ್’ ಜಾಲ್ಲ್ಯಾಚೊ ಮಿಸ್ತೆರ್. ಹೊಚ್ ಬಾಳ್ಪಣಾಚೊ ಮಿಸ್ತೆರ್ ಸಂಸಾರಾಕ್ ತಾಚೆಶಿಂ ವೊಡ್ತಾ. ಕಿತ್ಯಾಕ್, “ಸಂಯ್ಭಾನ್ ತೊ ದೇವ್ ತರೀ ತ್ಯಾ ಸಮಸಮ್‌ಪಣಾಕ್ ತೊ ಲಬ್ದೊನ್ ರಾವ್ಲೊ ನಾ. ಬಗರ್ ಮನ್ಶಾಸಾರ್ಕೊ ಜಾವ್ನ್, ಗುಲಾಮಾಚೆಂ ರೂಪ್ ಘೆವ್ನ್ ತಾಣೆಂ ಆಪ್ಣಾಕಚ್ ಪೂರ್ಣ್‌ಪಣಿಂ ಖಾಲಿ ಕೆಲೊ. ಮನ್ಶಾ ರುಪಾನ್ ತೊ ದಿಷ್ಟಿಕ್ ಪಡ್ಲೊ”(ಪಿಲಿಪ್ಪಿ. 2:6-8). ಖಂಯ್ಸರ್ ವ್ಹಡ್ಪಣ್, ಗರ್ವ್ ಆಸಾ ಥಂಯ್ಸರ್ ದೆವಾಚಿ ಕುರ್ಪಾ ವ್ಹಾಳೊಂಕ್ ಅಸಾದ್ಯ್. ಖಂಯ್ಚರ್ ಲ್ಹಾನ್ವಿಕಾಯ್, ಮೋಗ್ ಆಸಾ ಥಂಯ್ಸರ್ ದೆವಾಚಿ ಕುರ್ಪಾ ಸದಾಂಚ್ ವ್ಹಾಳ್ತಾ. ಹಿ ಕುರ್ಪಾಕ್ ಕಾರ್ಮೆಲ್ ಗುಡ್ಯಾರ್ ಸದಾಂನೀತ್ ವ್ಹಾಳ್ತಾ ಮ್ಹಳ್ಳ್ಯಾಕ್ ದಿಸಾಂ ಮಧೆಂ ಭೆಟ್ ದಿಂವ್ಚೊ ಲೋಕ್‌ಚ್ ಸಾಕ್ಸ್.

ದುಸ್ರ್ಯಾನ್, ಜೆಜು ಏಕ್! ತಾಚೆಂ ಬಾಳ್ಪಣ್, ತರ್ನಾಟ್‌ಪಣ್ ಆನಿ ತಾಚೆಂ ಜಿವಂತ್ಪಣ್ – ಆಶೆ ವಾಂಟೆ ಕರುಂಕ್ ಜಾಯ್ನಾ. ತಾಚ್ಯಾ ಬಾಳ್ಪಣಾಂತ್ ತಾಚ್ಯಾ ಖುರ್ಸಾಚೊ ಮಿಸ್ತೆರ್ ಲಿಪ್ಲಾ. ತಾಚ್ಯಾ ಖುರ್ಸಾಮರ್ಣಾಂತ್ ತೊ ‘ಮನಿಸ್ ಜಾಲ್ಲೊ’ ಮಿಸ್ತೆರ್ ಸಂಪೂರ್ಣ್ ಜಾಲಾ. ದೆಕುನ್ ಜೆಜುಬಾಳ್ಕಾಚೆಂ ದೆವಾಸಾಂವ್ ಸಂಭ್ರಮ್ತಾನಾ ಫಕತ್ ಜೆಜುಚ್ಯಾ ಬಾಳ್ಪಣಾಚೆರ್ ಮಾತ್ರ್ ದೀಶ್ಟ್ ಘಾಲಿನಾಂವ್ ಬಗಾರ್ ತಾಚೆಂ ಸಗ್ಳೆಂ ಜಿವಿತ್ ಮತಿ ಪಡ್ದ್ಯಾರ್ ಹಾಡ್ತಾಂವ್, ನಿಯಾಳ್ ಕರ್‍ತಾಂವ್ ಆನಿ ತಾಚೊ ಪಾಟ್ಲಾವ್ ಕರುಂಕ್ ಪೆಚಾಡ್ತಾಂವ್.

ತಿಸ್ರ್ಯಾನ್, ದೆವಾಚೆಂ ಉತರ್ ಮ್ಹಣ್ತಾ, “ಸತ್‌ಚ್ ಹಾಂವ್ ತುಮ್ಕಾಂ ಸಾಂಗ್ತಾ, ತುಮಿ ಮನ್ ಬದ್ಲುನ್ ಲ್ಹಾನ್ ಭುರ್ಗ್ಯಾಂಬರಿ ಜಾಲ್ಲೆಖರಿತ್ ಸರ್ಗಿಂಚ್ಯಾ ರಾಜಾಂತ್ ರಿಗ್ಚಿಂನಾಂತ್” (ಮಾತೆವ್ 18:3). ಏಕ್ ಭುರ್ಗೆಂ ಆಪ್ಲೆಂ ಬಳ್ ಆಪ್ಲ್ಯಾ ದಾತಾರಾಥಾವ್ನ್ ಘೆತಾ. ತಾಂಚೆರ್ ತೆಂ ಹೊಂದ್ವೊನ್ ರಾವ್ತಾ. ಬಾಪುಯ್-ಆವಯ್ ಲಾಗಿಂ ಆಸ್ತಾಸರ್ ತೆಂ ಅಪರಿಮಿತ್ ಆನಂದ್ ಭೊಗ್ತಾ. ಜೆಜುನ್‌ಯೀ ಆಪ್ಲ್ಯಾ ಬಾಪಾಯ್ಚೆರ್ ಅಸಲೊಚ್ ವಿಶ್ವಾಸ್ ದವರ್‍ಲೊ. ವೊರಾಂಗಟ್ಲ್ಯಾನ್, ಥೊಡೆಪಾವ್ಟಿಂ ರಾತ್‌ಭರ್ ಬಾಪಾಚ್ಯೆ ಸದ್ರೆಂತ್ ತಾಣೆಂ ಖರ್ಚಿಲಿ. ಜೆಜು ಪ್ರಾಯೆನ್ ವಾಡ್ಲೊ. ತೀಸ್ ವರ್‍ಸಾಂZಂ ಮಿಸಾಂವ್ ಸಂಪವ್ನ್ ಬಾಪಾಚ್ಯೆ ಖುಶೆ ಪ್ರಕಾರ್ ಖುರ್‍ಸಾರ್ ಮೆಲೊ ಆನಿ ಜಿವಂತ್ ಉಟ್ಲೊ. ಪುಣ್ ತೊ ತಾಚ್ಯಾ ಬಾಪಾಥಂಯ್ ಆಸ್ಲೆಲ್ಯಾ ಸಂಬಂಧಾಂತ್ ಸದಾಂಚ್ ಭುರ್ಗ್ಯಾಬರಿ ಲ್ಹಾನ್‌ಚ್ ಉರ್‍ಲೊ. ತಿತ್ಲೊಚ್ ಖಾಲ್ತೊ ಆನಿ ತಿತ್ಲೊಚ್ ಪುರ್‍ತೊ ಬಾಪಾಚೆರ್ ಹೊಂದ್ವಾಲ್ಲೊ! ತೆತ್ತೀಸ್ ವರ್ಸಾಂಚೊ ತರ್ನಾಟೊ ತೊ ಖುರ್ಸಾರ್ ಉಮ್ಕೊಳ್ತಾನಾ ತಾಣೆಂ ದಾಕಯಿಲ್ಲೆಂ ವಿಧೇಯ್ಪಣ್ ತಾಚ್ಯಾ ಲ್ಹಾನ್ಪಣಾಚಿ ರುಜ್ವಾತ್.

ಜೆಜುಚ್ಯಾ ಜಿವಿತಾಚೊ ಎಕ್‌ಚ್ ಉದ್ಧೇಶ್ ಬಾಪಾಚಿ ಖುಶಿ ಸಂಸಾರಾಂತ್ ಜ್ಯಾರಿ ಕರ್‍ಚಿ (ಜುವಾಂವ್ 6:38). ಹೆಂಚ್ ಆಪ್ಲ್ಯಾ ಶಿಸಾಂಕೀ ಶಿಕಯ್ಲೆಂ. ತಿಚ್ ಶಿಕೊವ್ಣ್ ಆಮ್ಕಾಂಯ್ ಲಾಬ್ಲ್ಯಾ. ತರ್ ಭುರ್ಗ್ಯಾ ಸಾರ್ಕ್ಯಾ ಮುಗ್ದ್‌ಪಣಾನ್ ಜೆಜುಚಿ ದಾಂವೊನ್ ಯೆವ್ಯಾಂ. ಆಮ್ಚ್ಯಾ ಜಿಣ್ಯೆಚೆಂ ಸುಖ್-ದುಖ್, ಕಷ್ಟ್ ನಿರಾಶಾ ತಾಚೆ ಮುಖಾರ್ ಸಮರ್ಪುನ್ ದಿವ್ಯಾಂ. ಬಾಳೊಕ್ ಜೆಜು ಫುಡೆಂ ರಾವುನ್ ಮಾಗ್ತಾನಾ ಜೆಜುಕ್ ಬಾಪಾ ಥಂಯ್ ಆಸ್ಲೆಲಿ ತಿಚ್ ಪವಿತ್ರ್ ಮುಗ್ದತಾ ಆನಿ ವಿಶ್ವಾಸ್ ಆಮ್ಚೆ ಥಂಯ್ ಧೃಡ್ ಜಾಂವ್ದಿ. ಆಮ್ಚೆಂ ಸಂಸಾರಿ ಜಿವಿತ್ ಸಂತೊಸಾನ್ ಜಿಯೆಂವ್ಕ್ ಆಮ್ಕಾಂ ಆಧಾರ್ ಜಾಂವ್ದಿ.

ನಮಾನ್ ಬಾಳೊಕ್ ಜೆಜು ಪತ್ರಾಕ್ ಪಂದ್ರಾ ವರ್‍ಸಾಂ ಭರೊನ್ ಸೊಳಾವ್ಯಾ ವರ್‍ಸಾಕ್ ಪಯ್ಣ್ ಸುರು ಕರ್‍ತಾ. ವಾಚ್ಪಿ ಆನಿ ವರ್ಗಣಿದಾರ್ ಜಾವ್ನ್ ತುಮ್ಚೊ ಪಾಟಿಂಬೊ ಆಮ್ಕಾಂ ಎದೊಳ್ ಮೆಳ್ಳಾಂ, ಅನಿಕೀ ತುಮಿ ಆಮ್ಚೆಸಂಗಿಂ ರಾವ್ತಲ್ಯಾತ್ ಮ್ಹಣ್ ಪಾತ್ಯೆತಾಂವ್. ಹ್ಯಾ ಅಂಕ್ಯಾಕ್ ಜಾಯ್ರಾತಾಂಚೊ ಸಹಕಾರ್ ದಿಲ್ಲ್ಯಾಂಕ್, ಸರ್ವ್ ಬರವ್ಪ್ಯಾಂಕ್ ಧಿನ್ವಾಸ್ ಪಾಟಯ್ತಾಂ. ತುಮ್ಕಾಂ ಸಮೇಸ್ತಾಂಕ್ ನವ್ಯಾ ವರ್‍ಸಾಚೆ ಶುಭಾಶಯ್ ಪಾಟಯ್ತಾಂ. ತುಮ್ಚಿ ಮುಕ್ಲಿ ಜಿಣಿ ಸಂತೊಸಾಚಿ, ಸಮೃದ್ದೆಚಿ ಜಾಂವ್ದಿ ಮ್ಹಣ್ ಮಾಗ್ತಾಂ.

ಬಾಳೊಕ್ ಜೆಜುಚ್ಯಾ ವಾರ್ಶಿಕ್ ಪರ್ಬೆಕ್ ತುಮ್ಕಾಂ ಮೊಗಾಚೆಂ ಆನಿ ವೊತ್ತಾಯೆಚೆಂ ಆಪವ್ಣೆಂ ಪಾಟಯ್ತಾಂ.

✍️ – ಬಾಪ್ ಐವನ್ ಸೊಜ್, ಕಾರ್ಮೆಲಿತ್